يبدو والعلم عند الله اني بشتري تريلة !!
مايحصل غير معقول !
تطلع من دوامك او من الاستراحة او تجي من البر او بتروح لاي مشوار قريب وتحوم تسبدك !
في امان الله ورابط حزام الامان والامان من رب العباد ومهدي وماسك اليمين عسانا من اهل اليمين
الا يمر بجنبك فشقة !!
عفوا هايلوكس غمارة مطلق الارض
نسيت اني ابدخل مع النافذ يمين ومن الروعة مشيت سيدا !!!
تدري خلني اديور وارجع لنفس الطريق ...
يوم جيت الف لليسار الا فشق هالمرة !!!
هالمرة هايلوكس واكسنت وجيب ربع ومن ظمن البيعة دباب بانشي او رابتر!!
من السرعة ماميزته
وبرضوا من الروعة سيدت !!
وصلت الاشارة ووقفت انتظر دوري
فتحت الاشارة بسلام الا وهالمرة سونتا قاطع الاشارة بكل سرعة وبرود ولاكان احد بالشارع !
اتعوذ من الشيطان لكن الغضب لعب بحسبتي
لحقته وبالقوة خليته يوقف ونزلت ناوي اسطره
افقع وجهه
استعد على خده بجزمة مقاس 42
اصنفر جبهته بالزفلت
وصلت الا ابو 14 سنة ومابين غير طاقيته اللى واصله اذانه
والخوف لاعب في اللي خلفوه
طقتني الرحمة ومشيت ومشى على صوت تفحيط الكفرات
ياجماعة صرنا اصواع وارواع لما نسوق السيارة
اعتقد الحل
اشري تريلة وخل اللي يفحط والا يسرع ينشب بلوحة التريلة
يمقن يبي يقرأ اللوحة
او اخليه يعد صواميل جنط الكفر !!!
لعلي في المرة القادمة اسولف لكم عن الدائري وبلاويه
الحين شوفوا لي حل بهالمصيبة والا ابجزم على التريلة والوعد لين طلعت من بيتكم وشفت سيارتك لاصقة بالارض من تريلتي
لاهنتو
العرض الشجري