اه من قلبٍ غدا مثل الهشيم
ياملا حاربت لذاة المنام
كن قلبي فوق جمرٍ مستقيم
والمدامع هاملاتٍ بانسجام
ليلة الاثنين في وقت العتيم
شفت ريم عارضني باسلام
قلت له اهلا وسهلا يانديم
مرحبا والفين ياسيد العمام
ذا قمر خمسة عشر نوره مديم
او بروقٍ تشتعل وسط الظلام
قلت له يازين من اي الحريم
قالت مالك فيه يكفيك السلام
صابني بحالتي امرٍ عظيم
طحت انا مصيوب مابديت الكلام
بعد ذا ياصاحبي كني سقيم
او مريض مدنفٍ خمسة عوام
عارفه معلوم ماني بالغشيم
هو كما القنديل في ليل الظلام
بو ثمانٍ ذبلٍ جنسه عديم
والجدايل شرعن حدر الحزام
والثنايا الغر صانعها الكريم
والنهود اللي كما بيض الحمام
والوسط زاويه زيٍ بالبريم
وان مشي بالمثل مشيه للحمام
يسحب المنثور بالزري الرخيم
تحت ماهو بالنعم ريش النعام
عينها والعنق يشدي عنق ريم
نايفه بالطوق تزها بالزمام
عذتها بالله من عين الرجيم
من سفيهن مايثمن للكلام
جادلٍ حطت عظامي كالرميم
سنها حروة يجي عشرين عام
لجة الخلخال يسمعها الصميم
وانظرها صايمٍ خلا الصيام
علتي زادة وصرت ابها سقيم
ياحجا ماجاورت بيتٍ يضام
اشتكي لك واتعوذ يارحيم
بين عيني فالقعود وفالمنام
هو حبيبي هو وليفي من قديم
جعل من عاداه في ظل وعدام
سار فالقريه وفي حفظ الكريم
يرجعه رب السما منشى الغمام
ذا سلام عد ماهب النسيم
والتحيه دايم دوم الدوام
الشاعر/ محمد بن العبون
العرض الشجري