ليتنا من ( عيـــدنا ) ... سالمين...!!

[مدير خبرة]

العيد كان جميلا ومفرحا ومبهجا لنا.. حينما كنا صغار..

كنا ننتظره لأن فيه البراءة والعفوية ..

اليوم العيد.. قد يمثل للاطفال فرصة للسعادة..

لكنه للاهل... باب للشقاء... والتعاسة...!

اعرف صديقا لي يسافر سنويا في أيام العيد..

يقول أصرف على زوجتي وبناتي اكثر من خمسة الاف ريال.. ويمكن اكثر

وسفرة لابها آخر وناسة.. ما أصرف هالمبلغ...!!!

مشكلة العيد... أنه اصبح ساحة للتفاخر والتنافس بين النساء

والضحية هو الرجل.. الذي يجبر على الدفع.. على اعتبار انه لايريد ان يكون اولاده اقل الناس

وليت الثياب ولوازمهن.. مثل اول حقات شارع الصناعة... وقبة رشيد

تشري الفستان ب50 و 70 وتطقم بنتك ماتاصل 100 ريال

اليوم الفستان لحاله فوق ال300 وال 500 هذا غير الاكسسوارات وغيره

ولاتنسى الزوجة.. وهذي شنطة.. ماركة وساعة بفوق ال2000 ريال

وينحرم اللي زوجته مهب موظفة أو مدرسة...!!!!!

هذا غير التعب واللفلة بين الاسواق وماهنا سوق مايدخلونه... وبالاخير مافيه شي يصلح

الواحد من اول يوم برمضان وهو ماغير من سوق لسوق...

شي شراء.. واشياء ترجيع...!!!

واللي مر سوق المشاغل اخر يومين برمضان.. وشاف الحريم فيه...

يقول حنا في مدرسة بنات... من كثر الحريم وبناتهن...

وهذي مناكير وذي بدكير وذيك سولتير >> ماله دخل .. بس السجع

صراحة احيانا اقول لو الواحد مقطوع من شجرة.. ارحم في ظل هالاجواء الصعبة

وارحم صرااااااااحة اللي راتبه 2000 او 5000 وش بيسوي مع هالحالة...؟

فعلا الحريم خلن عيدنا هم وألم ونكد...!!!!!

[ولد السويلم]

كلااااااااااااااام جميييييييييييييييييييييل..........


تحياااااااتيــ،

[زمن الغرباء]

الله يكون بالعون ..
بس والله فيه حريم واجد مشتريات قبل رمضان وبأسعار مناسبة ..
يعني مو الكل

اقتباس: وارحم صرااااااااحة اللي راتبه 2000 او 5000 وش بيسوي مع هالحالة...؟

لاتحسبون كل البنات كذا وتضيقون صدوركم
هي اتوقع ع حسب العائلة ومادتها
وبصراحة
اكره ماأشوف التكلف الزايد باللبس والتجمل
احيانا تطلع الوحدة اشين
عموما ..
البساطة في كل شي
هي اللي تخلي الحياة حلوة

لكن
ياليت قومي يعلمون

بالتوفيق ..

[شعاع الكون]

انا مع اختي زمن الغرباء
انا مخلصه من اغراض العيد اول رمضان
والحمدلله كل اسعار اللي اشتريت مناسب
وترا الوحده موب لكل عيد ساعه وجزمات
انا البس من اللي عندي يعني مايحتاج كل شي جديد

الف شكر عالموضوع

[>ريانه<]

المشكله اكثركم تعممون في الكلام

مااقول الا الله يكون بعون الحريم

[قـتـالـه]

مع اني مناهضه للمرأه وماارضى احد يضيمها ولو بكلمه ,,
بس الصراحه بالاعياد يمصخنه نسمع الجعجعه ولانرى الطحين!
سردادي مردادي على المولات والمشاغل كل رمضان ولدخلن علينا
بالاستراحات مانشوف شي تغير حمود هو حمود الا اذا بدن يفشخرن
هذا من المحل الفلاني او هذا من المول الفلاني درينا بلبسهن ..
عندي نظريه تقول كل ماحرصتي بمناسبه معينه تسرقين الاضواء
سبحان الله يقردك الله وتصيرين اردا الموجودات !
مامثل الاعتدال والرجوع للمظهر والالوان الطبيعيه اللي ربي خلقنا بهن
والاهتمام بجذب الاخريات بخفة الدم وذرابة اللسان والتواضع انتن معي او لا؟

[كفاني عذاب]

ياحبيك حريم هالوقت دبش قوه
اذا شافت اخته او بنت عمه او احد اقاربها ازين منها لبس
زعلت على رجله وتشيله وتشتري اغلى منهم ولو كان مهب زين بس اهم شيء انه اغلى منهن

الله يكفينا شر الحريم

وكل عام وانت بخير

[| ~ ســمــو ~ |]

لا للتعميم
والبنت بطبيعتها تحب الزين ، لكن كويس انها تحبه على حسب استطاعة ابوها او زوجها

ومشكور

[مدير خبرة]

