حادثة تقهر جداً .. والسبب .....!

[أبوفالح]

[align=center]


مساكم الله بالخير

راح أعطيكم سالفة طازجة .. سالفة أحداثها صحيحة ميّة في المية ... وأنا على ذلك من الغارمين
تدرون ليش أقول كذا ؟؟
لأنّ اللي تسولف علي هي اللي صاير معها السالفة ، فهي إحدى محارمي .. والمسكينه هي الآن مريضة ومصفورة من شدة الروعة ..
والآن خلونا نعطي المايك من عاشت تفاصيل الحادثة

تقول ( س )
كانت هذه الشغالة تحديداً غير الشغالات كلهن اللي جربت من حيث الأخلاق والمحافظة على الصلاة وصيام بعض النوافل وأشياء كثيرة تفعلها هذه الخادمة السريلانكية .. صحيح أني ضاق صدري أول ما شفتها لكونها كبيرة في السن أكثر من المتوقع ومن الذي أبرم في العقد .. لكن بعد مشاهدتي لسلوكها وهدوئها وحرصها على مرضات ربها حبيتها بصدق ، وجميع البيت أحبها وتعلق فيها ... حتى داهمنا ذلك المساء الصارخ في ألمه وهو يوم الخميس اللي فات ( 15 /9 )
لكن قبل الخميس هناك ملابسات سبقته بثلاثة أيام ، وهي أنّ الشغالة لم تكن في حالتها الطبيعية إطلاقاً ، فهي قلقة وشاحبة الوجه وكثيرة التفكير ، وهذا ما جعلني أدعوها لأكثر من مرّة بأن تنام في الصباح حتى الظهر ثم تشتغل في تنظيف البيت بعد ذلك ، ولا بأس أن تستبقى شغلها بعد الإفطار ..


ماذا حدث في مساء الخميس

تقول ( س)
صحيت من النوم قبل صلاة العصر بقليل ، وحين دخلت المطبخ تفاجأت بأن المطبخ لم يتغير في حركات التنظيف المعتادة .. فالشغالة من عادتها تستيقظ عند الظهر ثم تزبط المطبخ والبيت .. لكن هالمرّة شغّالتنا مالها حس ولا رس .. فصوّت لها وصارخت باسمها ولا مجيب ، فقلت يمكن بالدور الثاني وطلعت الدور الثاني ولا لها أثر وكانت بنتي تقوم بعمليات البحث المساندة معي .. فغلب الظن أنها في السطح تغسل الثياب أو تكون ( هاجه ) !! لكن ليش تهج ومعاملتنا معها طيبة لأبعد حد ، إضافة إلى كونها كبيرة في السن ومتدينة وعاقلة .. وعندها شمرت السطح أنا وبنتي وهو أملنا الوحيد ( بعد الله ) للعثور عليها .. وحين بلغنا باب السطح كانت بنتي قد سبقتني في بضع خطوات ، فواقت شوي ثم رجعت وهي تهمس لي .. بالسطح بالسطح واقفة ... فشعرت بالراحة قليلاً لعثورناً عليها ، ثم دخلت السطح وأنا أشعر بالحنق والرغبة الملحة لتعنيفها عن إغفالها صراخنا ومناداتنا لها طوال بحثنا عنها .. وحين دلفت السطح بعزيمة وحنق كبيرين .. كنت على موعد مع منظر نسج الرعب من تفاصيله .. لقد شاهدت حبلاً يتدلى من سلم الخزان الكبير وفي نهاية الحبل (غطوة) ناعمة قد التفت حول عنق شغالتي المسكينة وكانت أطراف قدميها يرتفعان فوق الأرض ببض سنتيمترات فقط .. وقريباً منها ( دفاية ) ذات عجلات والتي كانت حبيسة المخزن منذ أن قطع البرد بوردنق المغادرة .. وكانت خادمتى المسكينة تتدلى وقد شخص بصرها نحو السماء بشكل مرعب وعنيف جداً .. وهنا خرجت رغماً عني صرخة الرعب المذهل ولم تكن بنتي بأحسن مني حالاّ .. وبعدها تركناها في وضعها ونزلنا من السطح ونحن لا نتستبين طريق النزول وكدنا أن نسقط ونتعثر في المنعطف الأول من الدور الثاني .. ومن حسن الحظ أنّ رب المنزل كان متواجداً في تلك اللحظات .. فسارع إلى تلك المنشنوقة في السطح فشاركنا الرعب والذهول .. ثم هاتف الشرطة وهو يتمتم بشرح الموقف .

