يتعدل القاف لو مـا وده .. يتعـدل
يكفيني إني أسطّر صـادق احساسـي
أفضفض جروح تنكى قبل مـا تدمـل
وابعثر أوهام دارت في رحـى راسـي
وأشرب من أقداح فكري لين ما أثمـل
لا صار خمري خيالي ودفتري كاسـي
أخذ من الوقت ذكرى وحلم مستقبـل
للحاضر اللي توسد سطـر قرطاسـي
كل مره أكتب عن العشـاق واتخيّـل
حالي متيـم سعيـد ومغـرم يقاسـي
واليوم أبكتب عن اللي صابني في مقتل
وأحتلني بالرضى من ساسي لساسـي
واساير جنون عاشق مـا يبـي يعقـل
يموت في شوفتـي ويـذوب بانفاسـي
لا غبت عنه يطـوف بعالمـي يسـأل
ولا من لقاني يحـط اللـوم ويواسـي
مجنون في العشق ومعدن غيرتـه أهبـل
يحب ضحكي ويعشق صرَّة أضراسـي
ساعة أشوفه طفل مهـووس ومدلـل
وساعة أشوفه رصين وكالجبل راسـي
وفي كل الأحوال أشوفه أجمل وأجمـل
يا علّني ما انحرم مـن رقـة القاسـي
ما أظن شعر(ن) كتبته في حضرته يكمل
وأخاف من زود حسنه أعلن افلاسـي