ليلة العمر Or يوم العرس & دموع الفرح

[بيسان]

[align=center]السلام عليكم ورحمة الله وبركاته

موضوعي هو( ليلة العمر) (يوم العرس)

تكون العروس والعريس في قمة الفرح والسعاده والام والأب وكل الأقارب
ودموع الفرح على قولتهم الكل يدمعها من العروس الخ

طيب الأم والأب عرفنا ليش يصيحون ووش معنى دموع فرحتهم ان بنتهم او ولدهم كبر وبيكون بيت وبيصيرون اجداد ويصير لهم احفاد

طيب العروس بالذات العروس ليش تسميها دموع فرح وليش الصياح دامها فرحانه وليش تفرح بذيك الليله وليه تسميها ليلة العمر تساؤلات تنتابني لماذا تفرح العروس فرحه كبيرة جدا

سؤال ينم عن غباء بتقولون لكن انا أسالكم من جد وانا صادقه ليش بالعربي انتم اخوان واخواتي لي بهالمنتدى اللي اعرس واللي ماعرس ابغى وجهات نظركم

وليلة العرس او ليلة العمر ماذا تعني لكم ولماذا بنظرك سميت هكذا ولماذا تبكي العروس؟؟

انا أتكلم وانا للحين ماأعرست بس يضيق صدري اذا شفت عريسه كاشخه وتصيح طيب ساده وشوله تعرسين وش حادتس مو هذا اللي تبينه شوله تصيحين ؟؟

مادري بس للحين افكار توديني وتجيبني !!
جاوبوني على سؤالي الغبي جدا؟؟
أختكم
نمله كاشخه
وشكراً[/align]

[فيصل الخالدي]

العروس تكون مرتبكة وخايفة وتبكي لأنها بتترك أهلها .... فقط هذي كل السالفه وكلها أسبوع وتكره أهلها

[البرحيه]

ابوووووووووك ياطاري العرس منزله الموضوع مرتين


احيانا ماتبي تبكي بس تتأثر باللي حولها
وانا احس عشانها بتفارق اهلها خاصه ( امها ) وصديقتها وبيتهم وغرفتها .......... وايام الدلع والوناسه



شكرا لك

[بنت البدائع]

أيااام عصيبه بصراحه

أنا أقارن يوم العرس بيوم العزاء

السالفه تكون دموع ×دموع

والمكياااج الله يخلف عليه هه

سبحان الله شعور غريب من الكل (الأم والبنت والأخوات)

تخيلي أي زواج أحضره وتكون فيه زفه للعروسه ولو هي ماتقربلي
تنزل غصب دموعي أول ماأناظرها

شكراً لك نمووله طرحتي موضوع حلوو و واقعي

[•°سـرىآ اللـيـل°•]

أهلاً وسهلاً

أنا بقولك ليه يابعدي,,,

بصراحه أنا مستقبلاً اكيد بصيح مايبيله هذي بس مهب عشاني بفارق اهلي ,,

طبعاً فراق أمي وأخواني وخواتي مهب سهل لكن البكاء على فراقهم سيكون قبل ليلة الفرح

يوم الزواج لو بكيت مو بكاء فرح ولاحزن ,,

بكااء خووف ,, من ايش ؟؟؟

1- من هالعريس اللي بدخل عليه ,, خلينا واقعيين .. حتى لو كنت اعرفه وبينا اتصالات قبل موعد الزواج << هالخرابيط اللي طاحوا به من تاالي

يضل رجل غريب علي,, ياشيخه لو أدخل على طبيب بالمستشفى ضربت أخماس بأسداس وهو مايعرفني

فما بالك برجل بعيش معه وانا كل حياتي ابعد مايكون عن أعين الرجال ماعدا محارمي ,,

2- الخوف من المستقبل المنتظر ,, يوم الزواج بكون على حالة إنتظر ,,

ماأدري وش بتكون النتيجه ,, هل أوفق أم لا ,,

هذي وجهة نظري وسألت وقالوا نفس الاسباب ,, اصلا مافيه غير هالسببين والله أعلم ,,

الله يوفقنا قولي آآمين

[العبرى]

اما سؤالك لماذا تفرح العروس فرحة كبيرة جداً..لحااااله


وحكاية الدموع

من زمان ماشفت او سمعت عن احد صاح بليلة عرسه..!

