جلست اسولف مع احد الأصدقاء واستمرينا بالسواليف ويوم خلصنا وجت المشيه قلت الحمدلله والشكر
تقولون ليش قلت الحمدلله والشكر قلت كذا لاني احمد ربي على نعمة العقل
وانا اسولف مع صديقي رحت فيه لاكثر من موضوع ولايستحقر نفسه بكل موضوع يعطي رايه
رحت فيه للسيارات تكلم عنهن وكنه هو اللي صانعهن
ورحت فيه للزواج ومشاكل الزوجات وعطاني رايه كنه متزوج اربع حريم مع انه عزوبي
ورحت فيه للأراضي والبناء ولفيت يمين تكلمت عن السياسه وتكلمت عن الشعر وتكلمت عن الطب وتكلمت عن الطيارات
وبكل المواضيع هذي عطاني رايه
حتى يوم تكلمت عن الفتاوي تكلم معي ومن ضمن الكلام جبت طاري الشيخ ابن عثمين(الله يرحمه) وراي الشيخ بتحريم التبرع بالاعضاء قال لايهمك الشيخ ترا الشيخ متشدد.. وبداء يعطيني فتاوي اثر صديقي
شيخ وأنا ماادري ؟؟
المهم انا بالقصد اطلع من موضوع لموضوع ثاني ابشوف وش اخرتها معه لقيت بالاخر انه مسوي نفسه عارف كل شي ولايستحقر نفسه ولاعنده استعداد يقول مااعرف
هذا حال اكثر الناس مو صديقي بس .. الناس الحين مستحيل تحصل واحد يقول ما اعرف لازم يعطي رايه ولو كان خطاء
انتم ملاحظين الشي هذا ؟؟؟؟؟؟؟؟؟
ترا مو عيب إذا قال الشخص والله ماادري أو مااعرف العيب انك تتكلم بموضوع وأنت ماتعرف عنه شي
ابداء الراي مطلوب بس باللي تعرفه فقط واللي ماتعرفه اتركه لناس تعرف الشي هذا
وأتمنى إنكم مو من العينات هذي
وسلامتكم