قصيدة عن الاسهم

مناير · 23-03-06, 01:07 pm

بسم الله الرحمن الرحيم
قال الذي في سوق الاسهم تغربل ... إندق حاله قبل ماله يدبَّل
شاروا عليّه ناسِ غشْمٍ مهبّل ... دبّل قروشك عام سبعه وعشرين
قلت اصبرو قدمت قرضٍ على البنك ... أُما شرولي رزّ ولاشرو زنك
والله يسهّلها على اللي شكا الضنك ... دبّل قروشك عام سبعه وعشرين
لكن أخاف السوق ياخذ خشوعي ... ما غير افكّر بالسهم في ركوعي
هذا نزل نسبه وذا في طلوعي ... دبّل قروشك عام سبعه وعشرين
حتى المجالس هرجة الناس الاسهم ... ضاعت حلاة الكيف والكل مهتم
أحدٍ تشوف السن وأحدٍ مغلدم ... دبّل قروشك عام سبعه وعشرين
واحترت مدري ويش اباخذ واخلي ... سهم ٍمعلي بس الاخر مدلي
محدن يجيب العلم محدن يدلي ... دبّل قروشك عام سبعه وعشرين
قلت المشوره قالو السهم سابك ... إمية سهم فالمحفظه من حسابك
هذي عروس السوق حظك رسابك ... دبّل قروشك عام سبعه وعشرين
ولاّ المصافي ياعريب الجدودي ... سَهْمَ الملوك وكلِّ يومٍ يزودي
لكن حذاري عن سهمْها تنودي ... دبّل قروشك عام سبعه وعشرين
وش رايكم في سافكو ياجماعه ... قالو بنيّة سابك من الرضاعه
إغرف مادام ان السهم وسْط قاعه ... دبّل قروشك عام سبعه وعشرين
قلت الخزف مافيه شكٍّ ولاريب ... والعالم اِني صرت في صيدته ذيب
قالوا موفّق والخزف يخْلِف اِبطيب ... دبّل قروشك عام سبعه وعشرين
قلت اُم عشْرينٍ وخمسين رمزه ... بنتٍ تعلّق قلب من شاف غمْزه
الدرّه اللي ما تغشّاه همْزه ... دبّل قروشك عام سبعه وعشرين
قلت اِبو عشرينٍ وستين طيّب ... قالوا مضاربها كريمٍ حبيّب
قلت الهدف قالو هدفها قريّب ... دبّل قروشك عام سبعه وعشرين
قلت الدوائيّه عساها تعيضي ... تشفي حظيظٍٍ له زمانٍ مريضي
قالوا لي ابشر سَهْمها ما يغيضي ... دبّل قروشك عام سبعه وعشرين
قلت النصيحه وش تقولون بالغاز... قالوا مصيبٍ فيه وابرك من القاز
ياما تخفّى في عباته من الغاز ... دبّل قروشك عام سبعه وعشرين
والجبس قالو سهْم خمسة نجومي ... باكر تشوفه فوق الالفينِ يومي
ياسِعْدِ من يمسك عليه ويصومي ... دبّل قروشك عام سبعه وعشرين
قلت الغذائيه وقالوا شِريْكه ... إنتاجها بالسوق خُبزٍ وكيكه
قلت احسبنّه بالصناعي مَليكه ... دبّل قروشك عام سبعه وعشرين
قلت اِِبو ألفينٍ وميّه وعَشْرَه ... قالو كلبشاتٍ تضرّك بِقِشْرَه
واِنْ كان تدعي قول ربي تحشره ... دبّل قروشك عام سبعه وعشرين
قلت اُمِّ ألفينٍ وميّه وعشرين ... قالوا لقينا الناس عنها مِقفّين
قلت البلا ؛ قالو تبِذّ المساكين ... دبّل قروشك عام سبعه وعشرين
قلت اشْتري صدْقٍ وقالو تركّد ... نخاف بكره من خبرها تنكّد
اصبر يجيك العلم عنها موكّد ... دبّل قروشك عام سبعه وعشرين
قلت الحسا ياناس ولاّ زجاجي ... قالوا علامك كنِّ فيك ارتجاجي
الحر الاشقر ما يعوّد دجاجي ... دبّل قروشك عام سبعه وعشرين
قلت اُم ألفينٍ وميّه وستين ... قالوا مضاربها يجيب الطواعين
ذا له سنه تطلع وتنزل ريالين ... دبّل قروشك عام سبعه وعشرين
قلت اللجين وسيسكو ودّي اقحش ... كلٍّ يوصّي قالوا اُوصاتنا اِنحش
من طبِّ فيهن حشّو اِرْجِيْلِته حش ... دبّل قروشك عام سبعه وعشرين
قلت المشوره ياجماعه بفيبكو ... الظاهر اِنّه ماتقادي لسيسكو
قالوا لي اِنشد عن نَتَاجه سدفكو ... دبّل قروشك عام سبعه وعشرين
قلت الحقيقه جايزن لي أنابيب ... مدري خطا ياناس ولاّاِنِّي اِمصيب
