انا علـى المقنـاص قلبـي يرفـي
بكره ونرجع يم آهلنا منـا كيـف
بديـار لفـروق الحبـارى اتلفـي
جنوب من حزم الجلاميد وطريـف
الطير هو غايـة غرامـي وشفـي
اقـدره تقديـر الاجـواد للضيـف
من كبر قدره شايلـه فـوق كفـي
وراعاه تسع اشهور بالقيظ والصيف
ودهنـه لاشفـت ريشـه مصفـي
على الدعاء وخفف النسر تخفيـف
نقلـه يشرفنـي وشوفـه يكـفـي
عن شوف ناس ما تعرف المعاريف
لاشفت لـي نـو ابروقـه ترفـي
نويت اجهـز موتـري للتكاليـف
القيـظ كلـه جـالـس ومتعـفـي
برد المكيف نشـف الـدم تنشيـف
متـى سمـوم القيـظ عنـا تقفـي
وسهيل قبل يعمد الفجر قـد شيـف
والنـار يصلـح شبهـا للتـدفـي
البرد نوجس من نسيمـه هفاهيـف
قمنـا لعزبتنـا نشيـل ونظـفـي
ونكمل الناقص ونملا المظاريـف
اللي نشيـل مـن اللـوازم امكفـي
امكتفين العفـش بالحبـل تكتيـف
يمكن ليـا جينـا البقالـه انوفـي
حاجات نشريها كمالـة مصاريـف
والصبح من حزم ابرقيـه امقفـي
صوب المعظم والهضاب المواقيف
بديار جعل اشجارهـا مـا تجفـي
تعلهـا غـر المـزون المراديـف
في رفقة اللي نارهـم مـا تطفـي
على الشرف والجود ربع مواليـف
مجلاس طلقين الشوارب امصفـي
على الدلال اللي بهن ساخن الكيـف
خويهم مـا وجـس كـلام يحفـي
غير المزوح الطيبـه والسواليـف
عقـال وزن عقولهـم مـا يخفـي
ولاهم على الفاظي خفاف وملاقيف
العرض الشجري