الجزء [7] من قصة أيام فـرحي .. و حـزني .. و معاناتي
*~*~*~ الجزء السابع ~*~*~*
*~*~ الفصل الأول ~*~*
%% الاربعا 8:45 فليل %%
" انا وين؟؟ ولدي وين؟؟ ودوني لولدي الله يخليكم "
نشت ليلى مفزوعه و قلبها منقبض من اللي قالها اياه المتصل ...
سعود: ليلى هدي اعصابج ... ناصر بخير بس انتي ريحي نفسج ...
ليلى و هي تحاول تنش من ع الشبريه: خلوني اسيرله ...
سعود و هو يحاول يمنعها: الله يهداج وين بتسيريله و انتي في هالحاله؟؟ صدقيني لا حالتج تسمح ولا حالته تسمح ...
ليلى: لا بارك الله فيهم جانهم بغو يذبحون ولدي ...
سعود: استهدي بالله يا ليلى ... مب زين تدعين ع الناس ...
ليلى: عيل يسوون ف ولدي كل هذا و اسكت؟؟
سعود: احمدي ربج انه ما صار اللي اخس عن جي ...
ليلى تنهدت بضيج: الحمدلله على كل حال ... و ان شاء الله يقوم بالسلامه ...
في هاللحظه دشن امل و عفرا ... عفرا ما صدقت يوم جافت امها نشت ربعت صوبها و لوت عليها ... اما امل تمت واقفه عند الباب متردده تسير صوبها ولا لاء ... و بالآخر فضلت تيلس شوي بعيد ...
عفرا و هي لاويه ع ليلى: ما تشوفين شر يامايه ...
ليلى: الشر ما اييج يا بنتي ... ناصر وين؟؟ سرتوله؟؟
عفرا: تونا يايين من عنده ... لا تخافين هو بخير الحين و كلها كمن يوم و يظهر ...
ليلى: انزين هو وين الحين ودوني صوبه ...
عفرا: لا خلج انتي الحين تعبانه و الدكتور قال خلوها ترتاح ...
سعود: جفتي ... حتى بنتج تخاف على صحتج اكثر منج ...
ليلى ابتسمت و ملامح التعب باينه ع ويهها: فديت روحها منو لي غيرها هالبنت ...
من قالت ليلى هالرمسه حست امل انه هاي نغزه لها فطلعت من الغرفه ...
ليلى بقلق: عفرا امايه طالعي اختج وين سارت ...
عفرا: ان شاء الله ...
ظهرت عفرا تزقر امل و تمت فتره برع ...
سعود عقب لحظات صمت: ليلى ...
ليلى بقلق: آمر ...
سعود: ناصر من كم يوم ما بات في البيت؟؟
ليلى: و انته اشدراك؟؟
سعود: عفرا قالتلي عن كل شي ...
ليلى الدموع بدت تغمر عيونها: كله من ابوه ... هالسبب في كل اللي صار و مستحيل اسامحه ع اللي صار ... انا احاول اكسر حاجز الصمت بيني و بين عيالي و يا هو و خرب كل شي ... حتى امول صارت ما تحشمني ... جفت عاد؟؟
سعود: ما عليج منه انا برمسه ... بس خافو الله ف عيالكم ...
ليلى: وين بتحصله عشان ترمسه؟؟ وجوده مثل عدمه ... البيت ما يطبه الا عشان ايمع ثيابه و يسير ...
سعود: الله يهديه ان شاء الله ... و انا اوعدج انه بيصير احسن عن قبل ...
و في هاللحظه دشن امل و عفرا ...
ليلى: ليش تأخرتو؟؟
عفرا: من الصبح احاول اقنعها تدش ما تطيع ...
سعود: ليش يا امل شو بلاج على امج؟؟
امل بارتباك: ما فيه شي ...
سعود: بس اللي سمعته غير ...
نزلت امل راسها من المستحى ما رامت تحط عينها بعين خالها ... ليلى من جافت الوضع جي اشرت لسعود بعيونها انه يأجل الرمسه لبعدين ...
سعود: يالله امل يالله عفرا خلص وقت الزياره ...
ليلى: وين تسيرون و تخلوني بروحي؟؟
سعود: الدكتور قال لازم ترقدين عندهم اليوم الين يطمنون عليج و بتظهرين ...
ليلى: انا ما فيه الا العافيه ... ما يحتاي ارقد عندهم ...
سعود: لا يحتاي ... الضغط عندج مرتفع و لازم ترتاحين شوي و بناتج بيتمن عندنا ما بنسرقهن ...
ليلى ابتسمت ع الخفيف: برايكم ...
سعود: يالله مع السلامه ...
ليلى: حافظنكم الرب ...
سلمن امل و عفرا على امهن و سارن ويا سعود ...
*~*~*~~*~*~*
%% الخميس 1:00 الظهر %%
في بيت بو سالم ...
شمسه: واعليه عليك يا ولد اختيه ... ما تستاهل اللي ياك ... " و التفتت صوب خالد " لا يكون اجوفك مره ثانيه ويا هاللي يسمونه عمر ...
خالد: عقب اللي سواه بعد تبيني اقرب صوبه ... يخسي الا هو ...
شمسه: هيه جي اباك ... زين ما ذبح الولد حسبي الله عليه الله لا يوفجه ان شاء الله ...
بو سالم: يا حرمه بسج من الدعاوي ع الناس ... انتي متى بتودرين هالطبع اللي فيج؟؟
شمسه: يستاهل الف دعوه بدال الوحده ...
بو سالم: اذكري ربج و خلي عنج هالرمسه ...
شمسه: اشهد ان لا اله الا الله ..." و التفتت صوب خالد " خالتك سلامه درت؟؟
خالد: اكيد ... قلت لمحمد اكيد خبرها ...
شمسه: خلني اتصل بها اطالعها ...
اتصلت شمسه بسلامه و قررن يسيرن العصر المستشفى يطمنن على ناصر ...
*~*~*~~*~*~*
%% الساعه 4:00 العصر %%
" انزين ليش ما ترد عليهم يمكن يبونك ضروري "
عبدالله: لهالدرجه معوره قلبج ليلوه؟؟ صدقيني مافيها شي ... بس تحب تنغص عليه عيشتي ... لا تحاتين حياتي هم بخير و مافيهم الا العافيه ...
ميره: عاد ما بيتصلون هالكثر لو مافيهم شي ...
عبدالله: يا عمري ليلوه و عارفنها زين ما زين ... الحين تحصلينها ملانه و تبا تحط حرتها فيني ... ليش مب طايعه تصدقيني؟؟
ميره تنهدت: على راحتك ... بس حطه ع السايلنت اذا ما تبا ترد ما فينا ع الحشره ...
عبدالله: ليش ع السايلنت؟؟ اغلقه مره وحده و افتك ...
ميره ابتسمت بخبث: كيفك ...
و في هاللحظه انفتح باب الحجره بكل قوه معلن عن دخول احد عناوين البراءه ... دشت علايه بنت عبدالله و ميره و في ايدها ورقة رسم بيضا ...
علايه بوناسه: بابا توف لسمتك ...
عبدالله شلها و حطها ف ثبانه: تعالي اجوف ... يا سلام شو هالرسمه الحلوه ... ثرج تعرفين ترسمين ...
علايه: هاك اليوم لثمت ماما بث انته ما كنت هني عثان تثوفها ... كانت واااااااايد حلوه ...
عبدالله: بس مب احلى عنج يا حلوة الحلوات ...
ميره باستنكار: عبدالله؟؟
عبدالله: هههههه ... شو تغارين من بنتج؟؟ جوفي علايه اكيه ماما تغار منج ...
علايه و هي مب فاهمه قصده: ثو يعني؟؟
عبدالله: يعني محتره ليش انتي حلوه و هي مب حلوه ...
علايه: ههههههه ماما مب حلوه ثراتيه ... <<<< ظهرت من الحجره و هي تردد هالجمله بصوت عالي و عبدالله ميت عليها من الضحك ...
ميره: زين جي؟؟ يعني اونك ما تعرف بنتك كيف تعلق ع الرمسه ... شو بيسكتها الحين؟؟
عبدالله: ههههه برايها ياهل ما تفتهم ...
ميره: عاد ما لقيت غير هالرمسه تقولها جدامها؟؟
عبدالله: ما عليه كلها دقايق و تنسى ... ما هقيتج تغارين لهالدرجه ...
ميره بدلع: و اكثر بعد ...
عبدالله: لا خلاص عيل رحت فيها ... مب ناقصتني وحده تيني الثانيه غياره بعد ...
ميره بغيض: عبدالله عاد لازم تذكرها الحين؟؟
عبدالله ابتسم بخبث: انتي اللي اجبرتيني ...
ميره: انزين خلاص اقطعها هالسالفه ... و قولي وين بنسافر السنه؟؟
عبدالله: وين ما تبين ... انتي امري و انا انفذ ...
ميره: دام السالفه جي بفكر و بعدين برد عليك خبر ...
عبدالله: حاضرين للحلوين ...
*~*~*~~*~*~*
%% الساعه 4:30 العصر %%
في المستشفى ... عند ناصر بالتحديد ...
ليلى عقب ما رخصوها على طول سارت صوب ناصر و طنشت رمسة الدكتور اللي قالها تروح البيت ترتاح الين ينش ناصر ... دشت ليلى ع ناصر بهدوء عشان ما تزعجه يت حذاله حبته ع راسه و تمت تمسح ع شعره ...
ناصر حس بلمسات امه الناعمه اللي تتخلل شعره و نش ... بغا يعتدل في يلسته بس ليلى ما خلته ...
ليلى: لا تتحرك ... الحركه مب زينه لك ... شحالك الحين؟؟
ناصر: الحمدلله احسن ... انتي من متى هني ما جفتج امس ...
ليلى تنهدت: الله يعلم بحالي كيف كان امس ...
ناصر بقلق: ليش شو استوى؟؟
ليلى: ما استوى شي تطمن ...
ناصر: عيل وين الباقي؟؟
ليلى: الحين كلهم بيون ...
ناصر ما قال شي و رفع عيونه للسقف جنه يتأمل شي جدامه ...
و عقب لحظات من الصمت ...
ناصر افتر صوب ليلى و قال بتردد: امايه سامحيني ع كل اللي سويته فيج ... انا ندمان ع كل اللي صار ...
ليلى ابتسمت بهدوء: انته ولدي الوحيد ماقدر ازعل عليك ... و لو شو سويت بتم غالي عليه ...
ناصر: بس انا عاملتج بحقاره زياده عن اللزوم و ................
ليلى قاطعته: لا تقول جي ... خلاص اللي فات مات ...
ناصر: ابويه خبرتوه باللي صار ...
ليلى ما عرفت بشو ترد على ناصر و نزلت راسها و هي ساكته ...
ناصر حس بخيبة امل: ما يحتاي تجاوبين خلاص عرفت الجواب ...
ليلى: لا تحاتي اكيد هو مشغول الحين و من يدري على طول بييك ...
ناصر ما علق ع الموضوع اكثر و لف ويهه الصوب الثاني و افكار وايده تدور براسه ... عقب فتره وصل سعود و وياه ام سعود و بناته و امل و عفرا ... يلسو ويا ناصر و ليلى و تمو يسولفون وياه و يخففون عنه لدرجة انه حس انه شخص ثاني ... مب ناصر الاولي اللي ما يخصه ف حد ولا حد له خص فيه ... و تمنى انه هالشي صار في ظروف احسن من جي لكن الحمدلله ع كل حال ...
