معذور ياوجهن عشقته ولاتبت
عن عشقي المبطي ولاني بتايب
سهمك جرحني بالحنايا ولاطبت
من تجرحه يالترف ماهو بطايب
الكون شمسه غايبه وانت ماغبت
تسكن بنور العين لو كنت غايب
لوجبت من كل التعابير ماجبت
عن وصفك الفتان باصير هايب
نبت ورود الزين من طلتك نبت
واصير من عطر الرياحين ذايب
لاسلهمت نجلك رمتني ورهبت
رميت نفسي بين شقر الذوايب
اهيم واظيع بالاثنين والسبت
مااميز الدربين مخطي وصايب
ياواحتي عن لفحة الهم والكبت
في وارف ظلالك لقيت العجايب
اوجزت لك عن بعض الاحوال مااسهبت
تدري وانا ادري في شعور الحبايب
قل لي متى اللقيا تراني تعذبت
سهران طول الليل وانت السبايب