صعب لامنّك فشلت .. و صعب لامنّك لقيت
إن من يكره نجاحك يدري إنك .. ما نجحت
أمس ضقت .. و رحت أقلب ذكرياتي و إنتهيت
عند صورة طفل .. صوته مثل صوتي لا إنجرحت
وش مثل ..!! لا و الله إلا هذا أنا يوم إبتديت
أنطق حروف تلعثم في لساني .. لا إنمدحت
هذا أنا .. يوم الحياة بنظرتي .. عشرين بيت
و مسجدين و مدرسة من طين كم فيها إصطبحت
هذا أنا و أصبحت أتمتم .. هذا أنا .. حتى بغيت
أختنق .. بس القدر عيّا على موتي .. و طحت
و صاح صوت الطفل فيني أنت من وين إرتميت
قلت أنا .. المستقبل .. اللي فيه كم همت و طمحت
أمس كنت أبيك تكبر .. بس و الله .. لو دريت
إنّي اللي عشت لجله .. مت عندك و إسترحت
لو دريت إن الزمان يجرّ رجلي .. ما عديت
و لو دريت إن البحور بلا مواني .. ما سبحت
كان دربك لي طويل .. و كل ما شفتك هويت
قلت لك .. كبوة جواد و ما كبيت إلا و جمحت
ليه تسمعني و تمشي ..؟؟ آآهـ ليتك ما مشيت
و آآآهـ ليتك من كثر عثرات الأيام .. إنتصحت
ضاعت أحلامي و ضل الحزن فيني و إهتديت
للطريق اللي يوديني على دمعي .. و رحت
يا الحزن .. ليتك مثل دمعي .. و تنزل لا رقيت
بس أعرفك لو مسحت الدمع تبقى ما إنمسحت
كان حلمي .. في وجود إنسان .. يبكي لا بكيت
و صار حلمي .. في وجود إنسان يفرح لا فرحت
كنت أشوف الناس مثلي كل ما جعت و ضميت
مادريت إن الأوادم .. ناس فوق و ناس تحت
آآهـ يا أول ذكرياتي خذني بحضنك .. نسيت
بسألك عن وجه أبوي .. اللي معه ياما سرحت
و خذني بحضنك أبغفى .. يآآآهـ مبطي ما غفيت
و إن لمحت دموع عيني سوّ نفسك .. ما لمحت
خذني بحضنك و بعثر في جروحي و إن قضيت
هزّ لي كتفي و قل لي .. عيب تبكي لو سمحت
إضحك و علّم زماني .. مِن أنا .. مِن وين جيت
طقّ باب .. الحزن .. و إصرخ فيّ لامنّي فتحت
و ضمّني يمّك و كمل ضحكتك .. لامن بكيت
ودّي أذكر كيف كانت ضحكتي .. لامن فرحت
العرض الشجري