اقتباس:  المشاركة الأصلية كتبت بواسطة ولد السويلم     كلااااااااااااااام جميييييييييييييييييييييل.......... تحياااااااتيــ،

حياك ربي ولد السويلم

وتعليقك أجمل يابعدهم

[مدير خبرة]

اقتباس:  المشاركة الأصلية كتبت بواسطة زمن الغرباء     الله يكون بالعون .. بس والله فيه حريم واجد مشتريات قبل رمضان وبأسعار مناسبة .. يعني مو الكل لاتحسبون كل البنات كذا وتضيقون صدوركم هي اتوقع ع حسب العائلة ومادتها وبصراحة اكره ماأشوف التكلف الزايد باللبس والتجمل احيانا تطلع الوحدة اشين عموما .. البساطة في كل شي هي اللي تخلي الحياة حلوة لكن ياليت قومي يعلمون بالتوفيق ..

المشكلة اذا هرجنا والا لمنا حريمنا

قالوا وين انتم عايشين..!!؟

العالم كله كذا.. ووينك عن الي والي والي....

حتى نرحمهن ونتصور انهن ياحووووول

وعن كلامك.. فيه شباب والله يعانون ..

وشباب اعرفهم هجروا اجتماعات اهلهم بسبب مطالب حريمهم

[مدير خبرة]

اقتباس:  المشاركة الأصلية كتبت بواسطة شعاع الكون     انا مع اختي زمن الغرباء انا مخلصه من اغراض العيد اول رمضان والحمدلله كل اسعار اللي اشتريت مناسب وترا الوحده موب لكل عيد ساعه وجزمات انا البس من اللي عندي يعني مايحتاج كل شي جديد الف شكر عالموضوع

الاستعداد المبكر للعيد شي طيب

بس هو يعتمد على قناعة المراة وثقتها في ذوقها

وما ادري كيف قستي اللي شريتي انه مناسب...؟؟

وربي يهنيك.. على لبسك للي عندك

وووين فيه بنات يرضون كذا...

[مدير خبرة]

اقتباس:  المشاركة الأصلية كتبت بواسطة >ريانه<     المشكله اكثركم تعممون في الكلام مااقول الا الله يكون بعون الحريم

آآآمين

ويكون بعوننا حنا بعد

لاننا حنا اللي وراهم بالتودات.. والصرف

وما ادري انا عممت والا لا...!!!؟؟

قبل كم يوم في منتدى مجاور وحده معلنة انه تبي تنورة من نوع معين ولون معين

وتقول لفت كل اسواق القصيم ومالقتها...!!!

وتقول ابشريها باللي هي به...!!!!

[مدير خبرة]

اقتباس:  المشاركة الأصلية كتبت بواسطة قـتـالـه     مع اني مناهضه للمرأه وماارضى احد يضيمها ولو بكلمه ,, بس الصراحه بالاعياد يمصخنه نسمع الجعجعه ولانرى الطحين! سردادي مردادي على المولات والمشاغل كل رمضان ولدخلن علينا بالاستراحات مانشوف شي تغير حمود هو حمود الا اذا بدن يفشخرن هذا من المحل الفلاني او هذا من المول الفلاني درينا بلبسهن .. عندي نظريه تقول كل ماحرصتي بمناسبه معينه تسرقين الاضواء سبحان الله يقردك الله وتصيرين اردا الموجودات ! مامثل الاعتدال والرجوع للمظهر والالوان الطبيعيه اللي ربي خلقنا بهن والاهتمام بجذب الاخريات بخفة الدم وذرابة اللسان والتواضع انتن معي او لا؟

هلا بك قتالة

كلام في الصميم...

وفعلا كثرة الحرص... تجيب النتايج وخيمة

بس من يسمع...!.!!

بس مناهضة اظنها ضد وليست مع ..!!

[مدير خبرة]

اقتباس:  المشاركة الأصلية كتبت بواسطة كفاني عذاب     ياحبيك حريم هالوقت دبش قوه اذا شافت اخته او بنت عمه او احد اقاربها ازين منها لبس زعلت على رجله وتشيله وتشتري اغلى منهم ولو كان مهب زين بس اهم شيء انه اغلى منهن الله يكفينا شر الحريم وكل عام وانت بخير

معك حق

بعض البنات يتوقعن الزين بالسعر

مو بالشكل...

عشان كذا اهم شي تشري غالي

وخل نقول ...

يالله لاتحرمنا عقل الحريم... وتمتعنا بجمالهن بدون خساير فادحة

ومثل ماقال علي بن ابي طالب رضي الله عنه

"المرأة شرٌّ كلها وشرُّ ما فيها أنه لا بُدَّ منها"

[مدير خبرة]

اقتباس:  المشاركة الأصلية كتبت بواسطة ســـــــمـــــــو     لا للتعميم والبنت بطبيعتها تحب الزين ، لكن كويس انها تحبه على حسب استطاعة ابوها او زوجها ومشكور

حياك الله سمو

الزين الكل يحبه

صح المراة بزود شوي

بس اذا كان بيتسبب في قلق وتعب للاهل

فيصير شين.... وشين قووووة بعد

وخليك عند حسب استطاعة... لانها هي مربط الفرس