يا نكهة الصبح طل الصبح بانفاسه
وانا اتنفس غيابك ويتنفسني
غريب .. فيني بلد يبكي على ناسه
ويطيح دمعه على اسواره ويحرسني
يصبني بعض هذا الحزن في كاسه
يسكر على ضيقتي كنّه يوّنسني
يرمقني بعين حرص إن مرّه نعاسه
يخاف من فرحةٍ تغلط ! وتلمسني
والصبر حطّاب .. لكن .. منكسر فاسه
واحلامي ان جيت اوّقفها ... تجلّسني
وينك؟ .. بدا الخوف يقرع حولي اجراسه
والحيرة ف دربها المجهول تغرسني
محتاج لك .. ليت للضيقات كرّاسه
كان اكتب الضيقة اللي دوم تخرسني