%% الساعه 10:45 فليل %%
طلت ع الساعه و تنهدت بضيج ... طول اليوم و هي تترياه ايي و عيزت من كثر ما تتصل و هو ما يرد ... ظهرت من حجرتها و سارت تيلس في الصاله ... و هناك حصلت مريم اللي كانت تطالع التلفزيون لكن شكلها يقول انها مب ويا اللي في التلفزيون ابد لدرجة انها ما انتبهت لوجود شمسه وياها ...
شمسه: مريم؟؟
مريم انتبهت من سرحانها: هلا امايه ... بغيتي شي؟؟
شمسه: اخوج ما يا؟؟
مريم: لا ... ولا واحد فيهم يا لا سالم ولا خالد ...
شمسه: و خواتج وينهن؟؟
مريم: نوف راقده و يزوي ف حجرتها من دشت عقب الفطور ما طلعت منها ...
شمسه تنهدت بضيج: لا حول ولا قوة الا بالله ...
في هاللحظه لفت انتباه شمسه صوت الباب و هو ينفتح ...
خالد: السلام عليكم ...
شمسه+مريم: و عليكم السلام ...
شمسه: الحمدلله ع السلامه ... وين اللي كان بيرد البيت اليوم؟؟
خالد يا صوبها حبها ع راسها يلس عدالها: اسمحيلي فديتج انشغلت شوي ف الشركه و عقب سرت عند الربع ...
شمسه: و انته ربعك كل الايام عندهم مثل بعض ... منو هاللي متفيج يسيّر ع الربع نهار رمضان؟؟
خالد: ليش؟؟ فيها شي؟؟ شباب فاضين ماعندهم لا شغله ولا مشغله شو تبينهم يسوون؟؟
شمسه: تعبدو و جابلو ربكم بدال هاليلسات اللي ما منها فايده ...
خالد رد حبها ع راسها: ولا تزعلين الغاليه ... هاي اخر مره و ما بعيدها مره ثانيه ...
شمسه: يا مكرك ... انته باجر بتعرس و بيصير عندك حرمه و عيال شو بتسوي عقب؟؟
خالد ابتسم بخبث: يصير خير الين هاك الوقت ... و على طاري العرس تراني لغيت حجز القاعه ...
ساد الصمت في هاللحظه و بانت ملامح الاندهاش على ويه شمسه و مريم اللي انصدمن من اللي قاله خالد ... اما خالد ابتسم لهم ولا جنه قايل شي جايد ... لكن اختفت هالابتسامه فجأه و هو يشوف تغير تعابير ويه شمسه و حل الغيض مكان الاستغراب عليه ...
شمسه بانفعال: انته شو ناوي تخبلني؟؟ كفايه عليه اخوك و الحين انته ياي تقول لي لغيت الحجر؟؟ منو امرك و قال اتصرف ع كيفك هاه؟؟
خالد بلا مبالاه: الصراحه بعدني مب مستعد للعرس هذي كل السالفه ...
شمسه بقهر: حسبي الله على ابليسك من ولد ... شو تباني اقول لخالتك الحين؟؟ انته ف صوب و سالم ف صوب و مب ناقص الا انتي يا مريوم ...
في هاللحظه دش عليهم سالم ياي من برع ...
سالم: شو بلاها بعد مريوم؟؟
شمسه: و انته توك تشرف؟؟ تعال شوف اخوك شو يقول؟؟
سالم: شو السالفه؟؟
خالد: انا حر كيفي اسوي اللي اسويه و محد له خص فيه ...
سالم: و شو مسوي حضرتك؟؟
مريم: سار لغى حجز القاعه حق عرسه و مستانس الاخ ...
خالد: لو سمحتي آنسه مريم لا تدخلين في شي ما يخصج ...
شمسه: عارف بسواد ويهك عشان جي ما تباها ترمس ... "و التفتت لسالم" و انته اشحقه صاخ؟؟ عايبنك اللي سواه اخوك؟؟
سالم: امايه خالد مب ياهل و انا اشوف انه لو يأجل العرس احسن ...
شمسه بغيض: يعني انته وياه في اللي سواه؟؟
سالم: هيه نعم وياه ... خله يتفرغ لكم و لمشاكلكم لاني قررت اظهر من البيت ...
!!
