أنا عزيز النفس

[طير الوسيطي]

000 أنا عزيز النفس 000



محتاج منك يا منى الروح ساعه *** وش معجلك ارحم بكاي وأنيني

الله وأكبر كيف تهوى القطاعه *** والله وأكبر كيف هانت سنيني

ما عاد لي بقلبك غلاة وشفاعه *** نسيتني بعقلك .. وقلبك نسيني

وصرت عندك واحد من الجماعه *** صرت اتجاهلني وعينك بعيني !!

أنا عزيز النفس وعندي قناعه *** من باعني بعته وابي من يبيني

وأبيك تدري صار عندي مناعه *** ما يهمني رحت .. أو رجعت وتبيني

ولّى زمن آمر .. وسمع .. وطاعه *** وانساه حب كان بينك وبيني

ومجنونك انساه وتناسا وداعه *** واذا رجعت لا تسأل الناس ويني

اللي نساني وصدق الإحساس باعه *** ما أظن يسوى أصدق إحساس فيني

إحساس حبي لا تحسبه بضاعه *** وخلك بشكك 00 وخلني في يقيني




وسلامتكم ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