*~*~*~~*~*~*
%% الساعه 5:00 العصر %%
في بيت قوم عايشه بالتحديد ... بو سالم تعود يسير ع بيت المرحوم اخوه بو حميد كل خميس يطمن ع البنات و يجوف اذا محتايين شي ... و هالمره ام راشد و راشد كانو وياه ...
عايشه: اقول راشد؟؟
راشد: امري ...
عايشه: ما يامر عليك عدو ... انته رمست سالم بالموضوع اللي قلتلك عليه؟؟
راشد: هيه نعم خبرته ... ليش؟؟
عايشه: ماشي ... بس اجوفه ما سوى شي ... طول الاسبوع و انا اتريا اييني خبر ولا صار شي ...
راشد: يمكن يدورولج على مكان مناسب لج ...
عايشه: ماعتقد انه هالشي صعب لدرجة انهم يدورون مدة اسبوع ... يتراوالي لو اقدم استقالتي احسن ...
ام راشد: افا يا عايشه تقدمين استقالتج عاد ليش؟؟ صبري يمكن يردون عليج الاسبوع الياي ...
بو راشد: يا عايشه يا امايه لا تستعيلين ... نقل ان شاء الله بينقلونج بس لا تستعيلين بتندمين عقب ...
ام حميد: عيزت و انا اقولها هالرمسه ... هذا حالها كل يوم من ترد من الدوام الين تسير ترقد و هي تتمنى تستقيل ...
بو راشد: تدرين يا عايشه خوانج الله يهداهم ما يشتغلون و صعب تحصلين شغل هالايام و الاعتماد كله عليج في المصاريف ... لا تحطين هالفكره ف راسج ...
عايشه: ادري يا عمي بس الوضع اكبر من اني اتحمله ...
راشد: انتي قولي شو اللي مضايجنج و انا برمس سالم بخليه يستعيل ...
عايشه: قلتك ضغط الشغل و جي ...
بو راشد: اتحملي يا امي عشانج و عشان امج و خواتج ... و ان شاء الله ما بيصير الا كل خير ...
عايشه تنهدت: الله كريم ...
*~*~*~~*~*~*
%% الساعه 5:30 العصر %%
في المستشفى عند ناصر ... شمسه و سلامه كانن توهن واصلات و يالسات ويا ليلى و ناصر ...
شمسه: ما تشوف شر يا ولدي يا ناصر ...
ناصر: الشر ما اييج خالوه ...
سلامه: الحمدلله ع السلامه يا ناصر ...
ناصر: الله يسلمج من الشر ...
شمسه: شو تانس الحين ان شاء الله احسن؟؟
ناصر: الحمدلله ...
شمسه: الله لا يبارك فيهم ان شاء الله ... اشحقه عاد مسويبك جي؟؟
ناصر: استوت سالفه و صار اللي صار ...
شمسه: الله يهداك يا ناصر عاد تضاربون بسجاجين؟؟ شو ناوين تذابحون؟؟
ليلى: شمسه مب وقته العتب ... ناصر تعبان و لازم يرتاح ...
سلامه: كلام ليلى صح ... الولد تعبان حالته ما تسمح ...
شمسه: ويدي و انا شو قلتله؟؟ هذا يزاي اني يالسه انصحه؟؟
ليلى: انصحيه بعدين ...
ناصر: لين متى بتمون تضاربون؟؟
شمسه: قول لامك ... الظاهر وجودنا مب عايبنها ...
ليلى: الله يهداج بس ... هذي رمسه تقولينها عيل شو خليتي حق اليهال؟؟
شمسه: دام السالفه بتوصل للضرابه اترخص منكم انا ...
ليلى: وين توه الناس؟؟ اتريو الين ايون سعود و امايه ...
شمسه و سلامه اتفاجأن من رمسة ليلى و ملامح الصدمه بينت ع ويوههن ...
شمسه: سعود رد و نحن ما عندنا خبر؟؟ صدق ما تستحون كل هذا يصير ولا حتى كلفتو عماركم ترفعون سماعة التلفون و تخبرونا؟؟
ليلى: مالها داعي هالعصبيه ... نحن ما عرفنا الا امس و تدرين باللي صار ما مدانا نخبركم ...
سلامه: ولو ... ع الاقل يتصل تلفون مب لازم يسيّر علينا ... ولا وجودنا لغيتوه؟؟
شمسه تنهدت بضيج: الظاهر جي ...
ليلى: بدينا بالزعل؟؟
سلامه: شو تبون يصير اكثر من جي عشان نزعل؟؟
ليلى: خلاص حقكم علينا و ان شاء الله مره ثانيه من يصير شي انتو اول ناس نخبرهم ...
شمسه: عقب شو عاد؟؟ مشكورين و ما قصرتو ... فمان الله ...
ليلى: حافظنكم الرب ...
سلامه: فمان الله ... و هالله هالله بناصر ...
ليلى: لا توصين حريص ...
ظهرن شمسه و ليلى من المستشفى مغيضات و واصلات حدهن من اللي عرفنه ... و عقب ما ظهرن بفتره يا سعود و خبرته ليلى بكل اللي صار ...
*~*~*~~*~*~*
%% الساعه 7:00 فليل %%
في هالوقت محمد كان ظاهر ويا خالد سايرين صوب ناصر في المستشفى ...
محمد: الصراحه خاب ظني فيك ... تقص عليه يا خالد؟؟
خالد يحاول يتهرب: افا عليك يا ولد الخاله ... هذا ظنك فيني؟؟
محمد: عيل تقولي انك من زمان قطعت علاقتك بعمر و الحين اجوف شي ثاني ...
خالد: لا تحاتي ... نحن كنا يالسين ف حالنا هو اللي يانا ... عاد استحينا نقوله نحن ما نباك تيلس بينا ...
محمد: تقدر توصل له هالشي بطريقه غير مباشره بس الظاهر مرابعة عمر و ربعه عايبتنك ...
خالد: ما هقيتك شكاك لهالدرجه؟؟
محمد: خالد عشان مصلحتك ابتعد عن عمر ... صدقني انته ف غنا عن المشاكل اللي ممكن تسببها هالاشكال ... جوف شو سوو بناصر مب غريبه بعد يسوونها فيك و ف غيرك ...
خالد: يعني انا اجذب عليك؟؟
محمد: ما قلت انك تجذب عليه ... بس اباك تاخذ حذرك منهم و تبتعد عنهم ...
خالد: ان شاء الله ولا يهمك ... من هالعين قبل هاي ...
محمد: هههههههه ... زين جي اباك ... بس اتمنى ما تكون مجرد رمسه تعقها ...
خالد: افا عليك اعيبك انا ... انا خالد الفتى المطيع ...
محمد: ههههههههههههههههه ... خلك مطيع عشان ايوزك اختي ... و ان تمردت ماشي عرس ...
خالد: عادي عندي ... ما بخسر شي ولا هي بتخسر شي ...
محمد باستغراب: هاه اسمع رمسه يديده ... شو ياينك ابويه؟؟
خالد: ما فيه شي ...
محمد: خلاص عيل اقول لسيف يتوكل و يخطبها؟؟
خالد: قلتلك ما بخسر شي ولا هي بتخسر شي ...
محمد: انته قدها هالكلمه؟؟
خالد: قدها و قدود بعد ...
محمد: مسود الويه ... ماعليه دواك عندي ...
خالد: بلاك جلبت علينا مره وحده؟؟ اسولف وياك ...
محمد: اتحسب بعد ...
خالد: ليش؟؟ سيف بلاه؟؟ ولد عمها و يحبها مافيها شي اذا خذها ...
محمد: و النعم فيه ... انا ما قلت شي ... بس ماحيدك تتنازل بهالسهوله ... ولا تنسى انه اللي ترمس عنها اختي ...
خالد: قلنالك نسولف بلاك مب راضي تقتنع؟؟
محمد: ههههههههههه خلاص اقتنعت ... لا تشيل هم ...
خالد: هههههههههههههههه ...
من عقب ما خلصو سوالفهم تمو ساكتين الين وصلو المستشفى نزلو و سارو صوب ناصر ...
*~*~*~~*~*~*
%% السبت 10:00 الصبح %%
في بيت سعود بالتحديد ... سعود و ام سعود و شيخه كانو يالسين في الصاله عقب ما خلصو من الريوق ...
ام سعود: خواتك شمسه و سلامه شحالهن ما جفناهن ين ولا حتى اتصلن ...
سعود: زعلن عقب ما درن بردتنا ...
ام سعود: ويديه ... و شو اللي زعلهن؟؟
سعود: اون ليش ما خبرتونا ... ليلى خبرتهن و سون سالفه ... عاد تعرفينها شمسه لازم تسوي من الحبه قبه و سلامه وراها في كل اللي تقوله ...
ام سعود: هذا كله من شورك ... لو مخبرنهن اول ما وصلنا ما سون كل هذا ... بس انته الله يهديك دوم تزعلهن ...
سعود: هن اللي يحبن يزعلن ... هذي ليلى ما قالت شي ... اشمعنى هن الثنتين ...
شيخه: صدقه سعود ... و بعدين ماظن شمسه غافله عن السبب اللي يخلينا نبتعد عنهن ...
ام سعود: بس بعد هي العوده و من حقها تخبرونها من اول ما وصلنا ...
سعود: انزين خلاص لا تعيدون و تزيدون في هالسالفه ... خلوها عليه انا بتصرف وياها و ان شاء الله بترضى ...
و في الطرف الثاني من البيت ... في حجرة نوره بالتحديد ...
نوره: الا ميثوه شخبارها؟؟ القاطعه لا تتصل ولا تسأل ...
امل: خلج عاد انتي اللي حارقه التلفونات من كثر ما تسإلين ...
نوره: عاد انا كنت مسافره ... و تراني رديت انتو اللي لازم تسإلون مب انا ...
امل: اصلاً ميثوه ما تدري بردتكم ... تدرين اجازه و عقب يومين امتحانات مافي طريقه للتواصل التلفون ممنوع ...
نوره: هههههه احسلج ... عاد ما يندرى بتنجحن السنه ولا؟؟
امل: تبين الصراحه انا عفت الدراسه و خاطري افتك ...
نوره: زين والله ... خلي عنج الاستهتار و ذاكري عشان تنجحين و تفتكين ...
امل: مافي حل ثاني؟؟
نوره: عرسي و قولي لريلج انج ما تبين تدرسين ...
امل: جان زين والله ... ابركها من ساعه ...
نوره: طاع انتو السباله صدقت ... يالله ما عندنا بنات يعرسون قبل ما يخلصون دراستهم ...
امل: هيه عاد انتي خلصتي و افتكيتي و تمينا نحن ...
نوره: هيييييييه والله ايام الدراسه ذكريات ...
امل: مالت عليها من ذكريات ...
نوره: لا والله من تخلصين تحسين بجيمة ايام الدراسه ... و كيف كنا نلعوز الابلوات و البنات ...
امل: ههههههه ... عاد هذا على ايام الثلاثي المرح ... الحين صرنا ثنائي ما له خص بشي ...
نوره: هههههههههههههه لهالدرجه انا اللي كنت احرككم ...
امل: ههههههههههههه مفتقدينج شو نسوي ...
نوره: الله يعينكم ... بس ع الاقل تظهرون ويا بعض ... تسيرون و تردون ...
امل: الحين عاد اهتدينا ما قمنا نظهر وايد ...
نوره: ليش عاد؟؟
امل: بس ... اكتشفت اشيا خلتني ما ارتاح للظهره ويا ميثوه ...
