ماعلى السجات شرهه في عريبات السجايا
وماعلى القلب المولّع من وزى القلب اللئيم
كل عين ٍ من عيون الشعر تفخر بالوصايا
وكل قطرة دم فيني تفتدي أرض القصيـم
كيف لاصارت بريده دون غيـره منتهايـا
كيف اناظرها بعيـن ٍ ماتناظـر للحريـم
ديرتي عذراء ولكن أنجبت ستر الصبايـا
ماتجيب النص لفّـه ماتجيـب إلا زعيـم
راع شكلي من فروخ عقيل لو تمسك معايا
كان اعلم كيف جسم ناحل عقله سليم
اشهد ان الحب نبتة وان تلوت في الحشايا
تلمس الحب الحقيقي دام نبته بالصميم
حبها ما هو بدائي حبها حد النهايا
ان نزل ينزل بقلبي وان رقى حب عظيم
ديرتي وان قلت ديرة به تحليت المزايا
للحظارة والتقدم خط واضح مستقيم
تحت راية من يعقد الراي من فوق النوايا
الفهد رمز العروبة حاكم الدار الحكيم
به رجال ما تعرف الهرج وعلوم الحكايا
فعلهم سجل حظوره بالجزيرة من قديم
بالكرم تاصل حدود الغيم من زود العطايا
وضيفهم ما لد وجهه ينتظر فعل وخيم
اتعبوا هندي سيف واتعبو شد المطايا
وريحوا بالهيل ضيف وسامحوا زلة غشيم
بارضهاحار الخزامه والنفل وسط الشغايا
كلها من فضل رب يحي النبت الهشيم
بأرضها ما ادري بقلبي هو معاها او معايا
بأرضها طاحت سيوف وبارضها عز العديم
علموها كان ما رضيت وكفاها غلايا
تصبر شوي وتشوف ان كانها جابت زعيم
للمبدع ومن أثار الصخب من جديد كما هي عادته في كل حين وحين : الشاعر
ياسر التويجري
العرض العادي
