ابغى مساعده في الغسيل!!! لوسمحتوا

[the tiger]

السلام عليكم


من اجل الوظوح

انا الان بمكان لايتوفر


فيه محلات المغاسل


ولا اعرف مكاييل


الغساله من صابون ونيل


النيل


ارجو المساعده

[الذاهبة]

طيب تبي تغسل في طشت ؟

ولا تبي تستخدم غسالة ؟

كهربائية عادية ولا توماتيك ..


ترى يفرق لازم نعرف أول

[الشامخة]

معاها حق أختي الذاهبة يفرق من غسالة لغسالة ياليت تحدد 000

الله يكون بعونك

[مبحوحة الصوت]

تبي اغسل لك ياخلفهم

الله يخلي لكم الحريم بس ماتشكرون اخ منكم ياالرييايل

ههههههههه


الذاهبه والله انك فزعه

اقتباس: طيب تبي تغسل في طشت ؟ ولا تبي تستخدم غسالة ؟

اختيارات

اقتباس: كهربائية عادية ولا توماتيك ..

نوع الغساله ؟ حدد

يامال العافيه يالذاهبه والله الحين تسنتس غسلتي له


ههههههههههههههه

[الذاهبة]

يابنات قطع قلبي ..

لازم نعلمه ..

و بعدين بمهد له الموضوع عشان ما ينصدم إذا تشققت يدياته من الصابون ..

[the tiger]

مشكورين على التواصل

الغساله تشبه فرن المخبز

له باب مع الجنب

ودي الله يعدي عنكم


اعرف مكيال النيل

لاني لعبت فيه امس لعب

وحاس علي اثيابي


وصارن زرق

كانهن مراييل بنات المتوسطه


وابي بعد اللي تحطونه بالعاده بالغساله


ويخلي الملابس بهن ريحة شمبو


لاني قظيييت امس علبة الشمبو بالغساله


وشكرا

ان الله في عون العبد ماكان العبد في عون اخيه


اتمنى الرد باسرع

وقت لاني ماعندي ملابس

وانا عزوبي وساكن بحالي بعيد عن اهلي

عشان الدراسه !!!!

[الذاهبة]

اقتباس: الغساله تشبه فرن المخبز له باب مع الجنب

يبدو انها غسالة عادية .. يعني أنت تعبي الماء و تسبع الملابس و تنشفها بنفسك ..

ماعليه ..

أول شي ..

لا تجمع كل الملابس مع بعض ..

يعني البيض لحال و الملونة لحال ..

و الفنايل و السراويل ما تغسلهن مع الثياب ..

يفضل أنك تجمع الثياب لحالهن ..

و إذا حطيت ملابسك بالغسالة .. صب عليهن ماء لحد ما يغطيهن ..

و لا تكثر كمية الصابون عشان ما تجيك حساسية من ريحته القوية ..

يعني تقريباً ربع الكرتون الصغير ..

و إذا كانت ملابس داخلية عادي تضيف نقطتين كلوركس .. مو تكثر ..!!

أما الثوب فلا تغسله إلا بالتايد ..

اقتباس: اعرف مكيال النيل

النيل ما تحط منه إلا قليل مرة مرة مرة

سواء سايل أو جاف .. حاول تضيف نقطة وحدة و بس

لأنه لو كثرت بتخرب ملابسك ..!

اقتباس: وابي بعد اللي تحطونه بالعاده بالغساله ويخلي الملابس بهن ريحة شمبو

اسمه ( لينور ) أو ( كومفورت ) ..

تلاقيه مع الصابون و مواد النظافة ..

هذا تضيفه بعد ما تسبع ملابسك من الصابون ..

تضيف نقاط منه في الماء .. و تشطفهم زين ثم تنشفهم ..





ياربيه .. الله يعينك .. و الله ما اظنك تبي تصبر ..

شوف ترى الموضوع مرررررره سهل بس حاول تطبقه زين ..

[الذاهبة]

[moveo=right]سماء نجد ..

أنتي تقولين باين أنها توماتيك ..

و انا عقبك أقول .. باين أنها عادية

أقول عاد الصراحة باين أننا سنعات مرررررررررة !![/moveo]

[فارس الميدان]

لو سمحت اخوي العزيز انت في اي مكان عشان بحاول اقتبس فكره لك حلوه ؟


حدد في اي مدينه او بلد ؟؟؟

فـــــــــــ الميدان ـــــــــــارس

[مبحوحة الصوت]

اقتباس: وابي بعد اللي تحطونه بالعاده بالغساله ويخلي الملابس بهن ريحة شمبو لاني قظيييت امس علبة الشمبو بالغساله

النمر انا متعاطفه معك تدري ليش؟ لاني بعمري ماغسلت واتوقع اذا

تزوجت تبي تصير لي نفس حالتك


وعندي توقع ثاني لحق الريحه على قولتك الظاهر والحديث للشغاله _ ان اسمه كمفرت

طيران رح اشره

[سماءنجد]

السلام.. حلوه الردود
من وصفك باين إنها توماتيك وهذي مهنا زين الغسيل فيها
شوف الصابون حسب طمالت( وساخة) ثيابك وأنصحك تستخدم اريال تراه يخلي الثياب يلقن وإذا كان عندك بلايز وبناطيل لاتحط صابون حط شامبو حتى مايصيرن جفسات ..
اما اللي يخلي ريحة الملابس حلوه هو ..وش يسمونه ياربيه..إيه اعتقد ملين المهم اسمه كمفورت يخلي الريحة تجنن ويسهل الكوي
إيه بعد ترى المكاييل ومقدار الصابون موضح على علبة الصابون
أما النيل فأعتقد إنه لازم تحطه في قطعة شاش وتغطه فقط وتشيله لاتخليه يذوب
مع تمنياتنا بغسيل يلق بياض

[عقل حر]

بسيطه

اسال شغالتكم يمكن تفيدك

[the tiger]

ياحليلكم حليلاه

والله اني ولهت على امي

الوحده بكم فزعتة فزعة الف رجال

انا وادي اعرف الواحد اذا ماجمل مع اخوياه


قالوله انت بك من فزعات الحريم

يعني انه مافي فزعه


ولكن انتم عكستوا

هذي الظاهره عند بعظ الناس


ومشككككككككورين

!!!!!


قبل اشوي


ابشركم طلعن ملابسي من الخباز (المغسله شكله تقل مخبز لان الفتحة مع الجنب )


بس صارن تقل خياش


خشنات بالمره


شعري صار انعم منهن !!!!


تصدقون


ولا ادري ليش

[بريدة.. معشوقتي]

الحمد لله على السلامة يا... بالعربي(( النمر))..

تروح وترجع لنا بالسلامة..

نصيحتي لك ...أحسن لك من تعب الغسيل والطبخ .....* أسمع بيني وبينك ترى يمدحون ""زاواج المسيار "" يمدحونه بالحيل%%
دور لك على بنيت حلال تخدمك وتحشمك وتبلعك وتوسع صدرك وتونسك.
بس لا يدري أحد**

**ألف ألف مبروك الله يبارك لك وعليك ويجمع بينكم بخير**

[مبحوحة الصوت]

نضجن الثياب

كلووووووويش الف الف مبروك


والله وتعلمت وانا تعلمت منك


اذا ماعرفت بكتب بالنت يعلمونن الناس الفزعه

الذاهبه وسماء نجد وشرواهم