مليت أجامل وقت شح الوفاء فيه ،،،، والورد يذبل لانتهى ياسمينه
يا ناس لي خل نساني وانا ابيه ،،،، وحال الزمن من بين عيني وعينه
خلي تباعد وسط بقعاء خطاويه ،،،، دارت عليه ارحاه زينه وشينه
له مدةٍ مقفي وروحي تناديه ،،،، والقلب تسمع وسط قلبي رنينه
ناديت ياالغالي خذ القلب مابغيه ،،،، خذ قلبي بكفك وباقي سنينه
حالي له أصبح حال شيخ عى ايديه ،،،، سلاسل السجَّان وسط المدينه
تلعب على دموعه صغار تناديه ،،،، ياهيه وش بك صايرٍ ما تبينه؟
إن رحت ألاقي هم وان جيت ألاقيه ،،،، وهو يباريني بصمت وسكينه
مثل الشجر إليا انقطع عنه مسقيه ،،،، يبقى عوايد تحت رمله دفينه
ومثل الرضيع اليا انطفى قلب مرويه ،،،، تحرق له اخدوده مدامع ونينه
ومثل الخلوج اللي بكت دوم ترثيه ،،،، حواره اللي زاد فقده حنينه
من غيره بدنياي محدن يساويه ،،،، كنه قمر ماعاد تلقى وزينه
شفت المراجل جنب ظله تماشيه ،،،، شرق وشمال من وين ولى يجينه
مبطي فرشت القلب ورد ومراكيه ،،،، دقَّاته الخجلى بشوفة ضنينه
وسلمت له مفتاح عمري بياديه ،،،، يامر وينهى فدوه لحاجبينه
غيره تمنى عطف قلبي له اعطيه ،،،، ولاجله أزيد الصد عن عاذلينه
لانه مطر يروي ضما قلب مغليه ،،،، وقربه ربيع القلب وهو اكسجينه
قرم ليامن الضعيف نخى فيه ،،،، يفني حياته لين يندي جبينه
وانا نخيته نخوةٍ ليتها اتجيه ،،،، ليت الحمام يوصلنه ايدينه
الطف على قلبي إذا خاطرك فيه ،،،، ذرة حنان وعطف عطني يمينه
ريح ضميري وخل عنك التشاريه ،،،، واكسر يدين ابليس لا لا تعينه
أبي الزعل من ساحة الود نفنيه ،،،، وأبي الرضى من بيننا نستعينه
مليت أجامل وقت شح الوفاء فيه ،،،، والورد يذبل لانتهى ياسمينه
[size="5"]
هذا ما كتبت ،،،، آمل أن تحوز على إجاب كل من مر هذه الصفحة ،،،،
وأتمنى كل من له تعليق على ماطرحت تنبيهي على ذاك سواء في الردود أو الخاص ،،، ممتن للجميع وشاكر لك من رش عطر مروره وزهر حروفه ،،،،،،،
تحيتي ،، : فهد عبدالله الأحمد
،،،
14- 1 - 1432 هـ
[/size
]
دامه يباريك بصمت اذن هو موجود وهذا كفيل ان تخلق العذر ..!
العرض العادي