*~*~*~~*~*~*
%% الاحد 7:56 الصبح %%
في هاليوم بالذات كان حاس بحماس غير طبيعي للدوام ... من امس و هو مب قادر يتريا متى تحين هاللحظه من اليوم ... حتى من زود الوناسه وصل الدوام من وقت على غير العاده ... بركن سيارته و نزل منها و بخطوات واثقه توجه صوب الشركه ... كل ما قرب من البوابه يزيد الحماس اللي حاس فيه من الوناسه لانه اللحظه اللي كان يترياها من زمان اخيراً حانت و بعد صبر طويل!!
اول ما دش الشركه اسرع بخطواته و هو متوجه لمكتب المحامي اللي كان توه واصل و متوجه لنفس المكان ... و فؤاد اول ما شافه سار صوبه و تم يمشي وياه ...
فؤاد و الابتسامه شاقه الويه: صباح الخير استاز ...
المحامي عبيد: صباح النور و السرور ... شحالك فؤاد؟؟
فؤاد: منيح كتير كتيييير منيح ...
المحامي عبيد: ههههه ... هاه بشر فيه اخبار عن .....
فؤاد ارتسمت ع ويهه ابتسامه عريضه: عندي لك اخبار من اللي بيحبهن ألبك ...
المحامي عبيد: دام السالفه جي ندش المكتب و خبرني عن كل شي ...
فؤاد: ولا يهمك استاز ... بس اهم شي عمتي مدام ناهد الله يطول بعمرا و يخليها ما تنسى اللي وعدتني اياه ...
المحامي عبيد: لا تخاف يا فؤاد حقك محفوظ ... لا تنسى نحن استخدمناك بس عشان تستدرج منصور لا اكثر ولا اقل ...
فؤاد: الله يخليكن يا رب ...
*~*~*~~*~*~*
%% الساعه 10:10 الصبح %%
من ليلة امس و الاخبار السعيده تتهافت عليه و اللي كانت بدايتها سكوت اهله عن سالفة تأجيل العرس اللي كان متوقع انها تثير ازمه الين خبر طلوع سالم من البيت و الحين اكتملت هالاخبار بهالاتصال اللي كان يترياه على احر من اليمر ...
ظهر من مكتب المدير العام و اللي هو مكتبه في الوقت الحالي و اللي بيكون مكتبه الدايم في المستقبل القريب جداً ... حس بالحماس يسري في جسمه و هو يتخيل هالشركه تكون اخيراً ملك له بروحه ...
ركب سيارته و بأقصى سرعه عنده توجه للمكان اللي بيحقق له حلمه اخيراً ... كلها دقايق الا و هو داخل ع الموظف اللي تعامل وياه امس و اول ما دش عليه ارتسمت ع ويهه ابتسامة خبث صفرا ...
خالد: السلام عليكم ...
الموظف: و عليكم السلام و الرحمه هلا استاذ خالد تفضل ...
خالد: دام فضلك ... هاه بشر شو سويت؟؟
الموظف ابتسم: لا تخاف ولا تحاتي الامور كلها مشت تمام التمام و الاوراق دخلتها في الكمبيوتر و طرشتها الارشيف ... يعني بالمختصر المفيد مبروك عيك الشركه يا استاذ خالد ... "و تطاول ملف من ع الطاوله" و هاي صور عن الاوراق احتفظ فيهم عندك ...
خالد اتسعت ابتسامته: مشكور و ما تقصر ...
الموظف: بس هاه ... تراني ما نسيت الوعد و اتمنى انك تكون ما نسيته بعد ...
خالد: افا عليك هذا دين ف رقبتي و ما بنساه ... و بيني و بينك انا يمكن احتاجك ف شغله ثانيه بما انك اثبت انك في محل الثقه اللي عطيتك اياها ...
الموظف "افا عليك انته بس اسوي اي شي عشان الفلوس": و انا حاضر في الخدمه ... اسوي اي شي عشان خاطر الناس الطيبين ...
خالد: تسلم ... "و نش من مكانه" عيل اترخص منك الحين ... و ان شاء الله حقك بيوصلك الليله ...
الموظف: مشكور و ما تقصر ...
خالد: العفو ... يالله فمان الله ...
الموظف: فمان الكريم ...
تم الموظف يتبع خالد بنظراته و هو يبتعد عنه ... و ارتسمت ابتسامه عريضه ع ويهه من الوناسه على الحظ اللي بدا يبتسمله اخيراً من عقب ما كان يجني ارباحه بصعوبه ...
"منو قدك يا سعيد ... طحت على كنز و انته ما تدري ... عليك حظ يكسر الصخر عندك امول و الحين ولد خالة امول شو تبا اكثر من جي بعد"!!
*~*~*~~*~*~*