نوره باستغراب: ليش شو صار؟؟
امل: اتخيلي انها هاك اليوم يايبتلي رقم واحد اون اتصلي و هو خاطره يرمسج و من جافج اعجب فيج و من هالسوالف اللي مالها معنى ...
نوره: انزين عادي شو يعني؟؟
امل انصدمت: شو عادي انتي الثانيه؟؟ من صدقج ولا تتمصخرين؟؟
نوره: ما اتمصخر ... عادي الحين كل البنات يرمسون شباب مافيها شي ...
امل: لالالا الظاهر انتي مب صاحيه ... شو شاربه ع الصبح؟؟
نوره: شاربه حليب ... شو بشرب يعني؟؟
امل: الصراحه اشك ... لا يكون انتي ترمسين بعد؟؟
نوره: الصراحه هيه ... بس مب وايد ... تعرفين ماعندي موبايل و ما آخذ راحتي وايد بتلفون البيت ...
امل: .............................. <<<< لا تعليق ...
نوره: بلاج بهتي جي؟؟
امل: انزين انتي ما تخافين خالي ولا امج يدرون؟؟ تخيلي شو بيكون موقفهم اذا درو ...
نوره: حتى لو صار شي ... مصيرهم بيرضون ...
امل: الصراحه امرج عجيب ... ولا جنج نوره بنت خالي اللي اعرفها ...
نوره: ههههههههههههههههه مشكله اللي يخافون ...
امل: لا بويه خليني ف حالي ... انا ما يخصني ف هالسوالف ...
نوره: كيفج ...
*~*~*~~*~*~*
%% الساعه 8:00 فليل %%
بعيد عن عيون الناس و المتطفلين ... جدام هدوء البحر و نسماته العليله يلسو ثنيناتهم يتسامرون تحت جنح الليل ...
البنت: اقول حبيبي ... في خاطري رمسة ابا اقولها بس ماباك تزعل ...
الشاب بقلق: قولي شو فيج؟؟ خوفتيني ...
البنت: ما فيه شي ... الموضوع يخصك انته ...
الشاب: رمسي حبيبي لا توتريني ...
البنت: اكيد ما بتزعل ولا بتتنرفز شرات كل مره؟؟
الشاب: اكيد ... بس رمسي خلصيني ...
البنت: ما تجوف انك تأخرت وايد؟؟
الشاب باستغراب: تأخرت على الشو؟؟
البنت: انته قلت اول ما ترد البلاد بتخطبني على طول و ماجوفك تحركت ...
الشاب: ......................................
البنت: ليش سكت؟؟
الشاب: ماشي بس افكر ...
البنت: بشو تفكر؟؟ لهالدرجه انت رافضني؟؟
الشاب: لا حياتي انا ما قلت جي ... بس قلتلج اني مب مستعد للزواج ... حتى شغل ما اشتغل كيف تبيني اصرف عليج؟؟
البنت: يعني تتريا الين ما اروح ف حال سبيلي عشان تستعد؟؟ اظن خبرتك بسالفة ولد عمي تعبت من كثر ما ارفضه ... حتى هلي قامو يشكون فيه ...
الشاب: انتي مب اول ولا آخر وحده ترفض ولد عمها ليش الشك؟؟
البنت: لا تحاول تغير الموضوع ... صدقني التأخير بيضيعني و بيضيعك ... تدري بي ماقدر اعيش بلياك ... لا تخليهم يجبروني آخذ ولد عمي ... <<<<<<< و بدت تصيح من عقب ما قالت رمستها ...
الشاب: حبيبي لا تصيحين تدرين دموعج غاليه عليه ...
البنت: ماظن دموعي تعنيلك شي ...
الشاب: افااا ... يعني هذا ظنج فيني؟؟
البنت: انا احبك ولا يمكن اتخيل ف يوم اني اكون لغيرك ...
الشاب: و انا بعد احبج و مستحيل اخليج تضيعين من ايدي ...
البنت: الرمسه ما تييب نتيجه ...
الشاب: و اذا قلتلج الرمسه بتستوي فعل قريب ...
البنت بابتسامه حنونه: اتمنى هالشي يصير اليوم قبل باجر ...
الشاب: و انا اوعدج انه بيصير في اقرب فرصه ... بس لا تصيحين ...
البنت: فديت روحك ...
*~*~*~~*~*~*
%% الساعه 11:00 فليل %%
في هالوقت في بيت بو حمدان موزه (ام حمدان) يالسه في الصاله و العيال حواليها يطالعون التلفزيون و هي تتصل بحمدان من الصبح و هو ما يرد عليها ...
موزه بصوت واطي: يا ربي وينه هذا ليش ما يرد ع تلفونه ...
منال: شو ما رد عليج حمدان؟؟
موزه: تراني اتصل به ما يرد ... يا ربي لا يكون صاير فيه شي ...
منال: يمكن حاطنه ع السايلنت انتي ليش توسوسين ...
موزه: عاد هاي اول مره يسويها ...
شويه و يدش عليهم حمدان ... سلم حب امه على راسها و يلس ...
موزه: وينك انته من الصبح اتصلبك ما ترد؟؟
حمدان: اسمحيلي الغاليه نسيت الموبايل عند واحد من الربع و تهايزت ارد اييبه ...
منال: هيازتك هاي يابت الوسواس لامايه ... لا تعيدها مره ثانيه ...
سلطان: ترى رزة الفيس من طبايع الـ.......... تعرفين ما يحتاي اقول ...
منال: سخيف ... شحقه راز بويهك عيل؟؟
سلطان و هو يغايض منال: انبهج ... عن تعيدينها مره ثانيه ...
منال: امايه جوفي ولدج خليه اييوز عني ...
عنود: انتي يوزي عن هالحركات و عقب رمسي ...
منال: انتي ما يخصج ... التلفزيون هاك الصوب ...
موزه: منالوه عن قلة الادب ...
حمدان: عيالج حشره ... مادري متى بيعقلون ...
موزه: رمسهم يا بويه تعبت و انا ارمسهم ما يسمعون الرمسه ... " و اشرت ع منال و سلطان " خصه هالثنينه ...
منال: هو اللي يتحرش فيه ... انا مالي خص ...
سلطان: انتي ام الدواهي ...
حمدان: بس عاد فكونا من حشرتكم لا انشلكم بالخيزرانه انته و هي ...
و من قال حمدان هالجمله سكتو الموجودين ...
حمدان: زين والله ... التهديد اييب نتيجه وياكم ... يبالكم حد يتعامل وياكم بهالاسلوب ...
موزه: احسن ... خلهم يتأدبون ...
حمدان: بترخص منكم الحين تصبحون على خير ...
موزه: بيي وياك اباك ف رمسه قبل ما ترقد ...
حمدان: ان شاء الله ... و انا بعد بغيتج ف رمسه ...
|| في حجرة حمدان ||
حمدان بانفعال: و كيف ترمسينه بدون ما تشاوريني؟؟
موزه: افا يا حمدان ... اجوفك نسيت رمستك ... مب انته اللي قايل اختاري ع ذوقج ...
حمدان: بس انا غيرت رايي ... و كنت ابا ارمسج بهالسالفه ...
موزه: عاد عقب شو يا حمدان ... انا رمست خالك جان خبرتني من قبل ...
حمدان: انزين انتي متى رمستيه؟؟
موزه: من اسبوع بس نسيت اخبرك ...
حمدان: اففففففففففففففففففففف ...
موزه: بلاها بنت خالك ... جمال و اخلاق الف واحد يتمناها ...
حمدان: بس انا ما طلبت منج تخطبيلي اياها ...
موزه: ليش؟؟ انته حاط عينك على حد؟؟
حمدان: امايه مب وقتها هالرمسه خليني ارقد تعبان ...
موزه: برايك ... تصبح على خير ...
حمدان: و انتي من اهله ...
ظهرت موزه من حجرة حمدان و هي متلومه فيه و ف نفس الوقت تلومه لانه ما خبرها من قبل انه غير رايه ... و هي ظاهره جافت منال واقفه عند الباب ...
موزه: و انتي شو تسوين هني؟؟
منال بارتباك: ماشي ... بسير حجرتي ...
موزه: لا يكون كنتي تصوخين من ورى الباب ...
منال: لا ما سويت شي ...
موزه ما قالت شي و سارت عنها حجرتها ... و منال كملت طريجها لحجرتها و هي تفكر باللي ممكن يصير اذا جليثم عرفت باللي دار بين امها و حمدان ...
*~*~*~~*~*~*
%% الاحد 9:30 الصبح %%
" ابا اعرف منو اللي موقع هالاوراق و بأي حق؟؟ "
محمود بارتباك: يطولي بعمرك هيدا مراد جاب لي الاوراق الاسبوع الفايت و قال لي انها اوراق مهمه و انك مستعجل عليهن ...
عبدالله: وينه مراد ازقرلي اياه بسرعه ...
محمود: ان شاء الله سيدي ... عن ازنك ...
دقايق و يدش مراد ...
عبدالله: تقدر تقول لي حضرتك بأي تتعاقد ويا هالشركه ... <<<< و فر الملف ع المكتب عشان يجوفهن مراد ...
مراد يلس يتفحص الاوراق مستغرب: بس يا سيدي انا ما خصني بهالاوراق ... اول مره بشوفهن ...
عبدالله بانفعال: اكيد اول تشوفهن ... لانهن بيودونك ف داهيه لازم تتهرب ...
مراد: بحلفلك سيدي انا ما خصني ...
عبدالله: لا تحلفلي ولا احلفلك ... كل الاوراق اللي تدش الشركه تمر عليك اشمعنى هاي طافتك؟؟ قول ...
مراد يتوسل عبدالله: صدقني يا سيدي انا ما خصني ... الاستاز منصور كان معاه ملفات غريبه بشك انو هايدا الملف منهن ...
عبدالله: الحين عق بلاويك ع منصور ... بتعترف ولا اخلي الشرطه يطلعون جذبك بالغصب؟؟
مراد: حرام عليك استاز ... انا موضف فقير ما خصني بهيك اشيا ... بوس ايدك استاز ...
عبدالله: اتفضل اطلع برع و شل اغراضك و سير ... مابا اجوف رقعة ويهك ...
مراد: حرام عليك تأطع رزإي استاز ...
عبدالله بانفعال: روح لا بارك الله فيك ...
ظهر مراد من مكتب عبدالله و هو مصدوم من هالمصيبه اللي طاحت ع راسه و هو ما يدري ... من ظهر من المكتب حصل محمود جدامه و تم يواسيه و يخفف عنه ...
و في الطرف الثاني من بعيد ... كان منصور يراقب الوضع و تطمن يوم عرف انه المصيبه طاحت على راس مراد ...
منصور بخاطره: حسبي الله على بليسك يا محمود ... زين ما فضحتنا ... بس الحمدلله ما يت عليه انا و طاحت ع راس هالمسكين مراد ... يالله الله يعوضه خير ... بس بعدها خطتي ما اكتملت ... ما برتاح الا يوم يصير الحلال كله بايدي ... بس ان شاء الله ما يسويها هالمحمود و يفضحنا ...
و في هاللحظه دش محمود على منصور و هو خايف ...
منصور: حووووه بلاك؟؟
محمود: شفت اللي صار؟؟
منصور: هيه جفت ... زين ما فضحتنا يا السبال ... مره ثانيه انتبه لا ننكشف و تلحق مراد ...
محمود: ان شاء الله ...
منصور: بس سير شو تباهم يشكون فينا ...
محمود: لالالالا كلو ولا يشكو ... عن ازنك استاز ...