ماذا حدث بعد ذلك ؟؟

حضرت الشرطة بأعداد كبيرة جداً .. وتم التصوير ورفع البصمات .. وكان التقرير الأمني يقول :
أن الخادمة ربطت الحبل في سلم الخزان ثم وضعت الغطوة حول عنقها .. وبعد ذلك صعدت فوق ( الدفاية ) وحين تأكدت من وضعها دفعت الدفاية بقدميها بعيداً عنها .. لتغتالها الغطوة وتخنقها بشدة .. وقد تكون فارقت الحياة قبل الحادية عشر ظهراً .

وحين دخل رجالات الشرطة و التحري الجنائي غرفة الشغالة .. وجدوها قد كتبت حديثاً مجموعة من الأوراق ونشرتها في مكان باز وملفت للنظر .. ومن تلك الأوراق ما يلي :
- ورقة كتبت فيها .. محبتها لأهل المنزل وعطفهم عليها راجية منهم المسامحة والصفح عمّا أقدمت .عليه ؟
- ورقة كتبت فيها .. أنها المسئولة الوحيدة عمّا أقدمت عليه وأن أهل المنزل لا شأن لهم بما فعلت .
- ورقة كتبت فيها .. بيان مخالصة وأنها استلمت جميع رواتبها ولم يتبق في ذمتهم ريال واحد .
- ورقة كتبت فيها .. لماذا أقدمت على شنق نفسها ؟

وقبل أن أخبركم عن فحوى الورقة الرابعة ... أخبروني عن توقعاتكم لماذا هي فعلت ذلك ؟

لي عودة .. بعد تراويح هذه الليلة


. .[/align]

[فور يو]

لا حول ولا قوة إلا بالله , انا لله و إنا اليه راجعون ...

اللهم اسألك حسن الخاتمه ...

_______

الورقه الرابعه توقع ماكتب بها صعب لكن اعتقد ان ظروف صعبه مر بها اهلها او ابنائها في بلدها ...

اعذب تحيه للكل .

[ابوخالد382]

هلا ببوفالح , يمدحون الكبات هالسنه .
قبل أيام قليلة حصلت لجيراننا نفس المأساة وإنتحرت شغالتهم والسبب أن زوجها غدر فيها وجميع ما جمعته من أموال سرقه زوجها وتزوج بأخرى وكتب المنزل بإسمه وهي طلعت (فشوش) بعدها قررت الإنتحار.
أعتقد أن قصتك قريبة بعض الشيء من هذه ,,خصوصا وأنها كبيرة ومستحيل تتعرض لتحرش جنسي هنا......دمت بخير

[خـــــــــــــــالـــــــــد]

ابو فالح


الذي يتبادر للذهن في مثل هذه الحالات... ان السبب رساله من اهلها تطلب مزيدا من المال فوق ما تستطيع او ان زوجها تزوج باخرى من مالها الذي ترسله .

لكن من طريقه عرضك و استفسارك ........ تجعلني اتوقع ان السبب غير متوقع .


الله يقطع ابليسك حتى والسالفه فيها انتحار و موت , سواليفك تهببببببببببل يا مال الغناه

[إشراق]

لاتكون شغالة عمتي بس وتصير تقرب لي انت

بس اللي أكد لي أنك ماتقرب لي انه شغالة عمتي انتحرت قبل رمضان

بسبب انه زوجها تزوج عليها من رواتبها اللي ترسلها له

ماتحملت وانتحرت

لو انا بسم الله علي مانتحر واريحه مني

اروح له وانشب له وانكد عليه واطلع فلوسي من بلاعيمه اجل بعد يتزوج بشقاي وتعبي وتغربي

ولا هو بجهينه ماهمن بداله الف وبحريقه هو وياه

<<< ماتقرب تراه


بس يابوفالح بما انك كاتب هالموضوع معناته انه سبب بايخ سبب انتحارها

الله لايبلانا وننتظر السبب

[جلوي العتيبي]

راحت صلاة التراويح هواجيس

كنت أعتقد أن هذه الشغاله غير مسلمه .لكن بعد سرد سيرتها والله زادت الحيره .

