يا للي وراك ظلوع و من دونك ظلوع
متمركز(ن) بــالصّدر كنّك ... وداعـه
ودّي أناقش مع سعادتك .. موضوع
و أبغيك تعطيني .. فقط نص ساعـه
صار إتصالك فيّ من إسبوع لإسبوع
حرّمت وصلك .. و إستبحت القطاعه
و تغيّرت فيك إنطباعات .. و طبـوع
و تجدّدت في نظرتك لي ... قناعـه
عيّشتني في كل .. مرغـوب ممنـوع
و حرمتني من كل .. سمعاً و طاعـه
و علّمتني إن الجفى لـه .. كـذا نـوع
و إن الهجر بالـذّات .. أكثـر بشاعـه
أوّل .. تجي يمّي من الشّـوق مدفـوع
و مَحلى من المشتاق .. غير إندفاعـه
إن غبت عنك .. تصيح و دموعك دموع
ما فيك للصّبر الجميل .. إستطاعه
مجنون فيني و " القلم " عنك مرفوع
همّك رضاي و مجتهد .. بــإتباعـه
و اليوم لا .. حبل الرجى فيك مقطوع
مشيت درب اللّفلفـه .. و اللّكاعـه
و اللّي تسبّب في تغيّرك .. مجمـوع
عدم ثقة فينـي .. و بـث الإذاعـه
خل الكلام اللّي من الكذب .. مصنوع
و إخذ الكلام اللّـي تـذوق إنتفاعـه
ما كل هرج يمر أذانيك .. مسموع
أربع أرباع اللّـي يمـرّك .. إشاعـه
لو الحكي بفلوس أو .. شيك مدفوع
يمديك ضامي للكلام .. و سماعـه
يا شينها لا جاتك همومك .. جموع
و لا عاد عندك للمواجه .. شجاعه
و يا شينها لو كان لك حق مشـروع
و أقربهم لقلبك سعى فـي ضياعـه
هذا الكلام الليّ من القلب .. مطبوع
إقرأ كلام القلب و شـوف إنطباعـه
و إسمع .. ترى الجوّال ماهوب مقطوع
شغّال .. له أربـع وعشريـن .. ساعـه