انا خلاص بعت "الشوزل" وصندوق "الفشق" .

[خالد التويجري]

بسم الله الرحمن الرحيم
السلام عليكم ورحمة الله وبركاته


اسعد الله كل اوقاتكم بالمسرات ... والسعاده

في مامضى من وقت ملكت يوماً ما بندقيه "أم خمس" وبلا شك توابعها اساسيه "صندوق فشق" بولاندي أو غيره .
منذ سنوات بعت مالدي من عدّة صيد ... مع تمسكي بعدّة الرحلات البريه (في الربيع) .
السبب ... يدركه الغالبيه من هواة الصيد وأخص منهم هواة "القميري" ...؟؟!
تفرق الصيد .. وكاد يكون معدوم متشتت ... لا تدركه الا بحظ فقط .
خلاف الماضي حيث كانت مواقعه شبه محدده ... ومرسومه .
تحت كل "طلحه" عدد من "جيوب الربع" يفوق عدد القميري على الشجره ... إن وجد ..؟؟!
وعند سقوط القميريه لا يدرى من ايهم سقطت حيث كانوا يصوبون نحوها جميعا ...؟؟!




تحياتي ...

[أبووايل]

الله يرحم ايام زمان

[جلوي العتيبي]

اي والله

زمان اول كان الصيد أوفر وأكثر لذه

أما اليوم فهو لايمثل شيء بالنسبه للجهد والوقت المبذول

ومع ذلك هي هواة محببه للكثيرين

شكراً اخي بريداوي

[خالد التويجري]

أبو وايل

مرحباً بك .... سرني ان تكون اول مشاركه لك في موضوعي .. شكراً لك .


ــــــــــــــــــــــــــ

امين امين امين ... الله يرحم ايام زمان ..؟!


تحياتي .

[تركي عبدالله الوهيبي]

والله أنك صادق يابريداوي

الصيد قل والصيادة واجد بس الدعوى كلة وناسة

وذواقة وأنت أبخص
(( أنا مبطي عن الصيد يكحيلان *** أشوف الصيد قل وصار قلة من عذاريبة ))

[خالد التويجري]

الزعيم

صحيح هي فقط ممارسة هوايه ... مع يقين من يمارسها بنتائجها مسبقاً .



تحياتي ... شكراً لمرورك الكريم .

[أبوفالح]

[align=center]

هلا بالغالي بريداوي

ونا خوك .. السالفة فيها تفصيل

إذا كنت من جيل الشيبان .. أيام الكبات والفروق اللي زي الرز .. يوم كان الصيد داخل الدائري

إذا كنت من هالصنف معك حق .. والنفس تزهد بالقليل بعد الكثير

إما إذا كنت من جيل الشباب وهذا ما أجزم به ( عطفاً على صورك ونت عاطس في بحر الفلبين )

إذا كنت من هالصنف .. ياخوك هوّن .. رجع بارودك ورجع فشقك ..

إذا كنت تلقى غداك وشي بسيط تراها نعمة كبيرة .. ولا تنسى وجود هيضات تصيد فيها بالعشرات وقد تتجاوز المئة

أيضاً .. ما يمنع تاخذ معك لحمة حاشي .. وتفلها إذا صارت فلس .. هنا تحدث الوناسة وسعة الخاطر

لكن أنتبه تكون من النوع اللي يتمرمط بالشموس والمواري ما فيه شي .. أكيد الليلة الظلما باينة من عشاها

عموماً .. إذا كنت تغلي القميري وتحب تبرد سبدك .. لا يفوتك الساحل .. تراه بالحيل زين ولا يقارن إطلاقاً بشعبان الطلح


دمت بخير [/align]

[خالد التويجري]

المستوي

وناسه .. صح .. بس اهم شي مايصير معكم واحد بس يطامر من عثمور الى عثمور ... من طلحه الى طلحه ..؟
من يقوم الفجر الى الساعه 11 الضحى وهو "يدابتس" ..<<<< يراكض .


تحياتي

[العصامي]

بريداوي 9
الله يرحم أيــام زمــان ( صبوا لي شاهي )

يوم الطلقه الوحده تصيد عشر قميري وأكثر

لكن هالحين الطلح إختفى إجتثوه الحطّابه وأهل الفحم 00

لارحت لمكانك اللي رحت له العام الماضي وإلا المكان متغيّـر عليك 00 وإلا الطلح ماهو في مكانه !!!