كان الله في عون (س) موقف كهذا يهز الرجال فمابالك بإمرأه ضعيفه .لكن لعل رسائلها حملت الكثير مما يخفف المعاناه ويوضح حسن التعامل ولله الحمد من هذه الأسره .

ربما قصة ابوخالد قريبه .

الله يستر كانت عندنا شغاله بنفس السيناريو

كل شهر ترسل القريشات و4سنوات ماسافارت وبالأخير يتزوج عليها ويطلقها الخسيس بس الحمدلله مانتحرت

ننتظرك يابوفالح لاتبطي

[جمان البحر]

لا حول ولا قوة الا بالله ..
وش فيهن هالشغالات كثر انتحارهن ..

[الذاهـبـة]

أمممممممممممممم .. ؟!

سبب انتحارها .. أتوقع أنها فقدت الأمل أنك تتزوجها ..

هه !!

استغفر الله ..

بالمناسبة كل السيرلكيات كذا ..

ماعندهن تفاهم الله يهداهن .. على طول انتحار ..

و السبب : قطعياً .. ( رجُل ) ..

منكم لله يا خونه ..

الله يعين المره و بنتها .. ياحول .. منظر مرعب من جد .. !

[فاطمة الوليعي]

ماله خلق تعيش >>> استغفرالله

فعلا ينتحرون لاتفه سبب ..

ودينهم شكل بس

الله يحمينا ,,


ما شاءالله يا ابو فالح ... حتى سواليفك صارت ألغاز

[العبرى]

[align=center]

اقتباس: و السبب : قطعياً .. ( رجُل ) ..

أتوقع نفس السبب..أو إنها مهب مسلمه من الأساس..!

ياربي نتكلم بأموات..

ماخلصت التراويح..؟



تحيتي,,,[/align]

[Queen of buraydh]

يووووه .. ياعمري اللي صار لها الموقف

لا حول ولا قوة الا بالله ..

ننتظر السبب يا ابو فالح ..

[بنت البدائع]

واااو وش ذا

أتوقع أنه يوم تجي للسعودية كانت كافرة وأسلمت هنا

ولاوده تروح لديرته وتشوف الكفر

أغلب الشغالات كذا ..

يالله عجل علينا لاهنت

[أبوفالح]

[align=center]

تبون أرد عليكم أول .. أو أعطيكم سبب الشنق على طول ..
عموماً .. هي ماتت ونتهت .. ولا راح يفيد معرفكم السبب بسرعه .. يعني أبرد عليكم واحد واحد ثم أعطيكم السبب باخر شي

فوريو
آمين .. أمين .. فحسن الخاتمة هي الزبدة من حياتنا .. الله يرزقنا وياك حسن الخاتمة .


ابوخالد 282
السالفة كابة موت ..مهب خرابيط طيور
أمّا سالفة جيرانكم .. فهي تغث وتقهر ، شاقية ومتغربه وبالنهاية يتزوج بفلوسها .. أنا خابر يعطيها رضاوة إذا بغى يتزوج عليها .. ليته فاكها من شرّه


خــــالد
عفواً .. السبب مهب رسالة ولا طلب مزيد من المال .. لكن زي ما قلت فالسبب قد يكون غير متوقع .

بنت بريدة 2
ماحصلنا الشرف نتقارب .. لأن شغالة عمتك قبل رمضان ونا في منتصف رمضان ..
لكن خيره ، ما يصلح نتعارف فوق جثث الشغالات
لكن خوذي هالمعلومة كجبر خاطر .. مشرفنا أبو خالد282 جيران عمك اللي انتحرت شغالتهم .


الزعيم
إلاّ صلاة التراويح عاد لا تحوسه
زي ماقلت .. الرجال ينهار في مثل هذه المواقف عاد وشلون حرمة .. إلاّ هقوك لو كان عاشق ديرتي هو اللي عثر عليها ؟؟

جمان البحر
أحمدي ربك على النعمة والحياة الرغيدة .. فالكسافة والشقا والتغرب والجهل والبعد عن الظنى يسوي كل شي .. والله لا يورينا اليوم الأسود .

