مثل ذيك السنه وأكثر أنـادي والنِـداء مـا يفيـد
بـقلبي شوق لو حسّيت بـه .. يقلـب موازينـك
أردّد " عيدك مبارك " عسى كل عام وإنت سعيـد
وقلبي يرتجي وصلـك .. ياغالـي وفاقـدٍ زينـك
حبيبي هالزمن يضحك على جرحـي وإنـت بعيـد
وجيت من الشتات أسأل بعد جرح الزمن .. وينك ؟
أنا ما جا علـى بالـي غيابـك إنـت بـالتحديـد
عنادك ليش ضيَّعني ؟ ووقـف مابينـي وبينـك !
لك الله كل ما أضحك ألاحـظ هـالجـروح تزيـد
تصدِّق ضحكتي صعبه علـي وسهلـه بـإيدينـك
أقول إن الأمل باكر ويجي بكـره بجـرح جديـد !
ورغم كل السنين اللي مضت لي .. تكرم سنينـك
أنا ما جيت أبي منِّك بعد جرحـك .. تفـك القيـد
أبيك تحس في قلبٍ .. رفـض ينسـاك ويدينـك !
إذا يرضيك تستقبل بدوني فرحتـك بـ[ العيـد ] ؟
شسوي بقلب متعوِّد يشوف العيـد فـي عينـك !
إذا عادي الزمن يضحك على جرحي وإنت بعيـد ؟
على هالبرود اللي تعيشه ماأقـول الا الله يعينـك