منصور عقب ما ظهر محمود: روح قبل لا تودينا ف داهيه ... الله يعيني عليك من اولها جي عقب شو ... الله يستر بس ...
*~*~*~~*~*~*
%% الساعه 4:30 العصر %%
" وينج انتي اتصلبج من الصبح عنبوه متي؟؟ "
جليثم: اسمحيلي غناتي من الوناسه نسيت الدنيا كلها ...
منال و هي خايفه لا يكون شكها ف محله: خير ونسينا وياج ...
جليثم: انزين بلاج شويه و بتصفعيني ... ادريبج تستهبلين عليه ...
منال بدت دقات قلبها تتسارع: لا ما استهبل قولي ... حرقتيلي اعصابي ...
جليثم: انزين بقولج عن تين تصفعيني بعد ... احم احم ...
منال: شو حضرتج تلقين محاضره ...
جليثم: اسكتي عني روحي مب رايمه ارمس من الوناسه ... يا حلوه اخوج العزيز اخيراً حن عليه و خطبني من ابويه اللي هو خالج ... شو رايج؟؟
منال: شووووه؟؟
جليثم: شيييي ... اللي سمعتيه يا حلوه ...
منال بانفعال: و خالي رمسج؟؟ شو قلتيله؟؟
جليثم ابتسمت: لا تخافين قلتلهم عطوني فرصه افكر و استخير و برد عليكم خبر ... و تبين الصراحه انا بتغلى عليه شويه خله يتحرقص ...
منال: ............................................
جليثم: بلاج صخيتي؟؟ منول رمسي اسلوبج اليوم مول مب عايبني ...
منال: جليثم انتي لازم تقولين لخالي انج ما تبين حمدان ...
جليثم بقلق: منالوه شو فيج؟؟ ليش تبيني ارفض؟؟ انتي تخبلتي شو؟؟
منال: جليثم انا ارمسج جد ... انتي لازم ترفضين و بس لا تسإليني عن السبب لاني ماقدر اخبرج ...
جليثم حست انه منال تتكلم جد: ليش منال شو صاير؟؟ تعرفين شي انا ما اعرفه؟؟
منال: اسمحيلي ماقدر اقولج ... سوي اللي قلتلج عليه و بس ...
جليثم: منال والله تقولين شو السالفه ... تراج خوفتيني ...
منال: لا تحلفين ... ماقدر اقولج ...
جليثم: يالله عاد منال لا تستوين سخيفه ...
تمت جليثم تحن على منال الين رأفت بحالها و خبرتها بكل الكلام اللي دار بين حمدان و موزه ... و طبعاً الشعور بالصدمه كان سيد الموقف ...
منال: ارتحتي الحين؟؟
جليثم بصوت مبحوح: منول الله يخليج قولي انج تجذبين عليه ...
منال تنهدت بضيج: يا ريت جليثم بس هذا اللي لازم تعرفينه ...
جليثم: و ابويه شو اقوله اذا سإلني عن السبب؟؟
منال: اتصرفي وياه ... قوليله انه مثل اخوج و جي صدقيني ما بيغصبج ع شي ...
جليثم: ........................................
منال: تصيحين؟؟ جليثم لا تخليني اتلوم فيج ... يكفي انج معوره قلبي من امس ...
جليثم: بخليج الحين ماعندي شي اقوله عقب كل هذا ...
منال: على راحتج بس صدقيني هالشي ف مصلحتج و لا تفكرين بهالسالفه وايد ...
جليثم: ان شاء الله ...
منال: وعد؟؟
جليثم تنهدت: وعد ...
منال: خلاص برايج ... مع السلامه ...
جليثم: مع السلامه ...
بندت جليثم عن منال و هي تحس الدنيا اظلمت جدامها ... ما صدقت انه الحلم اللي تمنته طول عمرها طلع وهم و غلطه فضيعه لازم تتحمل صدماتها ... ما اتحملت مجرد التفكير انه حلمها تبخر و صار سراب و طاحت ع شبريتها تصيح بحرقه ...
>>>>>>>>> يتبع في الفصل الثاني
*~*~*~ الجزء السابع ~*~*~*
*~*~ الفصل الثاني ~*~*
%% الاحد 5:15 العصر %%
في هالوقت كانو مرخصين ناصر من المستشفى عقب ما اطمن على حالته و كانو توهم واصلين البيت و سعود موصلنهم ...
ليلى: نور البيت بوجودك يا ناصر ...
ناصر: امبونه منور بوجد هله ...
ليلى: عاد بوجودك غير ...
ابتسم ناصر ع الخفيف و استسمح منهم سار حجرته يرتاح ...
ليلى: اقرب سعود ايلس ويانا شويه ...
سعود: مره ثانيه ان شاء الله ... الحين بسيّر على شمسه و سلامه ... ما يصير من ردينا ما سرتلهم ولا حتى اتصلت ... عاد تعرفين خواتج اكيد زعلن يبالنا نراضيهن شويه ...
ليلى: ههههه خلاص برايك ... سلم عليهم ...
سعود: يبلغ ان شاء الله ... و هالله هالله بناصر ...
ليلى: لا توصي ... ناصر ف عيوني ...
سعود: يالله عيل ... فمان الله ...
ليلى: حافظنك الرب ...
ظهر سعود عن ليلى ساير صوب شمسه و تمت ليلى في الصاله بروحها ...
ليلى ف خاطرها: الله يعينك عليهن يا سعود ...
شويه و بدشة امل يايه من حجرتها ...
امل: ماشالله متى ييتو؟؟
ليلى: تونا يايين ... ذاكرتي ولا بتسويلنا شرات كل سنه؟؟
امل تبتسم: ذاكرت ... و من الخاطر بعد ...
ليلى: موفقه ان شاء الله ...
امل: آميييييييييييين و افتك من المدرسه و ارتاح ...
ليلى: جان زين والله ... انتي بس انجحي و لج مني اي شي تبينه ...
امل: اممممممممممممم دام السالفه جي ... ابا اسافر ...
ليلى: ههههههههههه ماشالله الرد زاهب ...
امل: اكيد ... اصلاً من زمان كنت ابا افاتحكم بالموضوع بس أجلته شوي ... و زين الرمسه طلعت منج ... بس هاه تراه وعد ...
ليلى ابتسمت: ولا تزعلين ... خلي ابوج ايي و انا برمسه ...
هني دشت عليهم عفرا ...
عفرا: ماشالله عليج انتي هني تلعبين انا يحليلي ذابحه عمري بالمذاكره ...
امل: يعني ما ناخذ وقت مستقطع؟؟
عفرا يت يلست عدال امها: متى ييتو؟؟ و ناصر وين؟؟
ليلى: ناصر ف حجرته ... تونا يايين ما كملنا نص ساعه ...
عفرا: زين ... و ع الشو كنتو تخططون؟؟
امل: ما يخصج ... موضوع بيني و بين امايه ... انتي شو يخصج؟؟
عفرا: امايه جوفيها ...
امل: جايفتني من زماااااااااان ...
ليلى: بس عاد عن الحشره ...
عفرا: انزين شو كنتو تقولون؟؟
ليلى: نخطط للسفر ...
عفرا بوناسه: الله بنسافر؟؟
ليلى: هذا يعتمد على نجاح اختج ... خلها تشد حيلها و تنجح و ان شاء الله بنسافر ...
عفرا: يا سلااااااااااااام ... امول ما وصيج ... يا ويلج ان سقطتي ...
ليلى: لا ان شاء الله بتنجح ... انتي شجعيها و بتنجح ...
امل: بنجح ان شاء الله و بتجوفون ...
عفرا: طبعاً ... عشان السفره كل شي يهون ...
امل: اكييييييييد ...
تمن ثلاثتهن في الصاله يسولفن و يضحكن و هالشي مريح بال ليلى اللي اخيراً قدرت تكسب رضا عيالها و تضمهم حواليها مره ثانيه ... خصوصاً ناصر اللي تقريباً كانت فاقده الامل انها تكسب رضاه ...
ليلى: مب جنكن نسيتن دراستكن ... يالله على حجركن اجوف ...
امل + عفرا بضيج: اوووووووووهوووووووووووووووو ... ردينا؟؟
ليلى: هيه ردينا ... يالله اجف جدامي ولا ماشي سفر ...
امل: لالالالا كله ولا السفر ... انا سايره ...
عفرا: و انا بعد ...
ليلى: ذاكرن عدل ...
امل + عفرا: ان شاء الله ...
ردن امل و عفرا حجرهن يذاكرن و تمت ليلى في الصاله بروحها ... توها بتنش تسير حجرتها دش عليها عبدالله ...
عبدالله بصوت بالكاد يكون مسموع: السلام عليكم ...
ليلى: و عليكم السلام ... وينك لا حس ولا خبر؟؟
عبدالله بضيج: ليلى الله يخليج خليني ف حالي ... اجلي نقاشاتج لعقب ...
ليلى باستغراب: عبدالله شو فيك؟؟ شي مضايجنك؟؟
عبدالله: سالفه طويله ماعتقد تهمج ... عن اذنج ...
سار عبدالله عنها الحجره بدون ما يعطيها فرصه ترمس بس هي لحقته عشان تسأله عن اللي فيه لانها حست انه صدق مضايج ...
ليلى: عبدالله شو فيك تراك خوفتني ...
عبدالله بضيج: مضايج من الشغل ... ارتحتي الحين؟؟
ليلى: ليش شو صار؟؟
عبدالله: .................................. <<<<<< قالها بكل اللي صار في الشركه ...
ليلى بقلق: و الحين شو بتسوي؟؟
عبدالله: مادري يا ليلى مب عارف شو اسوي ...
ليلى سارت صوب الكبت و شافها عبدالله شلت شي من شنطتها و يت يلست عداله ...
ليلى: هاي بطاقتي مال البنك تقدر تاخذ المبلغ اللي فيه الين تتيسر الامور ... انا مب محتايتنهم ...
عبدالله: لا يا ليلى هاي فلوسج انتي اولى فيهم ...
ليلى: والله ما اصرف منهن فلس و انته محتاي ... ما يصير ريلي ابو عيالي محتاي و ايود عنك فلوسي ... ترى هالفلوس من خيرك ...
عبدالله بتردد: والله ماعرف شقولج يا ليلى ...
ليلى: لا تقول شي ... خذهن و توكل ...
عبدالله: ان شاء الله من الله يفتحها عليه بردهن عليج ...
ليلى: ان شاء الله ...
و سادت فتره من الصمت ... خلال هالفتره بس حس عبدالله انه ليلى صدق تغيرت و انها ما كانت تمثل مثل ما كان متوقع هالشي خلاه يتلوم فيها و تذكر انه طرد ناصر من البيت ...
ليلى: وين كنت هالايام؟؟ ناصر كان في المستشفى سأل عنك وايد ...
عبدالله باستغراب: ناصر في المستشفى؟؟ ليش ... شو صار؟؟
ليلى: كان في المستشفى و اليوم رخصوه و هو ف حجرته اكيد راقد ...
عبدالله: ليش كان في المستشفى ...
ليلى: ................................. <<<< خبرته عن كل شي ...
عبدالله: و الحين شحاله؟؟
ليلى: الحمدلله بدا يتحسن ... بس ناقصتنه وقفتك وياه ...
عبدالله: اسمحيلي يا ليلى لو كنت ادري ما سويت جي ... بس تدرين الشغل ماخذ كل وقتي ...
ليلى ابتسمت: حصل خير و الحمدلله ع كل حال ...