لكن يكفيك من زين الحلايا وصوفــه 0 تعوّض بالسمك عن القميري 00

[خالد التويجري]

اقتباس:  المشاركة الأصلية كتبت بواسطة أبوفالح     [align=center] هلا بالغالي بريداوي ونا خوك .. السالفة فيها تفصيل إذا كنت من جيل الشيبان .. أيام الكبات والفروق اللي زي الرز .. يوم كان الصيد داخل الدائري إذا كنت من هالصنف معك حق .. والنفس تزهد بالقليل بعد الكثير [/align]

الله يرحم ابوي .. يوم يقول شوفوا القميري تقل "شحن قار" ... ذكرتــ (ن) ايامه الله يغفر له ويرحمه .
يوم حنا رفقه معه ..؟!

اقتباس: إما إذا كنت من جيل الشباب وهذا ما أجزم به ( عطفاً على صورك ونت عاطس في بحر الفلبين ) إذا كنت من هالصنف .. ياخوك هوّن .. رجع بارودك ورجع فشقك ..

والله مانيب مهون .. يابو فالح ... خلاص ...<<<< إلا إذا تبي نتخاوا بالصيد شكلك تصلح لي .

اقتباس: إذا كنت تلقى غداك وشي بسيط تراها نعمة كبيرة .. ولا تنسى وجود هيضات تصيد فيها بالعشرات وقد تتجاوز المئة

الظاهر ماتلقى ولا غداك ... على يدك يالله يابو فالح ..<<<< ملزم يبي حلقه .

اقتباس: أيضاً .. ما يمنع تاخذ معك لحمة حاشي .. وتفلها إذا صارت فلس .. هنا تحدث الوناسة وسعة الخاطر

لـــ صفة على ذي ... يازين عريق الطرفيه ... ولا حديقة البصر .

اقتباس: لكن أنتبه تكون من النوع اللي يتمرمط بالشموس والمواري ما فيه شي .. أكيد الليلة الظلما باينة من عشاها

لا .. مانب منهم خوياي يتذمرون من من قولت يكفي خلوا نرجع للطلحه ناخذ قشنا ونروح للشقه . او الشاليه بالرايس .

اقتباس: عموماً .. إذا كنت تغلي القميري وتحب تبرد سبدك .. لا يفوتك الساحل .. تراه بالحيل زين ولا يقارن إطلاقاً بشعبان الطلح

ولـــ فاتك الصيد ... مايفوتك الساحل و السباحه و الوناسه ... هذي هي .
بس عاد ممكن تكون بدون "مرمطة" الصيد .. لا ولــ منه طاحبك امن الطرق ومعك البواريد و الفشق وانت راجع .. والله من زين الامور ..وااااااوك .<<< بدون صيد وطاحوا بك .

اقتباس: دمت بخير

وانت كذلك ... سرني مرورك و تواجدك . إن رغبت فعاود .


تحياتي

[خالد التويجري]

اقتباس:  المشاركة الأصلية كتبت بواسطة العصامي     الله يرحم أيــام زمــان ( صبوا لي شاهي )

ايهههههه زمن ... أكالوا الباما وعيوننا طايره ...؟!

اقتباس:  المشاركة الأصلية كتبت بواسطة العصامي     يوم الطلقه الوحده تصيد عشر قميري وأكثر

مايصدق الا اللي شاف بعيونه ... هالحين يعتبرون هذي "كلك" صياده ... مايدرون .!!

اقتباس:  المشاركة الأصلية كتبت بواسطة العصامي     لكن هالحين الطلح إختفى إجتثوه الحطّابه وأهل الفحم 00 لارحت لمكانك اللي رحت له العام الماضي وإلا المكان متغيّـر عليك 00 وإلا الطلح ماهو في مكانه !!!

مادري وين حماية البيئه عنهم ... والله راح الشعيب .. تصحر مابقي به شي ...؟!!؟

اقتباس:  المشاركة الأصلية كتبت بواسطة العصامي     لكن يكفيك من زين الحلايا وصوفــه 0 تعوّض بالسمك عن القميري 00

والله ولهين عليه ... ماتبي ننصاه ..؟!!!


تحياتي

[خالد التويجري]

مكرره ... عذراً .

[رعد الشمال]

واللة عندي سلاح
سووبر بلاك ايغن
جايبة من الكويت
قبل يومين
خوش سلاح
بجيكم انا
ان شاء اللة لي يوم ياهل بريدة

[خالد التويجري]

رعد الشمال

اقتباس: خوش سلاح بجيكم انا ان شاء اللة لي يوم ياهل بريدة

تحتاج نوضيح ... عذراً لم افهم .! وحتى استطيع ارد ..؟!






تحياتي .,’

[عبدالله القيعاني]

عزيزي /بريداوي9


وعليكم السلام ورحمه الله وبركاته


دق إشاره يمين او يسار وصفط على جنب اقرب محطة عوضها بالدجااااااج .. ,,,


والله يرجع أياااااااااااام زمااااااااااااااااااان القميري ........!؟


دمت بكل الووود والاحترام ،،