بعد مرور سنة على وفاة الوالدة

[سميتك ثالث والديني]

بمناسبة مرور عام على وفاة الوالدة رحمها الله رحمة واسعة






اليـوم صار لغـربـة الوالـدة عام * وأحـزان يـوم إفراقهـا كنـها اليوم



الله يايـوم أمس فـي ذلك العـام * كم كان لك عندي من علوم وعلوم



يوم أتخيـل حين تطْرقها الآلام * شعرت كنـي بيـــن الأوداج ملـكـوم



ماكني الا من سمع حكم الإعدام * ينخا جميـع الناس ويقـول مظلوم



أجاذب الأحلام من رحم الأوهام * في لحظة إن المنتظر كان محسوم



أرسم لهـا مستقبل الوضـع قدام * ثم أمسحــه وأقـول مايمكن يـدوم



غصبٍ عليه كان للموقـف أحكام * عطفي عليها كـوم وإفراقهـا كوم



تملكت فكري هواجيس وأحلام * أضحك وأنا من داخلي كنت مكلوم



رح لاعدمت ملاطفك لي ياعـزام * أبنثر العبره تـرى الوضع محموم



لومـا أتقيـد فـي تعاليـم الأسلام * شقّيـت بعـد النوح لفراقهـا هــدوم



ليـه سنـه وأنا أسهر الليل مانام * وإن نمـت ساعـة ماتهنـيـت بالنوم



بـس أتَبــَرّمْ فــي منـامـي ِتبـرّام * خايـف يهاجمنـي إذا نمــت جاثـوم



جاثوم لاحوّلْ على الصدر ماقام * يموت حيلي وأختنق ماقـدر أقــوم



لو أرسم حساسي على لوح رسام * صارت معالم لوحته كلها خروم



عندي شعور إني من الهم منضام * وعندي يقين أن الأمر كان محتوم



الحــزن لـو خيـم لـه أيــام مـادام * تبـي تجــي عقبـه مسرات وهمـوم



الآدامي مهمـا حصـل منـه مايلام * وشهو له نلومه على شي مقسوم



دام القـدر مشيـه علـى العالم إلزام * ماضـن يجدي نلحق المبتلى لـوم



ونهاية المخلوق لفه مـن الخــام * ويحط في قبـرٍ مـن الطيــن مـردوم



لوهي تدوم إن كان مامات صدام * وإلا الرسول الي عن الذنب محشوم



الأرض تبلـع مايـذبن الأرحـام * تفطـر على لحـم المخاليـق وتصـــوم



يارب لطفـك ياذرا كل مـن صام * يـالـواحد المعبــود يـاحـي ياقيـــوم



تلطف بحال اللي قضت عمرها قيام * ومكابدٍ ماهو بهالوقــت مفهوم



ربت على ضعف المعيشه لها أيتام * لاما غدو مع ربعهم ربع ٍ قروم



ودعتهـا عنـدك لها بقطعة حرام * تحـت الثـرى مابين دوده وجـرثوم



يـاخالقٍ عطفه شمل كل الأنـام * تجعل جسـدها عن سنا النار معصوم



آمل أن تروق لكم



منقول