ردلها عبدالله الابتسامه و هو من داخله يحس انه يحترق من كثر ما هو متلوم ف ناصر بسبة اللي صار و هو ولا ع البال لاهي بشغله ...
*~*~*~~*~*~*
%% الساعه 12:00 فليل %%
شمسه كانت يالسه ويا سالم و تحاتي خالد اللي الين الحين ما رد ... طبعاً مب شي غريب انه يتأخر برع البيت بس هي كانت مصممه ترمسه ف موضوع الشغل و زواجه من أسما اللي صارله فتره يتهرب منه و خصوصاً انه هالايام صار ما يقر في البيت موليه ... دقايق و يدش خالد و هو يغني و صوته واصل الين آخر الشارع ...
شمسه: توه الناس جان ما ييت احسن ...
خالد سوى روحه متفاجأ: اوه انتو هني؟؟ ما جفتكم ... على العموم تصبحون على خير ...
شمسه: تعال ارمسك انا ...
خالد بضيج: اووووووه ... تعبان ابا ارقد ... ممكن؟؟
سالم: احترم نفسك و ارمس عدل ... امك ترمسك مب وحده من الشارع ...
خالد: بس بس الله يخليك فكنا من محاضراتك اللي ما تخلص ... ياخي شو نسويلكم اذا انتو ما تحترمون الواحد كيف تبونه يحترمكم ...
شمسه: خالد؟؟ انته صاحي؟؟ شو هالرمسه الماصخه؟؟
سالم: ما عليج منه امايه خليه عليه سيري ارتاحي و انا برمسه ... " و التفت صب خالد " ... امش جدامي اجوف ...
نش سالم من مكانه و سحب خالد وياه ...
خالد بضيج: ايه لا تدز ... شو تجوفني ياهل مادل الطريج ...
سالم: امش جدامي و عن الهذره الزايده ...
سارو سالم و خالد عن شمسه اللي تمت بروحها ف الصاله و مب مطمنه لحال خالد اللي مول مب عايبنها هالايام ... دقايق و نشت وراهم سارت حجرتها ترقد ...
|| في حجرة خالد ||
فج سالم الباب بالقو و على طول سحب خالد للحمام و حط راسه تحت الحنفيه يغسل له ويهه و راسه عشان يصحصح شوي و خالد محرج من حركته و يحاول يفج من سالم اللي ميودنه بالغصب ...
خالد: بس عاد خرستنا حسبي الله على ابليسك ... شو تسوي؟؟
سالم: عشان تصحصح و تسمع اللي بقولك اياه عدل ...
خالد بضيج: بس هدني ...
عقب ما تأكد سالم انه خالد بدا شوي يستوعب اللي حواليه بند الحنفيه و فر عليه الفوده و ظهر من الحمام ...
خالد بعصبيه و هو ينشف شعره من الماي: خير شو تبا؟؟
سالم بانفعال و بدون مقدمات: انته من متى تشرب؟؟
خالد: تنكت حضرتك؟؟
سالم: لا تحاول تتهرب ... ترى هاي مب اول مره اشوفك بهالحال ... و دوم اراقبك و انت راد البيت فليل ...
خالد: هالشي يخصني ... انته عليك من نفسك بس ... اسوي اللي اسويه و محد له خص فيني ...
سالم: و مستانس ع فعايلك الشينه بعد ... ما تعرف انه هالشي حرام و من الكبائر؟؟
خالد: لو سمحت لا تبدا بالمحاضرات الحين ... مصدع و مالي بارض اسمع تفاهاتك ...
سالم: الحين يوم ارمسك عن دينك و دنياك صرت تافه؟؟
خالد بضيج: اوووووووووووووه ... تراك حشرتنا ...
سالم: انته ما فكرت شو بيكون موقف ابويه و امايه اذا درو بسوالفك؟؟ احمد ربك انها ما لاحظت عليك هالشي ...
خالد: انزين و شو المطلوب مني الحين ...
سالم: اباك تصطلب و تغدي ريال ... و تودر عنك هالسالف اللي بتضرك ولا بتفيدك ... و اذا نفسك مب هامتنك فكر بامك و ابوك ...
خالد بدون اهتمام: انزين يصير خير ... و الحين خلصنا نبا نرقد ...
سالم تنهد بضيج: الله يعينها بنت الناس عليك ... ما تدري بشو بتبتلي ...
خالد: مب جنك اهنتني برمستك هاي؟؟
سالم: احسن ... عشان تستحي ع يهك و تصطلب ... تصبح على خير ...
ظهر سالم من حجرة خالد و هو مضايج من تصرفات خالد اللي ما يعرف شي اسمه احترام ... اما خالد ما اهتم لكل اللي قاله سالم و عق عمره ع الشبريه رقد على طول ولا عليه من شي ...
دش سالم حجرته و اتفاجأ بوجود شمسه في الحجره ...
سالم: خير امايه فيج شي؟؟
شمسه: لا ما فيه شي ... خالد شو بلاه شو قالك؟؟
سالم تنهد: شو بلاه خالد؟؟ ما بلاه شي ...
شمسه: بس انا قلبي مب مطمن ... و حاسه انه خالد فيه شي ... لا يرمسني ولا ييلس في البيت ...
سالم: امبونه خالد جي مب شي غريب عليه ...
شمسه: ولدي و اعرفه عدل ... ماحيده جي ... من فتره ملاحظه عليه هالشي ... فيه شي مضايجنه؟؟
سالم: اطمني ما فيه شي ... ولو فيه مستحيل اخش عنج شي ...
شمسه: الله يعيني عليك يا خالد ...
سالم: امايه بقولج شي بس يا ريت ما تنفعلين ...
شمسه بقلق: خالد فيه شي؟؟
سالم: ما ارمس عنه هو بالضبط ...انا اقصد اسما ... لا تغصبون خالد عليها اذا ما يباها ...
شمسه بانفعال: و ليش ما يباها؟؟ هو قالك؟؟
سالم: لا ما قالي ... بس خالد بعده مب مال عرس ... و تصرفاته هاي اكبر دليل ع هالشي ...
شمسه: انته شو تقول؟؟ لهالدرجه وصلت فيك الغيره يا سالم؟؟ تغار من اخوك الصغير؟؟ ولدي ريال عن عشر رياييل و ما يعيبه شي ... انته جايف عليه شي و خاش عنا؟؟
سالم: جفت اشيا وايد ... و يا ريت ما تحنين عليه بهالموضوع هو يوم يبا بروحه بيرمسج ...
شمسه: ابا اعرف انتو شو سالفتكم بالضبط؟؟
سالم: ما فينا شي ...
شمسه: انته الرمسه وياك ضايعه ... اسير اجوف خالد اشفيه احسلي ...
سالم قبضها من ايدها قبل ما تظهر: خالد الحين راقد أجلي الرمسه لباجر ...
شمسه ما سوتله سالفه و فجت ايدها منه و سارت على طول حجرة خالد و سالم ما لحقها لانه يعرف انها مستحيل تسمع كلامه فخلاها ع راحتها دام خالد تعبان و يمكن ما يتفيج يرمسها ...
دشت شمسه حجرة خالد بدون ما تدق الباب و تمت تحاول توعي خالد اللي غط في النوم ...
شمسه: خالد نش شويه ابا ارمسك ...
خالد بضيج: امايه تعبان ... تعالي باجر خليني ...
شمسه: قوم عاد لا تستوي عنيد ... ماقدر اصبر الين باجر ...
خالد: .................................................. .......
شمسه: خالد عاد نش ...
خالد نش و هو مضايج: امايه حد يسولف الحين الساعه وحده ... سيري رقدي و الصبح يصير خير ...
شمسه بانفعال: قلتلك نش يعني نش ...
خالد بضيج: افففففففففففففف نشينا ... خير شو عندج؟؟
شمسه: لا تتأفف و ارمس عدل ...
خالد: ادري عن شو بترمسين يا ريت لو تختصرين لاني ابا ارقد ...
شمسه بانفعال: انته قلت لسالم انك ما تبا اسما؟؟
خالد بصوت واطي: حسبي الله عليك يا سالم جانك انته السبب في هالحشره ...
شمسه: رد عليه ارمسك انا ...
خالد بانفعال: لا ما قلت ... و بنت اختج خلي ولد عمها ياخذها انا خلاص عفتها بس فكيني من هالسالفه ...
شمسه: خالد انته شو تقول؟؟
خالد: اللي سمعتيه ... من حنتج انتي السبب ... و اقولج من الحين عرس مافكر اعرس حتى الشغل ما بشتغل لا اتعبين نفسج مره ثانيه و تين ترمسيني بهالسالفه ... زين؟؟ تصبحين على خير ...
رد خالد يرقد بدون ما يعطي اي اهتمام لشمسه اللي انصدمت من رمسة خالد و اسلوبه وياها و سارت حجرتها و هي مب مستوعبه كل اللي صار جدامها ...
*~*~*~~*~*~*
%% الاثنين 10:05 الصبح %%
اليوم اول ايام امتحانات الفصل الثاني للمدارس ... في هالوقت امل و ميثا كانن توهن ظاهرات من المدرسه عقب ما خلصن من الامتحان ...
امل: شو سويتي في الامتحان؟؟
ميثا: وييييه شكلي بعيدها السنه مره ثانيه ...
امل: ليش؟؟ الامتحان كان سهل ... انتي جنج ما ذاكرتي عدل ...
ميثا: هههههه الا ما ذاكرت بالمره ...
امل: هيه طبعاً يالسه تحوطين في السيتي وين يمديج تذاكرين ... زين فكيت عمري و ذاكرت ...
ميثا: ماشالله اجوفج تشطرتي ع آخر السنه ...
امل: نبا ننجح ... ملينا من الدراسه و نبا نخلص ...
ميثا: ماحيدج طموحه لهالدرجه ... شو اللي غيرج؟؟
امل ابتسمت: بعد تعرفين الاجواء الاسريه لها دور كبير في هالمجال ... اللهم لا حسد ما فيه اعطيهم بعين ...
ميثا: زين ... و هالاجواء بتم على طول ولا يوم يومين و خلاص تتساقط الاقنعه؟؟
امل: عوذ بالله منج ... هذا بدال ما تتمنين نتم جي ع طول يالسه تتمصخرين ...
ميثا: بسم الله بلاج هبيتي ف ويهي مره وحده ... اسولف وياج انزين ... رشيد مر الشيشه ( المحطه ) <<<< ترمس الدريول ...
رشيد: جين ...
امل: على حسابج تراني اليوم مفلسه ... نسيت آخذ المصروف ...
ميثا: هههههه احسلج ...
نزلن امل و ميثا الشيشه و يلسن يتشرن حلاوه و جبس و هالسوالف ... امل لاحظت انهن من دشن الشيشه دش واحد وراهن و يتبعهن وين يسيرن و هالشي خلاها ترتاب منه ...
امل تصاصر ميثا: هذا بلاه يلاحقنا من مكان لين مكان ...
ميثا بارتباك: مادري ...
...... : لو سمحتي الشيخه ممكن ارمسج شويه؟؟
امل تفاجأت انه يرمسها: انا؟؟
..... : هيه انتي ... ممكن تاخذين الرقم من زمان خاطري ارمسج اسمي سعيد و يشرفني اتعرف عليج ...
امل: انته ما تستحي ع ويهك؟؟ لو سمحت عن الفضايح و فارج ...
سعيد: على راحتج بس لا تنسين تتصلين ... ميثا بتعطيج الرقم ... و السموحه جان غثيتج بشي ...