ولاّ نما ، قالو ترى لهْ طلاليب ... دبّل قروشك عام سبعه وعشرين
والمعدنيّه ، قالو اُمَّ المسامير ... جنِّب عنَه ما من وراها تباشير
ياما لِحقْنا مِن سَهَمْها مخاسير ... دبّل قروشك عام سبعه وعشرين
شاوَرْتُهُم بالكيمو اُمَّ الدناميت ... امضاربه لا هوب حيٍّ ولا مِيت
واللي شراها دبّل من التناهيت ... دبّل قروشك عام سبعه وعشرين
والزامل ومِن بعده اللي تسمّى ... مجموعةٍ واللغز فيها مِعمّى
من فاز فيهن راس ماله تنمّى ... دبّل قروشك عام سبعه وعشرين
قلت آخذ الصحرا و قالوا ترفّق ... لاتخدعك بالسوق ناسٍ تطفّق
ما كل رجالٍ يحلّل يوفّق ... دبّل قروشك عام سبعه وعشرين
قلت المراعي له دعايه وراعي ... آخِر سَهَمْ لي بالمجال الصناعي
ما قيل رجلٍ طبِّ فيها وجاعي ... دبّل قروشك عام سبعه وعشرين
قلت السِمنت وقيل حاز العلامه ... واللي عطاك العلم حشّم مقامه
لاشك نجمه لامعٍ باليمامه ... دبّل قروشك عام سبعه وعشرين
قلت الفنادق قيل مثل البنادق ... قلت العقاريه وقالو خنادق
قلت آخذ البحري وقالو صنادق ... دبّل قروشك عام سبعه وعشرين
قلت اِبشروا بالحج جاك الجماعي ... بين المشاعر ياهل العرف ساعي
ويزور ساسكو بنت عمّه رضاعي ... دبّل قروشك عام سبعه وعشرين
قلت الضحيه والضحيه مواشي ... قالوا توقّع لاتجي للخشاشي
قلت الله اكبر فيهِن الرزق ماشي ... دبّل قروشك عام سبعه وعشرين
مكه وطيبه مع عسيرُ وتهامه ... كلٍّ عليهن عضّ بِسْرة اِبهامه
الرابح اللي حطِّهِن في حزامه ... دبّل قروشك عام سبعه وعشرين
قالوا مبرّد يالسنافي تكسِّب ... والصادرات الهقوه اِنّه تنسِّب
وابعد عن التعمير باكر تِحسِّب ... دبّل قروشك عام سبعه وعشرين
قلت آخذ الباحه وشمس وثماري ... ولاّفتيحي مع جرير التجاري
حيث اِن له فضل على كل قاري ... دبّل قروشك عام سبعه وعشرين
قالوا وعدهن عقب عيد الضحيّه ... اِن كان لك رُوحٍ مع الناس حيّه
قلت السنه هذي علينا رِخيّه ... دبّل قروشك عام سبعه وعشرين
قلت آخذ الكهرب وقالوا عقارب ... شطّر عنه كنّك عن الداب هارب
الناس تدري وين عذب المشارب ... دبّل قروشك عام سبعه وعشرين
قلت الزراعه وش تقولون فيها ... قيل الصراحه كل عينٍ عليها
واخصِهن بيشه ونادك تليها ... دبّل قروشك عام سبعه وعشرين
والباقيات الخير فيهِن تبَيَّن ... وان طعت شوري في سهمهِن تليَّن
حقَّ النظر فيهن شويُّ وتعيَّن ... دبّل قروشك عام سبعه وعشرين
والاتِّي الثنتينِ فيهن وصايا ... واشوف بعض الناس عنهن قِصايا
والله لاصبر لين احقق رِجايا ... دبّل قروشك عام سبعه وعشرين
قلت البنوك وقيل عنهن حرامي ... غير البلاد اللي تورَّع وشامي
والراجحي قبله رفيع المقامي ... دبّل قروشك عام سبعه وعشرين
ما باقي الاّ وحدةٍ ما ذكرته ... وسمه عليها بس انا احرقت كرته
واللي شرح لي عن نشاطه شكرته ... دبّل قروشك عام سبعه وعشرين
هذي معاناتي على طول الايام ... واقول ما حصّلت يا كود الاوهام
ليتي مشطِّر عن غرابيل الاسهام ... دبّل قروشك عام سبعه وعشرين
ومن قبل اختم القاف عندي نصيحه ... واخص به كل الوجيه الفليحه
المال عند الناس مثل المنيحه ... دبّل قروشك عام سبعه وعشرين
زك وتصدّق لاتطوِّف زكاتك ... ما تدري ان الموت بطْرف عباتك
ما قيل مالٍ زخرفوا به حصاتك ... دبّل قروشك عام سبعه وعشرين
والخاتمه صلّوا على سيد الابرار ... ما غرّد القمري وما طايرٍ طار
واعداد ما يلفي على البيت زوار ... دبَل صلاتك قبل عرض الموازين

منقول