••.•°¯`•.•• ( أيـــام فــرحـي .. و حـــزنـي .. و مــعاناتــي ) ••.•`¯°•.••

[صاحي و رايق]

%% الساعه 6:00 العصر %%

من نص ساعه وهوقابض الموبايل و هو متردد يتصل ولا لاء ... مع انه مب مقتنع من اللي يبا يسويه بس فيه شي ف داخله يلح عليه انه يسوي اللي يمليه عليه قلبه اللي رد ينبض من يديد بحب هند ... ما قدر يتخيل ردة فعل اهله اذا اتخذ القرار اللي يدور براسه ... اكيد هالقرار بيثير زوبعه خصوصاً انه اللي فضلها على بنت خاله هي وحده مرمسنها قبل ... صح انه يقدر يخش عنهم هالشي لكن سالفة طلاقها مستحيل تنخش عنهم وهالشي اللي مصعب عليه الامور ...

تنهد بضيج و هو يتأمل رقم جليثم الظاهر على الشاشه ... رص بصبعه على زر الارسال و تم يتريا الرد ... كلها ثواني و اييه صوت جليثم من الطرف الثاني ...

جليثم بصوت مبحوح: الوووه ...
حمدان: هلا ...
جليثم: اهلين ... شحالك؟؟
حمدان وهو حاس باللي تحس فيه جليثم: الحمدلله ... شو فيج حبيبتي؟؟؟ شكلج مضايجه ...
جليثم بلوم: اتعرف شو مضايجني ما يحتاي تسأل ...
حمدان تنهد و الالم يعتصر قلبه: ادري اني كنت مقصر وياج وايد ... بس في شي لازم اقولج اياه قبل ما ارمس الاهل فيه ...
جليثم بقلق: حمدان شو صاير؟؟
حمدان بعد لحظات من الصمت: جليثم ما انكر اني حبيتج من كل قلبي ... ما مر يوم الا و تخيلتج وياي زوجه و ام عيالي ... بس للاسف انا ما استاهلج ... انا قلبي وهبته لانسانه غيرج من قبل لا تخطبج امايه من خالي ... اعترف اني ما كنت راضي في البدايه لكن عقب الحب اللي جفته فيج حبيتج من كل قلبي و الحين الوضع تغير ... اتمنى انج تفهمين اللي اقصده من كل هذا ...
جليثم بتردد و بصوت مبحوح: حرام عليك كسرت قلبي بكلامك هذا ... انته شو ما تحس؟؟
حمدان: ادري اللي قلته مب شويه ... بس هذا اللي لازم تعرفينه ما يهون عليه اخش عنج شي ... و حبيت انج تعرفين كل شي من الحين عشان ما تنصدمين فيه عقب و تكرهيني اكثر من ما انتي تكرهيني الحين ...
جليثم بانفعال: لا تقول هالرمسه ... انا احبك ... احــــبــك ... من يوم وعيت ع الدنيا و انا ماجوف فيها غيرك ... استانست و حسيت اني ملكت الدنيا و مافيها يوم عرفت انك خطبتني ... و تحطمت يوم عرفت من منال انك ما تباني ... و الحين انته ذبحتني تعرف شو يعني ذبحتني بكلامك ...
حمدان: ..................................
جليثم: خلاص سير للي انته تحبها دامك ما تباني ... انا ماعاد لي رغبه فيك مع اني بعدني احبك ... حمدان اللي احبه مات و اللي بقالي مجرد ذكرى ... خلاص روح بس لا تخليني اجوفك ولا اسمع عنك خبر من عقب هاليوم ...

انزلق التلفون من ايد حمدان و نظراته متركزه في الفراغ اللي جدامه من الصدمه ... بندت عنه جليثم عقب ما خلصت رمستها بدون وداع ... حس انه ندمان ع الخطوه اللي سواها بس هل ينفع الندم ... ثواني الا التلفون يرن ... شل التلفون و هو كله امل انها تكون جليثم متصله عشان تقول له انها رجعت عن قرارها ... لكن كل احلامه تبخرت يوم جاف الرقم مب رقم جليثم ... تم فتره يطالع التلفون و هو متردد يرد ولا لاء ... و في الاخير قرر انه يرد ... يمكن هالمكالمه تخفف عنه الحمل الثجيل اللي هو شالنه ...

حمدان ببرود: هلا هند ...
هند: هلا حبيبي شحالك؟؟ شو بلاه صوتك متغير؟؟
حمدان تنهد بضيج: ولا شي حياتي ... ولا شي ...
هند بعتب: حمدان ادري انه فيك شي لا تخش عني ... انا هند حبيبتك ...
حمدان غمض عيونه و هو حاس انه الدنيا ضاقت عليه و ما لقى غير هالكلمه تنفس عن الالم اللي فيه: هـــنـــد ... احـــبـــج ...
هند و هي حاسه ريولها مب قادره تشلها من الوناسه: حبيبي ... و انا اموووت فيك ...
حمدان: هند خلاص انا رمستها و باقي بس ارمس هلي و ينتهي الموضوع ...
هند بوناسه: والله؟؟ فديتك ما تتخيل اشكثر انا مستانسه ... اخيراً الايام بتجمعنا ويا بعض عقب الفرقا ... مب قادره اصدق ...
حمدان بحزم: هند خلاص ماله داعي تقلبين المواجع ... اللي صار صار ... بس صبري عليه شوي و كل شي بيصير ف وقته ...
هند: حمدان انته تدري اشكثر انا صبرت و تحملت عشان اكون وياك ... خلاص ما فيه صبر اكثر ...
حمدان: و انتي تتحرين هالشي سهل عليه؟؟ ترى مهما صار هاييل هلي و ماقدر اقولهم بكل بساطه انا خلاص مابا بنتكم ... ارجوج هند افهميني ...
هند تنهدت: خلاص سو اللي يريحك و انا بترياك ان طالت المده ولا قصرت ...
حمدان تنهد بضيج: على العموم انا بخليج الحين ... و برد ارمسج عقب ...
هند: خلاص حبيبي الله وياك ...
حمدان: مع السلامه ...

بند حمدان عن هند و هو حاس بشعور مب عارف كيف يفسره ... هل هو ندم بسبب اللي سواه لجليثم ... او فرح عشان هند اللي كان طولعمره يتمنى انها تكون له ... او خوف من اللي بيواجهه عقب ما يخبر اهله باللي ناوي يسويه ... مايعرف بشو يفكر ولا شو يسوي عشان ينسى هالسالفه و ف الاخير قرر يظهر من البيت و يتونس ويا ربعه يمكن يقدر ينسى ولو لساعات معدوده ...

*~*~*~~*~*~*