خفوق الشّاعره يبكي لها في الملحمه موّال
خيال المُلهمه ماضي يوادعها ويناغيها
أمل صافي يسامِرها بِصوت من الألم محتال
أماني ترسم خطوط ٍ على منوال ماضيها
لذيذ الشوق يترنّم ويعزف نغمة الرّحّال
ولمسة صدق مليانه عتاب وحب تحييها
دروب الوصل تعبانه عناها قسوة الأحوال
ودفّة رحلتي قالت وصلنا اليوم تاليها
أقول الشّعر لجل أحيا واشَهّد بالهوى مرسال
وانا مااقدر أوافيكم حقيقه مااقدر أخفيها
حياة القلب لقياكم وشوقي فاض بالمكيال
ونون العين ولهانه وطلّه منك تضويها
بداية قصّتي نبض ٍ كسير ٍ للمحبه مال
وبآخرها سطا شوق ٍ على روحي يعنّيها
كيان الشاعره مُفعَم تسوقه آهة ٍ تختال
وكريم القلب يقبلها ويرضاها ويهدّيها
نظمت حروف بشموخي وحرفي بالوفا بتّال
وغذيت الروح باشعاري ورضا الرحمن حاديها
ترا لو قلت بكتابي أحبّه والوجود أطلال
عنيت الشوق واطلاله وكتاب الوجد قاريها
واختمها صلاة الله على محمد عدد ماسال
من غيوم السّما قطر ٍ بطامن نجد وعاليها
للرائعة اماسي
العرض العادي