ظهر سعيد من الشيشه و الابتسامه شاقه الحلج ... امل تمت مذهوله من اللي سمعته و تطالع ميثا و هي محرجه ... ردت كل اللي خذته و خلت ميثا بروحها في الشيشه و سارت السياره حصلت سعيد حارسنهم و شكله ما بيفج و من جافها ظاهره من الشيشه ابتسملها و لوح لها بايده بس هي طنشته و ركبت السياره ... دقيقتين و ترد ميثا تركب السياره ...
امل: على فكره مب حلوه الحركه اللي سويتيها؟؟
ميثا سوت نفسها متفاجأه: اي حركه؟؟
امل: بلا استهبال ... ادري انج متفقه وياه ع كل شي ...
ميثا: افا يا امول تشكين فيه؟؟ انا ما يخصني لا انا اعرفه ولا يعرفني ...
امل: عيل كيف عرف اسمج ... لا و اون ميثا بتعطيج الرقم<<< قالتها بنفس طريقته ...
ميثا: ماعرفه هاييج المعرفه اللي انتي تظنينها ... مجرد اعرف اسمه و يعرف اسمي بس لا اكثر ولا اقل ...
امل: عذر اقبح من ذنب ...
ميثا بانفعال: تجذبيني يعني؟؟
امل: ما جذبتج ولا شي ... انتي تقولين الصدق ما تعرفين شي اسمه جذب ...
ميثا سوت عمرها زعلت: الله يسامحج ...
امل: الله يسامح الجميع ... و اقولج من الحين من انزل البيت لا انا اعرفج ولا انتي تعرفيني ...
ميثا: افا هاي نهاية العشره؟؟ ماحيدج جاحده جي ...
امل: لا تسوين روحج زعلانه ... هالحركات ما تنفع ويايه ...
ميثا: دام هاي رمستج كيفج ... انتي الخسرانه جوفي منو بيرابعج مره ثانيه ...
امل: مستغنيه عن هالنوع من الربعه ...
ميثا قفطت من رمسة امل و تمت مغيضه عليها و واصله حدها ... نزلت امل بيتهم بدون لا ترمس او حتى تودع ميثا شرات كل يوم الشي اللي خلا ميثا تغيض اكثر ...
*~*~*~~*~*~*
%% الساعه 11:00 الصبح %%
" اللي ماخذ عقلج يتهنابه ... وين وصلتي؟؟ "
عايشه: شي ما يخصج ...
ايمان: انصحج لا تحلمين باشيا مستحيل تصير ...
عايشه: شو قصدج؟؟
ايمان: ولا شي ... لو انتي شاطره بتفهمين انا شو اقصد ...
عايشه: تدرين انج وحده فاضيه و ما عندج سالفه؟؟
ايمان: خليت السوالف لج يا ام السوالف ...
عايشه: ايمانوه احسلج جوفي شغلج و لا تتحرشين فيه لا اييج شي ما يعيبج ...
ايمان باستهزاء: شو بتسوين يعني؟؟
عايشه بخاطرها: شو اللي بيسكتج عاد الحين؟؟
ايمان: ليش صخيتي؟؟ ابا اعرف شو بتسوين ...
عايشه: لو سمحتي كفي شرج عني ... مالي خلق لسوالفج الفاضيه ... ربيعتج تغيب و تحطين حرتج فيه؟؟ جوفي شغلج احسلج ...
ايمان: ههههههههه ضحكتيني والله ...
عايشه بخاطرها: ضحكتي من سرج بلا ... انا لازم اجوف شو سالفة النقل السكوت ما ينفع الين متى بتحمل هالاشكال ...
ايمان: على وين يا حلو ...
عايشه طنشتها و ظهرت من المكتب و على حظها سالم كان توه ظاهر من مكتبه و جافها و هي يايه صوبه ...
سالم: خير عايشه بغيتي شي؟؟
عايشه: ممكن ارمسك شويه لو تسمح؟؟
سالم: اسمح ليش ما اسمح ... اتفضلي المكتب ...
عايشه: لا ما يحتاي هن كلمتين ...
سالم: بخصوص النقل؟؟
عايشه: الصراحه هيه ... اللي اعرفه انه راشد رمسك من اكثر من اسبوع بس ماجوف صار شي ...
سالم: والله يا عايشه ماعرف شو اقولج ... بس اوعدج قريب ان شاء الله بيتغير الوضع ...
عايشه: يا ريت يكون بأسرع وقت ...
سالم ابتسملها: ولا يهمج ...
عايشه انحرجت: مشكور و ما تقصر ... استأذن الحين ...
سالم: برايج ...
عقب ما سارت عايشه عن سالم التفت سالم الصوب الثاني و جاف بو سيف ويا سيف لوح لهم من بعيد و كمل طريجه ... اما عايشه ردت المكتب و هي حاسه انه سالم قالها اللي قاله بس عشان يسكتها و شاكه انه نقلها من هالمكان مستحيل و تضايجت من هالفكره ...
و في طرف ثاني من نفس المكان ...
بو سيف: ارمس منو انا؟؟
سيف: هاه؟؟ قلت شي؟؟
بو سيف: الله يهداك انا ارمسك من الصبح و انته تلفت يمين يسار ...
سيف: هههههه عادي كنت اسمعك ...
بو سيف: بس ماظني سمعت سؤالي ...
سيف: بصراحه هيه ...
بو سيف: قول جي من الصبح ... على العموم بعدين بردلك بسير اطالع بو سالم شو يبا و برجعلك ...
سيف: برايك ...
سار بو سيف لبو سالم اما سيف تنهد و رد ع مكتبه يكمل شغله ...
*~*~*~~*~*~*
%% الساعه 2:15 الظهر %%
حزة الغدا في بيت بو سيف ... الكل كانو موجودين الا جليثم ...
بو سيف: جليثم وينها؟؟ ما يت من الكليه؟؟
حمده: يت .. بس ما تبا غدا ... حاولت وياها ما طاعت ... ماحيدها جي عنيده مادري شو ياينها اليوم ...
بو سيف: ليش شو مضايجنها؟؟ انتي قلتولها شي زعلها؟؟
ظبيه: امس اشزينها و اشحلاتها مافيها شي ... و اليوم الصبح اجوفها انجلبت حتى الريوق ما تريقت قبل ما تسير الكليه ...
بو سيف بقلق: لا يكون شي يعورها؟؟
ظبيه: لو فيها شي بتقول بنتي و اعرفها ما تسكت ...
بو سيف: انزين انتي رمستيها؟؟
ظبيه: و هي تعطي حد فرصه يرمسها؟؟
بو سيف: بقوم اجوف شو فيها ...
ظبيه: انزين كمل غداك و عقب سيرلها ...
بو سيف: الحمدلله شبعت ...
نش بو سيف من ع الغدا غسل ايديه سار عند جليثم ...
|| في حجرة جليثم ||
بو سيف: شو فيج يا بنتي شو مضايجنج؟؟
جليثم بصوت مبحوح يبين انها كانت تصيح: ما فيه شي ...
بو سيف: تخشين عليه يا جليثم؟؟ انا ابوج اذا ما قلتيلي شو فيج تشكين لمنو عيل؟؟
جليثم: .....................................
بو سيف: اذا تبين شي لا تستحين انا ابوج ...
جليثم: السالفه مب جي ...
بو سيف: عيل شو السالفه؟؟
جليثم: ....................................
بو سيف: لا يكون سالفة حمدان مزعلتنج؟؟
جليثم انصدمت: شوووه؟؟
بو سيف: اذا ما تبينه محد بيغصبج عليه ... بس لا تسوين بروحج جي ... انتي غاليه علينا و ما يهون علينا زعلج ...
جليثم انربط لسانها من طرى بو سيف حمدان جنه حاس انه سالفة زعل جليثم لها خص في حمدان ...
بو سيف: يا بنتي لا تتسرعين و فكري عدل و اي قرار تقررينه نحن راضين به بس لا تسوين بروحج جي ...
جليثم: ان شاء الله ...
بو سيف: عيل قومي غسلي ويهج و تعالي يلسي ويانا ...
جليثم ابتسمت: ان شاء الله ...
ظهر بو سيف عن جليثم و سار ييلس في الصاله ويا الباقين و عقبه بدقايق لحقته جليثم و تمو كلهم في الصاله يسولفون ...
*~*~*~~*~*~*
%% الساعه 5:00 العصر %%
" اووووووف شكلي زودتها شوي اليوم ... هالكثر رقاد؟؟ يالله يا راسي شقا مصدع "
تمدد خالد ع الشبريه بكسل و هو حاس بجسمه كله متكسر من كثرة الرقاد ... نش بصعوبه و وصل الين الكبت شل وياه ثياب و دش الحمام يسبح ... نص ساعه و ظهر خالد من حجرته كاشخ ولابس سار يحر السياره و رد الصاله ... في هالوقت الكل يو ييلسون في الصاله عقب ما قيلو ...
شمسه: ما بغيت تنش ... خست رقاد يا بوك ...
خالد: جي ما وعيتوني؟؟
شمسه: انا عن نفسي غسلت ايدي منك دورلك حد يراعيك ...
خالد: افا زعلانين اليوم شو السالفه؟؟
شمسه تنهدت بضيج: اسأل روحك شو سويت امس ...
سالم: امايه ما يحتاي تفتحين هالسالفه الحين ...
بو سالم: اي سالفه؟؟ شو عندكم؟؟
شمسه: اسأل ولدك مسود الويه شو سوا امس ...
خالد: شو السالفه؟؟
شمسه: اونك تسوي روحك ناسي؟؟
سالم: امايه خلاص تفاهمي وياه بعدين ...
شمسه: متى بعدين؟؟ عقب ما يدمر اكثر من ما هو دمران؟؟
كل هالكلام يدور و خالد مب مستوعب السالفه ... من كثرة التسطيل نسى شو قال و شو دار بينه و بين سالم و شمسه ... و اصلاً ساعتها ما كان يدري هو شو كان يقول ...
خالد بضيج: اليلسه وياكم تلوع الجبد احسلي اظهر احسن من مجابلة ويوهكم ...
توه ياي بيظهر قبضه بو سالم من ايده و بغا يعطيه كف بس خالد انتبه له و يود ايده و دزها بعيد عنه ...
خالد بانفعال: شو اتحراني ياهل تصفعني؟؟
سالم بانفعال: خالد؟؟ احترم نفسك هذا ابوك ...
خالد: ولو ... ما له حق يصفعني ... هذا يزا اللي يطيع شوركم؟؟
شمسه: ع هالاشيا اللي تسويها فينا تستاهل الذبح مب بس كف ...
خالد: فكينا الله يخليج ... انا ادري كل هذا يصير بسبة بنت اختج اسوم ... و عشان اريحج اقولج من الحين لو بنات الدنيا كلهن خلصن ما خذتها ... خلي ولد عمها ياخذها و يتهنى فيها ...
ظهر خالد من الصاله و رقع الباب وراه بالقو ... سار و خلا وراه جو مشحون بالصدمه من تصرفه المفاجيء اللي ما جد يوم سواه ...
اليازيه من عقب الرمسه اللي سمعتها ما استحملت تيلس في الصاله دقيقه وحده و سارت حجرتها و لحقنها خواتها اللي فضلن الانسحاب بهدوء ...
*~*~*~~*~*~*
%% الساعه 9:30 فليل %%
في هالحزه في بيت عبدالله كلهم كان يالسين في غرفة الطعام يتعشون ...
ليلى: اقول ناصر ... انتو امتحاناتكم متى؟؟
ناصر ارتبك و ما عرف بشو يرد ...
