[صاحي و رايق]

%% الساعه 10:35 الصبح %%

في هالوقت في الكليه ...

الريم و هي تلوح لجليثم: وين وصلتي؟؟
جليثم: هاه؟؟ وياج ...
الريم: ماظني ... من الصبح سرحانه شو اللي شاغل بالج؟؟
جليثم تنهدت: مادري ... قلبي منقبض حاسه انه شي بيصير ...
الريم: قلتلج لا تفكرين ف هالسالفه وايد ... لين متى بتمين خايفه و تحاتين؟؟ و بعدين لو يروم يسوي شي جان سوا من زمان ما بيتريا يومين ثلاث لين تبرد السالفه ...
جليثم: مادري يا الريم مرات اقول ف خاطري انه مستحيل يسوي شي ... بس بعد لا تستبعدين اي شي ايي من حمدان دامه ويا هند دوم ... اكيد ما بتسكتله و عادي اتم تحن عليه الين يريحها و يسوي اللي هي تباه ...
الريم: نحن بعد ما بنسكت ... اصلاً عمي ما بيخليه يسوي اللي يباه عشان وحده ماعندها سالفه ...
جليثم تنهدت بضيج: الله يستر بس ...

تمن الريم و جليثم يتمشن و هن صاخات و كل وحده عندها شي شاغل تفكيرها ... و فجأه ...

......: الـــريم!!

التفتت الريم صوب مصدر الصوت و هي مستغربه ... شكت انه هالصوت مب غريب عليها و يوم صدت و شافتها تأكدت شكوكها الشي اللي خلاها تستغرب اكثر من وجودها في الكليه ... و ف نفس الوقت حست بالاشمئزاز منها خاصه انها ذكرتها بكل اللي صار بين محمد و اليازيه بسبة اخوها منصور ...

اما في الناحيه الثانيه ... سارت امل صوب جليثم و الريم عقب ما لمحت الريم من بعيد و زقرتها اما ميثا تمت تترياها بعيد شوي عنهم ... يت امل صوبهم و هي مبتسمه و تضحك على الريم اللي كانت متفاجأه بوجودهم في الكليه ... توايهت امل ويا جليثم و الريم ...

الريم: شو يايبنكم هني؟؟ ماحيد عندنا معرض ولا بازار عشان تون؟؟
امل: لا طال عمرج يايين عشان الارشاد ... تعرفين نحن ثانويه عامه لازم يرشدونا من الحين عشان مستقبلنا الباهر ...
الكل: هههههههههه ...
الريم: دام يايين عشان الارشاد ليش يالسه اتمشين هني؟؟ احيد المسرح هناك ...
امل الابتسامه شاقه الحلج: عاد تعرفين بنت خالتج لازم تشرد شوي ...
الريم: الله يقطع ابليسج ما تيوزين ...
امل: شو نسوي بعد هذا حال الدنيا ...
الريم: حال الدنيا؟؟ قولي حالج انتي مب الدنيا ...
امل: يالله عاد كله واحد ... المهم اسوم الهبله وين؟؟
الريم: مادري عنها ... يا عندها كلاس ولا تحصلينها اتمشى ...
امل: ماعليه انا اراويها بس خليني اشوفها ...
الريم: يالله ماشي تشوفينها و تشوفج يالله ع المسرح جدامي ...
امل و هي تلوح لميثا اللي تأشرلها من بعيد: ههههههههه ... حلوه منج خليني اسير اشوف هالهبله الثانيه شو تبا ...
الريم: خلاص برايج ...
امل: يالله سي يوو ...

روحت امل عنهم و سارت ويا ميثا ... لاحظت الريم عيون جليثم اللي كانت تتبع امل و الابتسامه اللي كانت مرتسمه ع ويهها من اول ما يت امل صوبهن الين الحين ... الشي اللي اثار استغرابها ...

