عديت في مرقب بين الشفا العالي
مرقاب غي يذل الطير من دونه
تلقى لحرش المواطي فيه مدهالي
عنها القنانيص يلتاجن بركونه
حب الحبيب صبغ ما عاد ينجالي
لو كل يوم بصافي الماء يغسلونه
غض النهد وإن وطا بحويجر سالي
تلقى النفل والزبيدي منه يجنونه
له مشية ما مشاها أول ولا تالي
واللي خلافه وقدامه يراعونه
يبكي عليه القصر والمجلس العالي
حتى الفناجيل ودلاله ينوحونه
يا حافرين القبر خلوه منزالي
واللي على حد راسي لا تدفنونه
خلوني أشوف من سيّر ومن جالي
وأشوف غض النهد يمشي على هونه
وسمعت عقب العصير صياح رجاّلي
واثره حراج على قشه يبيعونه
لبس الحبيب ثويب بريسم غالي
لا لبسه الترف دق القاع بردونه
العرض الشجري