ليلى: بلاك؟؟
امل رمست عقب ما طال سكوت ناصر: ناصر من اول السنه مفصول من الكليه ...
ليلى انصدمت: شووووه؟؟
امل: اللي سمعتيه ...
عبدالله بانفعال: ليش شو مسوي بعد؟؟
ليلى اشرت لعبدالله بعيونها انه ما ينازعه: ليش عاد مفصول؟؟
ناصر: اسباب وايده ماقدر اقولها ... بس اوعدكم ارد اكمل من السنه اليايه ...
عبدالله: هالمره مسامحينك و ان عدتها مره ثانيه ماشي سماح ...
ناصر: تراني وعدتكم ... ان شاء الله انا عند وعدي ...
ليلى: الله يوفجك يا ولدي و يوفجكم كلكم ... و انتن شو سويتن في امتحاناتكن؟؟
امل: الحمدلله كان سهل الامتحان ... خصه عاد اني كنت مذاكره حسيته وايد سهل ...
عفرا: و انا بعد كان امتحاني سهل ...
عبدالله: هالله هالله بالدرجات الزينه عاد ... بنجوف آخرة الامتحانات السهله ...
امل: افا عليك ما طلبت ... و تراني ما نسيت الهديه ...
عبدالله: اي هديه؟؟
امل: امايه بتخبرك ...
ليلى: الله يسلمك بنتك تبا تسافر السنه و هذا طبعاً اذا نجحت ...
عبدالله: خلها تنجح هي بس و فالها طيب ...
امل بوناسه: يعني موافق؟؟
عبدالله: اكيد ...
عفرا: الله يخليك لنا دووم يا احلى ابو في الدنيا كلها ...
عبدالله ابتسم: يخليكم لنا و لبعضكم ...
ابتسمت ليلى بوناسه و هي تجوف عيالها و بو عيالها كلهم على قلب واحد و دعت انها ما تكون فتره و تنتهي ... بس اللي كدرها انه عبدالله رن تلفونه و خلاهم و سار يرمس برع ...
ليلى بخاطرها: هالعاده اللي ما تتغير مادري متى بتودرها ...
*~*~*~~*~*~*
%% الاثنين 11:10 الصبح %%
في هالوقت في الكليه ... الريم و جليثم و ربيعتهم امينه يالسات تحت ظل شيره ع الحشيش ...
الريم: جليثم بترمسين ولا الشو؟؟ من امس حالج مب عايبني ...
جليثم: ما فيه شي ... كم مره تبيني اقولج؟؟
امينه: لا فيج شي ... و شي جايد بعد ... شكلج مره مب على بعضج ...
جليثم بضيج: ما فيه شي والله ما فيه شي ...
و فجأه تطب عليهم اسما هي و ربيعتها هند بس عشان تنكد عليهم ...
اسما: وينكن انتن مره ما تنشافن ...
الريم: ليش تدورينا اصلاً؟؟
اسما: بس جي ولهت على بنت عمي الطويله ... حرام؟؟
جليثم تسارعت دقات قلبها من سمعت اسما تقولها الطويله و غصبن عنها تذكرت حمدان اللي تحاول قد ما تقدر تنساه و بدا الدم يفور بعروقها ...
جليثم: و انتي شو تبين الحين؟؟
اسما: اعصابج علينا ... شو سوينالج نحن؟؟
جليثم: مجرد وجودج ويانا ينرفزني فلو سمحتي بالطيب وخري عنا ...
اسما: بنسير عنكم بس اول قوليلي صدق السالفه اللي سمعتها؟؟
جليثم: اي سالفه؟؟
اسما: تعرفين ...
جليثم: ما يخصج ...
اسما: دام السالفه فيها انتي اكيد يخصني ... و مبروك مقدماً اذا صار فيه نصيب ... يالله هندوه خلينا نسير نتمشى احسلنا ...
سارت اسما و خلت النار تشتعل ف قلب جليثم على عكس الريم و امينه اللي مب عارفات شو السالفه ...
الريم: جليثم ... اسما شو تقصد؟؟
جليثم بتردد: حمدان خطبني من ابويه ...
الريم بوناسه: والله؟؟ و ليش ما تخبريني يا الخاينه؟؟ خلاص انا زعلت ...
امينه: مبرووووك حبيبتي و عقبالنا ان شاء الله ...
جليثم: بس اقطعو هالرمسه غيروها ...
الريم: ليش؟؟ لهالدرجه هالخبر زعلج و انتي اللي تموتين في الهوا اللي يتنفسه ...
امينه: يالله ما نروم ... شو تبين اكثر من جي اللي تحبينه خطبج ليش الزعل؟؟
جليثم: خلوني ساكته احسن و غيرو هالسالفه اذا تبوني ايلس وياكن ...
الريم تنهدت: على راحتج ...
*~*~*~~*~*~*
%% الساعه 5:30 العصر %%
هاي المره العاشره اللي يرن فيها الموبايل و هو بعده مصرّ ما يرد عليه ... الافكار اللي تدور براسه مخلتنه يتجاهل كل اللي حواليه ... بند الموبايل دقايق و رد يرن و في اللحظه اللي بغا يرد فيها عالمتصل بند ... دشت موزه على حمدان حجرته تطمن عليه ... من يوم خبرته انها رمست بو سيف عن جليثم و هو ما يرمسها ...
موزه: يا بويه بسك ارحم روحك و ارحمنا ... قول شو تباني اسوي و انا حاظره ...
حمدان: .................................................
موزه: اذا تباني ارمس خالك برمسه بس لا تسوي ف روحك جي ...
حمدان: لا تسوين شي انا بروحي بتصرف ...
موزه: لا تسوي شي تندم عليه عقب ...
حمدان: لا تحاتين محد بيندم صدقيني ...
موزه: جوف يا حمدان ... انته مب مجبور ع البنت اذا ما تباها ... و خالك امره هين اقدر ارمسه ...
حمدان ابتسم ابتسامه مصطنعه: ما يحتاي ترمسينه ... خلاص انا راضي ...
موزه: ما بغيت يا بوك ... عورتلي قلبي حتى تلومت فيك ...
حمدان: ما يحتاي تتلومين فيه ... خلاص انا راضي بكل شي ...
موزه: بارك الله فيك يا ولدي ...
حمدان: خالي ما قالج متى بيردون عليكم ...
موزه: لا ما قال بس الظاهر بيطولون شويه ...
حمدان: اممممممم ...
موزه: اييبلك شي تاكله؟؟
حمدان: لا روحي بسير ...
موزه: برايك ...
*~*~*~~*~*~*
مرن اسبوعين بسرعة البرق و بدت اجازة الصيف و بأحداث ساخنه تلائم سخونة الجو الشديده ...
%% الخميس 5:30 العصر %%
" يا ربي وين سارو هاييل؟؟ الحين منو بيودينا؟؟ "
عفرا: مادري ...
امل: هالدريول السخيف بعد يوم نحن محتايينه يسافر ...
عفرا: اتصلي بنوره خليهم يمرون علينا و هم سايرين صوبهم ...
امل: ما بيسيرون هناك ... و اصلاً خالي سعود ف بوظبي ... يعني حالهم من حالنا ...
و في هاللحظه سمعن صوت هرن سياره في الحوي ...
عفرا: منو ها اللي ياي؟؟
امل: مادري ... لو منو يطلع زخيه خله يودينا ...
عفرا: اوكي ...
ظهرت عفرا تجوف منو ياينهم و ردت عقب فتره ...
عفرا و هي تلهث: منصور يقولج بسرعه ان ما نزلتي بسرعه بيسير عنج ... و بعد يقولج ييبي الاوراق اللي رمسج عنهن ابويه ...
امل: بلبس عباتي و بتعطر و بيي سيريله انتي عن يشرد ...
عفرا: بسرعه لا تتحيرين يالله يالله اقنعته يودينا ...
امل: انزين سيري ...
|| في سيارة منصور ||
منصور: عيل امكم وينها؟؟
امل: في البيت يعني وين تباها تسير؟؟
منصور: غريبه يالسه في البيت ... مب من عادتها ...
امل: و انته شو يخصك؟؟
منصور: هاه بدينا بطولة اللسان؟؟ لا تخليني افرج في الشارع الحين ...
امل: جان فيك خير سوها ...
منصور: تتحديني يعني؟؟ احمدي ربج رضينا نوديج ...
امل: غصبن عنك ...
عفرا: بس عاد انتو حشرتونا ...
منصور: بس سكتي انتي الثانيه ... وين بيت خالتكم هذا؟؟
امل: دش ف اول لفه ع اليمين ثاني بيت بيتهم ...
منصور و هو يأشر ع البيت: هذا؟؟
امل: هيه ... ايه وين داش انته؟؟ شو بيت ابوك هو؟؟
منصور: دام الباب مشرع ليش انزلكن خاري؟؟ مافينا يخطفونكم بعد ...
امل باستهزاء: سخيف ... و يمكن حد في الحوي لازم تطب عليهم جي؟؟
منصور: اقولج ... حولي و فكينا من حشرتج ...
امل: لحظه بعدل شعري ...
عفرا: انا بسبقج تمي انتي ع راحتج ...
منصور: يالله خلصينا هذي اختج نزلت لحقيها ...
امل بضيج: انزيييييين ...
تأفف منصور بضيج و لمح وحده ظاهره من الصاله سايره صوب المطبخ الخارجي و ما انتبهت لوجوده في الحوي ... و من ظهرت الين وصلت المطبخ و نظراته تتبعها ...
امل: بلاك صخيت مره وحده؟؟
منصور: اقول امول منو هاي اللي خطفت توه؟؟
امل: و انته اشلك تطالع؟؟ ما يخصك ... باي ...
نزلت امل من السياره بدون ما تجاوب على سؤاله عشان تقهره و اصلاً هي ما جافت منو ظهر لانها كانت لاهيه بالتعديل ...
منصور بخاطره: النذاله تمشي ف عروقكم من كبيركم الين صغيركم ...
|| في حجرة نوف ||
دشت امل حجرة نوف وين كانن نوف و عفرا يالسات سلمت ع نوف و سألتها عن اليازيه ...
امل: عيل يزوي وين؟؟ جلبت البيت فوق تحت ما حصلتها ...
نوف: ويا اسوم في حجرتها ... وين بتسير يعني؟؟
امل: توني يايه من هناك ما حصلتها ...
نوف: مادري عنها ... دوريها مره ثانيه ... نسيتيني السالفه اللي كنت ارمس عنها ...
امل: ويا ويهج ... ما تنفعين ...
ظهرت امل من حجرة نوف و سارت حجرة اليازيه مره ثانيه عل و عسى تحصلها هالمره ... و توها بتدش الحجره حصلتها ف ويهها يايه من برع ...
امل: انتي هني و انا ادورج من الصبح؟؟
اليازيه: كنت في المطبخ ...
امل: شو تسوين هالكثر في المطبخ؟؟
اليازيه: اطمن ع الكيكه اللي مسوتنها ...
امل: عز الله عورتنا بطونا ... من الحين اسمحيلي ما باكل ...
اليازيه: احسن توفرين ...
امل: مالت عليج ... عيل اسوم وين؟؟
اليازيه: داخل في حجرتي ...
امل: دشيت حجرتج ما حصلتها ...
اليازيه: يمكن في الحمام ...
دشن اليازيه امل حجرة اليازيه يلسن ويا اسما يسولفن ...
امل: الا خلود شخباره بعده ما عزم؟؟
اسما: هيه صح اخوج بلاه ماجوفه تحرك ... حتى ييه الحين ما ايينا ...
