الإخوة رواد المنتدى : السلام عليكم ورحمة الله وبركاته
أرجو بارك الله فيكم أن تدلوني على قائل هذه القصيدة وجزاكم الله خير:
يا ما حلى الجلسة على حافة النار*** مع دله جنب المعاميل صفرا
يخلط لها من غالي البن و بهار *** والعنبر الهندي مع الكيف يبرى
مع ربعه وسط المجالس لهم كار *** الكل عن ذكر المناقيد يدرا
ما بين حلوات السوالف والأذكار *** على مسيل طامي قاع خبرا
في مربع بين الخزامى والأزهار *** لا فاح ريحه تلقى الأرواح سكرى
الأرض خضرا والمداعيث نورا *** والجو غيم وهامي الطل يذرى
فيه الزبيدي شالع شق الأستار *** صلع مفاريع على جال مجرى
تسمع على غدرانها سجع الأطيار *** الصبح ديم وساير الليل قمرا
يا صورة ما تمحى عبر الأفكار *** تبقى على ساعات الأيام ذكرى
في ريف دار شعشعت فيها الأنوار *** دستور شرع وما قضى فيه يجرى
سلم لأهلها حشمة الجار للجار *** وحق عليهم لا لفا الضيف يقرى
بريده حباه الله من زين الأثمار*** عم الرخا فيها والأنعام كبرى
يا ديرتي يا حلوة الدار من دار*** أحلى من السلسل على الكبد وأمرا
يا ريحة من فايح المسك لافار *** يا عقد مرجان زهى عنق عذرا
يا درة ما جابها كل بحار *** ولا وقفت للبيع بالسوق تشرى
الظل والقرقوق والماء والأشجار *** الغرس زاهي والبساتين خضرا
ما بين مكتومي وسلج وقطار *** ونبته وخضريه وبرحي وشقراء
نوايع مما تحبه وتختار *** ومزارع فاقت بساتين شبرا
فيها المراعي والدواجن والأبقار*** لو جيت سوقه مالك الله تخطرى
رمله ذهب ماله مثيل بالأقطار *** يا كيف اعد أوصافها وانتم أدرى
يا ديرتي ما صار مثله بالأمصار *** لاباخر الدنيا ولا عهد كسرى
من جوزة المغرب إلى الطور لظفار*** للبصرة الفيحاء إلى دار بصرى
آمنت بالمعبود في سر وجهار *** يحميك رب البيت عن كل عثرا
والله ما نسى ديرتي دار الأخيار *** دام النفس بالروح والروح تذرى
جاعت وغذتنا مصاغير وكبار *** تبي الجزا منا على دور بكرى
تكاتفو يا عيالها شيب وصغار *** شلت يمين ما تعضد ليسرى
صاروا هل السفرات بالسوق تجار *** وفلاحها عقب الشقا شاخ أثرى
وكل القصيم وما حوى الجال والغار*** شرق وشمال وكل رمل وقفرا
عقب الرهب والخوف والأخذ بالثار*** وكل نقل بندق وخنجر وعجرا
اليوم نرقد ما نبالي بالأخطار *** لاخوف من زيد ولا بطش عمرا
ومن عقب ما كنا شتات بالأقفال *** اليوم كل بالمدينة تحضرا
واليوم قانون الجهل ولى الأدبار*** وكل بدا يحصي ويكتب ويقرا
صلاة ربي عد همال الأمطار *** على نبي صار للناس بشرى
العرض المتطور