الذاهبة
أذكر قبل فترة طويلة .. كتبت قصة أتخيل فيها وضعنا لو نضب البترول فجأه .. وزي ما تدركين نحن أراضي قاحلة لا ماء ولا مرعى
وقد أسرفت في تصوير حالة البؤس والشقاء .. ومن ضمن السيناريوا التي وضعتها بنات حمايل يسافرن للخارج عشان يخدمن في البيوت
عموماً .. شخصيتك في المنتدى وسرعة ردودك ونشاطك هنا وهناك يدل على أنك قرمة بالحيل عشان كذا تصلحين شغالة السيناريوا .. الله يستر عليك ويغنيك في بلدك وخياتي وجميع بنات المسلمين .
لكن من هالحين .. لو صار شي لا تكزين لزوجك ولا قرش .. زي ما قلتي الرجال شياطين


فاطمة الوليعي
من نعم الله علينا .. أن ولدنا ونحن نرضع العقيدة الصحيحة من مظانها .. والجهل يسوي كل شي
عموماً .. هذا لغز بدون جائزة ... إنشا الله

العبري
مالك لو .. والتراويح خلصت بدري .. بس أنا كنت معزوم

كوين بريدة
فعلاً حالتها صعبه .. أدعيلها بالصبر ونسيان الفاجعة .

بنت البدائع
مالك لوا .. فهي مسلمة قبل تجي .. إلا أحسن من بناتنا بالصلاة والذكر وصيام النوافل .

هالحين .. أبعلمكم سب الحادثة :
وبعد تداولات تفكيرية دامت إلى عقب التراويح .. لم يتوصل أحد إلى الحل الصحيح .. والذي هو ( الجهل )
نعم يا سادة .. فالورقة الرابعة تحوي رجاء حار جداً بأن تدفن في تراب السعودية .. وكأن المغفرة والجنة توأم لمن دفن فيها
يعني .. مافيه شي صريح .. لكن من أحاديثها مع صديقاتها الشغالات كانت تحدثهم كثيراً عن أمنيتها بالموت في وطن الرسول صلى الله عليه وسلم .
وحين نبحث عن سبب آخر لا نجد شيئاً .. فهي لا تشتكي من رسائل محزنة إطلاقاً .. وليست تعاني من نوبات جنون ، بل كانت متدينة جداً وذكر الله لا يفتر من لسانها .. بجد كانت هكذا


حكمها الشرعي
قبل قليل كنت أجالس أحد طلبة العلم .. فأخبرته عن الحادثة وسألته عن مصيرها .. وهل تعذب في النار بما كان سببا في وفاتها .. كما ورد في الحديث .. وهل تعذر بجهلها .
فأجاب أنّ مردها إلى الله ويجب التوقف في أمرها .. ولكن يرجوا أن يكون جهلها سبباً لتجاوز الله عنها .. كما حدث في قصة الرجل الذي أوصى أن يقطع ويحرق في النار ويذرا في الأرض .. وحين بعثه وسأله لما فعلت هذا .. قال خشيتك .. فغفر الله له وأدخله الجنة .
فهذا أشد من صنيع الشغالة .. لأنّه يشك في قدرة الله على البعث .. وهذا من الكفر .. لكن كان يجهل ذلك .

يالله مع السلامة



.[/align]

[بنت البدائع]

افا ياذا العلم ..

عموماً الله يتوب علية

صدق الشغالات جاهلات

[نقد التعليم]

[align=center]

اقتباس:  المشاركة الأصلية كتبت بواسطة أبوفالح     [align=center] نعم يا سادة .. فالورقة الرابعة تحوي رجاء حار جداً بأن تدفن في تراب السعودية .. وكأن المغفرة والجنة توأم لمن دفن فيها يعني .. مافيه شي صريح .. لكن من أحاديثها مع صديقاتها الشغالات كانت تحدثهم كثيراً عن أمنيتها بالموت في وطن الرسول صلى الله عليه وسلم . .[/align]

وعشان تحقق الأفضلية لهالأمنية ( اختارت التوقيت برمضان ) يعني مابينها وبين الجنة إلا تكــَّـة الحبل .. يارب إنك تعاملها برحمتك !

عموماً معروفات السيرلنكيات بالإنتحار والاضراب والهجيج !

اللهم احينا مسلمين وتوفنا مسلمين ، والحقنا بالصالحين غير خزايا ولامفتونين .. آمين





[/align]