اتوقع اللي يصيحون

من الإرتباك..الخوف..خجل..فرح..يعني مجموعة مشاعر متضاده


وبتفكير آخر

الزواج صار جد..

ومافيه مفر







تحيتي,,,

[[..عذآري..]]

لأنهــــــــــــا تبــــي تــدخل حيـــاة جـــــــــديدهـ

لأتعلــــــــــــم أنهــا ســـوف تـــوفق أم لأ

[الكبري]

ربما أنها دموع مختلطة .

وقدتكون بسبب نظرة من شخص آخر .

وربما تكون خوفاَ من المستقبل المجهول .

لكم أطيب المنى

[عجوز سمنسي]

يمكن البنات تصيح لرقة مشاعرها وشفافية قلبها

لكن ماعمري سمعت ان رجل بكى

يمكن يطيح بالدرجة او يصك الباب على بشته او يصك الباب على اصبعه من الروعة

لكن يبكي هذي ماسمعتها ابد

بكاء البنت نتيجة فراق ولقاء

ألم وأمل

عبرات وعبارات ستقال

نظرة للمستقبل

ربما ايضا الخوف من المجهول

ربما الدخول على عالم مجهول غريب

كلها اشياء متراكمة في النفس تثير الشجون وتدمع العين

لو بكيت دموع عيني ماتفيد *** وان شكيت الشكوى مافيها مسد

تحياتي

[اسم العضو]

ليلة العمر أحساس غريب وألم عجيب

أشبه بمن سقط على أصبع رجله الكبير أسطوانة غاز وبدأ ينبط

سلام...

[قلب الأسد]

تبكي لأنها تقع في هذه الليله في اشياء كثيره الخوف والارتباك
الرهبه وايضا دخولها حياة جديده وابتعادها عن اهلها لأول مره
كل هذه الاشياء كفيله ببكاءها .
اما ليلة العرس فهي بالنسبه للرجل تكون بالنسبه له من احلى
الليالي في حياته وذلك لتطليقه حياة العزوبيه .ولكن بعد اشهر
اتوقع بيقول (ياليت ما استعجلت طبعا في وقتنا هذا)

[فتاة المستقبل]

البكاء اللي يكون بليلة العرس هو بكاء خوف ..
السبب :
أ رجعي لرد سرى الليل ..

[هامة حاسوبية]

[align=center]




1- رهبة الموقف

2- الخوف من ليلة الزواج

3- الخوف من ذلك الرجل الغريب الذي أصبح بين ليلة وضحاها زوجاً لها >> تراه ماتقصد شي

4- الخوف من المستقبل المربوط بهذه الليلة ، فلا تدري هل ستدخل قفصاً ذهبياً أم سجناً مؤبداً !! >> الشر برى وبعيد


وأحيانا بسبب بكاء من حولها من أمها أو جدتها


وأحيانا لا تبكي إذا كان الجو لا يسمح بذلك من الانشغال وعدم بكاء أحد حولها ، أو عندما يحاولون إضفاء جو فكاهي يضيع رهبة الموقف



نسأل الله تعالى التوفيق للجميع >> يوجعه بطنه لا أطروا العرس





[/align]

[علشانك بس]

وهـ بس وهـ

[مياسة]

[align=right]ساعة واحدة تُبدل حياتك كلياً .. هل نقابل هذا الشي بكل طبيعة ؟ بالتأكيد لا
ليتها دموع وبس محلولة باقرب كلينكس .. المشكلة بالمغص والارتجاف والتوتر والاضطراب والارتباك ووو....

اقتباس: حتى لو كنت اعرفه وبينا اتصالات قبل موعد الزواج << هالخرابيط اللي طاحوا به من تاالي

الله يرحم حالك يا سرىآ .. الناس سارين ع هالحركة من 12 سنة لين طلع الصبح.. وانتِ تقولين من تالي !!؟[/align]