الكلام كرسي خشب
إجلسي فـ الكرسي هذا
أو هذا
ولا اقول لك..
يمكن افضل
لو عطيتي الشمس ظهرك!
إنتي دايم عادتك..
كل ما بديت وياك حديث
عطيتي للشمس ظهرك
واختفى صوتي بظلامك!
وش تبين أطلب لك: عصير
ولا قهوه..
ولا يكفي دمعتي..ومالح ملامك؟!
لا.. قهوه..
قهوه أحسن
عندهم قهوه لذيذه
تشبه البن بعيونك
وفيها من ريحة كلامك
قهوه وسط
توقظ احساس الصباح بمهجتك
وتصحي في صدرك غمامك
جربيها..
لو سمحت: اثنين قهوه..
وين كنا؟!
وين وصلنا بالسوالف؟!
إيه.. ذكرت..
كنت اقولك ليش ذبلنا..
ليش صارت.. يابسه فينا العواطف؟!
ليش قلبك منطفي..؟!
وليش قلبي..
صار مدينه موحشه..
ليل.. وعواصف؟!
ليش ايدينك بارده
وصبحي بين ايديني خايف؟!
ليش صرتي.. وانا يمك..
ما تشوفيني بقربك
وانا في حضرة نهارك.. ماني شايف؟!
ليش...........
أنا آسف، إشربي القهوه قبل تبرد..
ويطغى مرّها فوق الشفايف..
..................
....................
وين كنا؟!
إيه.. ذكرت..
كنت اقول........
ولاّ خلّك من كلامي..
الكلام كرسي خشب!!
مايحضنك في حنان
أو ينسّيك التعب..
الكلام في أوّله.. بس أوّله..
عشب
وفـ الآخر لهب..
الكلام في أوله.. موال يطرب
ومن قبل ما تحس.. تنزف..
وينتشي جرحك طرب
الكلام .. كرسي خشب!
وش فايدة كثر الكلام..
قهوه احسن
إشربي القهوه.. بردت..
ولهفة الحب بردت..
واللقا.. وباقي العتب
إشربي القهوه..
أظن
موعد الفرقا قرب!
...... مسفر الدوسري...