وين أولِّـي ..؟
ما بقى لي غير وجهك
جيت ألوذ بنور وجهك
من عبوس أهل الزمان..!
جيت أقول إني تعبت من السفر
بين الصور !
وإني ضجرت من الضجر
ومعانق الجدران ..
وجيت أقول إني هزمني البرد
وإن الوجد كايد ، والأمل خوّان!
وجيت أقدم لك قصايد ورد لكن
نصفها حزنه يفوح ..
ونصفها ذبلان ..!
جيت ابنسى .. .. صدقيني ما بقى
فيني جلد ..
ومحد من الهم خالي ..
وكل خالي ما خلا من ها النكد!
والبلد/ يا كثر ما فيها من أحزان
اقصري صوت (المسجِّل) ..
سكتيه اللي قضى عمره يدّجل
ضحكتك ..!
ياني شغوف لجلجلتها ..جلجليها ..
واتركي الدنيا تجلل
واعزمي الفرحة
وخليها تعجّل بالوصول
الأغاني كذبة إنسان يعاني
وشيء ثاني
لا تظنيها مواني
ولا تعديها ولا ربع الحلول
والطرب ، أنتي طرب كلك
دخيلك موّجي ظلك
وقولي كيف أفلك ..
وإن جمعتك .. علميني وش أقول؟