الريم: لاااااه انتي شي فيج اليوم ... لازم تسرحين من اصخ عنج؟؟
جليثم: لا تخافين ما افكر بحمدان ولا هندوه ...
الريم غمزت لجليثم: ادري ... شو ياج ع بنت خالتي؟؟
جليثم اتسعت ابتسامتها: ولا شي ... بس تذكرت سالفه ...
الريم: افااااا ... و شو هالسالفه اللي داستنها عني هاه؟؟ و انا اقول بنت عمي ربيعتي الروح بالروح و بحسبة اختي جي تخشين عني؟؟
جليثم: هههههههه ... لانه السالفه ما تخصني انا بالضبط ... بتعرفينها عقب بس اتريي شوي ...
الريم: بعد اتريا؟؟ ماعليه هالمره مقبوله منج بس عشان ما بقا شي على وقت الكلاس ... بس ف البريك الثاني بتخبريني عن كل شي ...
جليثم: ههههههههه ... ان شاء الله بس الحين نشي خلينا نسير الكلاس و يصير خير لين عقب ...
الريم: امرنا لله شو نسوي بعد ... يالله سرينا ...

*~*~*~~*~*~*

%% الساعه 12:15 الظهر %%

و هي تتمشى ويا ربيعتها صوب المسرح لفت انتباهها الحشد الكبير من بنات الثانويه اللي كانو طالعين من المسرح ... نقعت عليهن من الضحك و هي تشوف البنات كل مجموعه سايره ف صوب و مطنشين الابلوات اللي انبحت اصواتهن من كثر ما يزعجن و البنات مطنشات ...

اسما: هههه والله اسميهن بنات المدارس جنقل جنهم مب شايفين خير ...
هند بضيج: فاضيه انتي وياهن ... الحين انا وين و انتي وين؟؟
اسما: يا ماما انسي ولا تضايجين عمرج وايد ... صدقيني اخرتها غصبن عنه بيبرد فوادج فيها بس انتي صبري عليه شوي ...
هند: انا خلاص ما عاد فيه صبر ... احس اني بنفجر ... كله منج و من خطتج الفاشله ...
اسما: يالله عاد خلي عنج السوالف ... صدقيني واحد مثل حمدان ما ينفع وياه الا هالتصرف ... و انتي بنفسج عارفه هالشي ... ولا تبين اذكرج شو سوا عقب ما خطبوله هاي اللي ما تسمى ...
هند: افففففف بس عاد اسـ ...

و قبل لا تكمل هند كلامها سكتت من الزيغه عقب ما شهقت اسما فجأه ...

اسما بصوت عالي: امووووووووول!!

امل اللي كانت تتمشى ويا ميثا شوي بعيد عن قوم اسما تمت تتلفت يمين يسار و هي تدور اللي زقرتها الين طاحت عيونها على اسما و سارت صوبها ...

امل: هلا والله عاش من شاف هالويه ... وينج انتي من الصبح ادورج؟؟
اسما: و انتي يايبينج تحوطين ولا عشان الارشاد؟؟
امل: تبيني انا ايلس عشان ارشادهم السخيف!! حبيبتي انا ماقدر اعيش بدون شردات ...
اسما: هههههههه ... عارفينج ...
امل و عيونها على هند: بلاها الحلوه مبوزه؟؟
هند ابتسمت من ورى خاطرها: لا ما فيه شي ...
اسما: خليها عنج هاي سالفتها سالفه ... الا تعالي يا السباله جيه ما خبرتيني عن اللي سواه اخوج و بأي حق ساير يرمس و يخربط على قوم خالوه؟؟
امل: انا لو اعرف شو السالفه زين ... يقول لج هاك اليوم سرت بيت قوم خالوه و طردني سلوم طرده معتبره الله لا يراويج ...
اسما خزتها بنظرة شك: علينا هالرمسه؟؟ احيدج كاتمة اسرار اخوج شو اللي خلاه يخش عنج هالسالفه ...
امل: والله ما قال لي شو استوى ... روحي ابا اعرف بس كيف ماعندي حد يخبرني ...
اسما بقهر: خرب علينا عيشتنا الله يخرب يته ... اخخخخ بس لو اشوفه الحين جدامي بجتله هالمنصوروه ...
امل: هههههه ... لهالدرجه يعني مسوي شي خطير؟؟
اسما بغيض: هيه انتي اضحكي شو وراج ... مب انتي اللي تأذيتي من هالسالفه ...
امل: ابويه لا تيلسين ترمسين بالالغاز قوليلي السالفه بالتفصيل ...
اسما: انزين تعالي بنسير مكان هادي و بخبرج كل شي ... بس هاه انتي بعد تخبريني باللي عندج لاني لين الحين مب فاهمه السالفه عدل ...
امل بحماس: انزين يالله عيل شو اتريين ...

*~*~*~~*~*~*