...................بين ياس ورجوى .................
يسرني أن أقدم هذه القصيدة بمناسبة افتتاح المنتدى وأخص بها أبا عادل وراعي العنود ..
أنا سكرةٍ جتني غشـــاني ضبـابهــا *** تولَّت لها روحي وفارق صوابها
بدت بي مع النسناس في هزعة الدجى***على غفلة الحساد ماحدٍ درا بها
بدت بي وأنا عيني تهاوم على الكرى*** وتسبح بغبات يتوّه سرابها
تغرب شجـوني يوم تســرح بطيــفهـــا***وفيها هنا روحي وفيها عذابها
تغرب وتوردني مظــــامــي هـل الهوى***مظامي يتوه ابها شقيٍّ وطا بها
تجــلــت وقالــت لي فديتك أنا الهــوى*** توجَّه مع ظعونٍ نصيبك حدا بها
تجهز وشد رحـــال فكــرك على النـوى*** تجهز ترى الأشواق مفتوح بابها
مضى لــك زمــانٍ بين ياسٍ ومــرتــجــى*** تصوغ القوافي يوم كلٍ شدا بها
تصـــوغ القوافي وأنت في نايـد الفـــلا***وتسرح وتمرح في هبايب ترابها
نظــمـــت المـعــاني زاهـيــاتٍ بــدلـّهــا ***وشوفك قصير الطرف ينسج ثيابها
حرمــت العــواطـــف يوم حامـت طيـورها***تبي تعتلي من فوق نايف سحابها
تريد الهــوى مـن حيث تسـري بها المنى***وغيرك مع اللذات هامْ وسرابها
شحيحٍ على نفسك عــن أدنى طمـوحها ***حياة على الحرمان وش ينبغى بها
تشــوف المـــلا تــاخــذ وتعطي وترتجي***حظوظٍ بها الدنيا محسَّب حسابها
تموت المـراجي يــوم تنشـــف غيــولهــا *** وتورق علىالسقيا صفايحْ هضابها
أنا سكرةٍ جــتنــي حيــاتي فــدىً لـهـا ***أسوق البشاير يوم جاني جوابها
غزالٍ تقـــود البيـــض والريـم والمـــهــــا ***يسلّم لها من شاف ضافي حجابها
حَــوَتْ مــن معاني الزين مـا حيــر القـلــم*** وخلَّى خلي القلب يتبع ركابها
غزالٍ زهـــا زينـــه بكامـــل محـــاسنــــه***وتمم بها ربي مفاتن شبابها
غزالٍ غضـــيــض الطـــرف عن مـارد الخنا***ولا هي من اللي بالردى ينحكى بها
على عينهـــا النجــلا سهـــومٍ مــن الردى*** وعلى كفها ذابت ملامح خضابها
تغــذت على جــدول نعيــمٍ مــن الـــهنـــا ***وتاهت على الخفرات من زود ما بها
إلى هــب ذعـــذاعٍ يــداعــــب حـــريــرها*** تتقى شعاع الشمس من حيث صابها
أنــا مـــا قــدرت أجمع بشعري وصوفها ***أمانة تحيِّر يوم حظّي رمى بها
وللعلم فهذه القصيدة قد أذيعت في عدة محطات وحفظت باسم صاحبها ...
أخوكم : الهـــــــدهـــــــد .