اليازيه: و انا شو يخصني فيه سأليه بروحج ...
اسما: حبيبتي يزوي ما سمعتي شي هني هناك؟؟ تعبت نفسياً من كثر ما اتريا ...
اليازيه: خطيبج هذا روحه مريض نفسياً ...
اسما ضربتها بالخفيف ع جتفها: انتي ايه ما اسمحلج ترمسين عن ريلي جي ...
امل: مادري منو ريلج عاد ...
اسما: سيد المزايين طال عمرج ...
امل: شكلاً بس ... ولا نفسه خايسه مافي حد اخس عنه ...
اليازيه: اخبرج انتي شو ياينج على اخويه ... لا يكون ماكل حلال ابوج؟؟
امل: بس جي ما استلطفه ...
اسما: انتي ما عندج سالفه ...
امل: خليت السوالف لج ... صدقيني محد بيتوهق بهالخالد غيرج ...
اسما: مب كيفج ...
امل: انزين بتجوفين ...
اليازيه: بس عاد ... قلت السوالف يالسات ترمسن عن خالد؟؟
و ف هاللحظه حد كان يدق الباب ...
اليازيه: منووووووه؟؟
خالد بدون نفس: فجي الباب ...
اسما ماتت من سمعت صوته ... و تمت تتفداه ... قامت اليازيه و فجت الباب تجوفه شو يبا ...
اسما بوناسه: واااااااااي فديت روحه ... عمره طويل ...
امل: مالت ...
اسما: ع ويهج ...
اليازيه عقب ما سار خالد: بسكن انتي و هي ...
اسما: جيه ما خليتيه يدش؟؟ ولا ما يدري اني هني؟؟
اليازيه: مادري عنه ... حتى لو درى اصلاً ما بخليه يدش ... <<<< قالتها و هي تغايض اسما ...
اسما: سباله السباله ...
اليازيه: ههههههههههههههه طالعه عليج ...
امل: قومن نظهر ... كتمه الحجره ...
اسما: هيه احسن ...
اليازيه: ادري مب عشان شي ... بس لانه حبيب القلب هني لازم تتمخطرين جدامه ...
اسما: هههههههههههههه زين يوم عرفتي ...
ظهرن ثلاثتهن من الحجره و سارن ييلسن في الحديقه الورانيه ...
امل: عن التبحلق روميو ما بيطل عليج من الدريشه ...
اسما: انتي شو يخصج؟؟ كيفي ...
امل: كيفج ... انتي اللي بتتعبين مب انا ...
اسما: لو اتم مبحلقه طول عمري ما بمل ...
اليازيه: شو انتو ما عندكم سوالف غير خالد؟؟
امل: هيه صح ما خبرتكم ... ترانا بنسافر هالسنه ...
اليازيه: والله؟؟ وين بتسيرون؟؟
امل: يمكن نسير استراليا ... فديتني انا صاحبة الفكره ...
اليازيه: و جي ما تخبرينا حضرتج؟؟
امل: تراني خبرتكن الحين ...
اليازيه: وناسه انا ابا اسير بعد ... الا ارمس ابويه اليوم ...
امل: بدينا بالغيره؟؟
اليازيه: لا تخافين ما نبا استراليا ... سيريلها بروحج ...
امل: احسن ...
اسما: والله انكن فاضيات ...
و فجأه ياهن صوت خالد و هو يزقر اليازيه ... اسما استانست من جافته و ابتسمتله بخجل لكن الابتسامه اختفت من جافت انه ما سوالها سالفه ...
امل: هذا خطيبج اللي طايره فيه ... لا عبرج ولا سوالج سالفه ...
اسما بضيج: سكتي عني لا اييج بكس ع راسج ...
امل: هههههههههههههههههه يا شين القفطه خصوصاً لو يت من ناس سبشل شرات حبيب القلب ...
اسما: جب انزين ...
امل: هههههههههههههههههههههه ...
دقايق و ردتلهن اليازيه و اسما ما قصرت فيها على طول استلمتها ...
اسما: اخوج شو بلاه شكله مب طبيعي بالمره ...
امل: من زمان مب غريبه عليه ...
اسما: امول الله يخليج مب وقت المصخره ... ارمس جد ...
امل: و انا ارمس اب ...
اسما: امول عاد عن السخافه ...
امل: انزين خلاص سكتنا ...
اسما لليازيه: يالله اعترفي شو بلاه خالد؟؟
اليازيه: ما بلاه شي ... بس فكينا من الصدعه ...
اسما: يزوي عن السخافه انتي الثانيه ...
اليازيه: ما فيه شي ... شو بيستوي به يعني؟؟
اسما: انا اللي لازم اسألج هالسؤال ...
اليازيه: مادري سإليه هو لا تسإليني انا ...
اسما: انزين ما عليه ...
اليازيه: الا قوم نواري ليش ما يو؟؟
امل: مادري عنهم ... يمكن بيسيرون مكان ويا امهم ...
اليازيه: القاطعه لا تتصل ولا تسأل ...
امل: سافرو سنتين ما اتصلو ولا فكرو يسإلون اتعودو ع القطاعه ... و آخر شي تقول انتو القاطعين ...
اليازيه: ههههههه اسميها سوالف ...
تمن اليازيه و امل يسولفن اما اسما تمت ساكته و تفكر بشو ممكن يكون مزعل خالد و مخلنه ما يعطيها ويه بالمره ... على عكس امل و اليازيه اللي اندمجن ف السوالف ولا حسوبها ...
*~*~*~~*~*~*
%% الساعه 10:30 فليل %%
" ماشالله الربع هني ... شحالكم يا القاطعين؟؟ وينكم ما تنجافون؟؟ "
ناصر بدون نفس: نحن بخير ... خير شو تبا؟؟
عمر: افا يا ناصر ... شو هالنفس الخايسه؟؟ ولا جنا ربعك ...
ناصر: لا انتو ربعي ولا لي خص فيكم ...
عمر: نسينا ما كلينا ...
ناصر: هيه نسينا عندك مانع؟؟
خالد: يا جماعه هدو ... ما فينا تضاربون مره ثانيه ...
عمر: قول لولد خالتك ناكر الجميل ...
خالد: لا تواخذه بعده زعلان بسبة السالفه اللي صارت ...
ناصر نش من مكانه: انا ساير ... اجوفك باجر ان شاء الله ... مع السلامه ...
خالد: الله وياك ...
عمر و هو يطالعه من طرف عينه: سلم ع الماما ...
ناصر طنشه و سار عنهم و تم خالد بروحه ويا عمر ...
عمر: شو بلاه نصور ...
خالد: قلتلك زعلان بسبة السالفه اللي صارت ...
عمر: خلاص عاد اللي فات مات و نحن بنتم ربع ...
خالد: قوله هالرمسه ...
عمر: خله ع راحته ... ما بذل عمري عشان واحد شراته ... هو روحه عقب بيي يترجانا نرابعه ...
خالد: انزين ما علينا من ناصر ... انته شخبارك و شو دنياك ...
عمر: الحمدلله الحال مثل ما هو ما تغير ... و انته شخبارك عزمت ولا بعدك؟؟
خالد: من زمان مفتك من هالسالفه لا تذكرني ...
عمر: افا ... ليش شو صار؟؟
خالد: مابا اعرس غصب ... <<<<< و رن تلفونه و من جاف الرقم حطه ع السايلنت و ما رد ...
عمر: هههههههههههه ادري وراك سالفه قول يالله اعترف ...
خالد: عقب بتعرف كل شي ...
عمر بخبث: ماكون عمر لو ما عرفت ... ادري سالفه عوده بعد ...
خالد: ههههههههههههههه ... الله يقطع ابليسك ...
>>>>>>>>>>>>>>>>> يتبع في الفصل الثالث
*~*~*~ الجزء السابع ~*~*~*
*~*~ الفصل الثالث ~*~*
%% الجمعه 1:25 الظهر %%
في هالقت في بيت سعود ... الكل كانو متيمعين هناك و يالسين كلهم في الميلس العود بما انه ما بينهم حد غريب ... سعود و خواته رواحهم ف صوب و البنات ف صوب و سالم و ناصر يسولفون بروحهم ... سعود كان عازمنهم ع الغدا لانه صارلهم فتره ما يلسو ويا بعض و منها يكسب رضا خواته شمسه و سلامه و يعيد المياه لمجاريها ...
سعود: عيل خالد وينه؟؟ ليش ما يا وياكم؟؟
شمسه: هالخالد مطلعلي قرون ... مادري شو ياه انجلب عليه مره وحده ...
سعود: ليش عاده؟؟
شمسه: كل ما رمسته عن شي قام و هب ف ويهي ... صاير ما يطيج كلمه مني ...
سلامه: يمكن شي مضايجنه رمسيه بالهداوه و ان شاء الله ما فيه الا كل خير ...
شمسه: رمسته بالهداوه و بالشده ما ينفع وياه ...
ليلى: اكيد تميتي تحنين عليه بهالسوالف ... عيال هالزمان كلهم جي ...
شمسه: الله يهداكم بس ... يعني انتو تعرفون ولدي احسن عني؟؟
سعود: صدقها ليلى ما قالت شي غلط ... و انتي الله يهداج تبين عيالج وراج ف كل شي مب غريبه واحد منهم يتمرد ف يوم من الايام ...
شمسه شهقت: فال الله ولا فالك ... دام انا موجوده محد بيتمرد انا امهم و مالهم غيري ...
سعود: و النعم فيج بس بعد خفي عليهم شوي ...عيال هالزمان ما تعرفين شو تحت روسهم ...
و في الطرف الثاني من الميلس ...
نوره: ما بغيتو تشرفون؟؟ مب قطاعه هالكثر ...
اليازيه: انتو ييتو ف وقت مب مناسب شو نسويلكم يعني؟؟
نوره: لا تتحججين بالامتحانات هذي امول كانت تمتحن حالها حالكم و كل يوم نكون على اتصال ...
اليازيه: يالله عاد الحين بتحاكمينا على شي صار و استوى ... خلاص حقكم علينا جان تبينا كل يوم نيي ما عندنا مانع ...
نوره: هههههههههههه انزين بلاج كلتيني ... صدقه ابويه طالعه على خالوه شمسه ...
نوف ودرت السوالف ويا عفرا و شهد و رزت ويهها: جني سمعت اسم امايه ... شو تحشون؟؟
نوره: انتي منو رمسج؟؟ يالله اجوف جلبي ويهج ...
نوف: عيل تحشين ف امايه و هي موجوده و تبيني اسكتلج؟؟ انا ما خبرتها ماكون نوف ...
اليازيه: بس انتي قصري حسج و ردي كملي سوالفج وياهن ...
نوف: يا ويهج ... شو محد يسولف وياكم انتو؟؟
نوره: خلينا السوالف لج ...
نوف: هيه فديتني دمي خفيف مب شراتكم ...
اليازيه بتهديد: نوفي ... جلبي ويهج و فكينا من حشرتج ...
و عقب لحظات صمت ...
نوره: و هالثنتين شو مشكلتهن اليوم؟؟
امل: فيه رقااااااد ...
نوره: الساعه وحده و نص و فيج رقاد؟؟ جيه متى رقدتي امس ...
امل: خمس و نص الفير ...
اليازيه: محد قالج ... تدرين وراج نشه جان رقدتي ...
امل: عادي ...
نوره: انزين عرفنا مشكلة امول الثانيه بلاها مبوزه؟؟
اليازيه: عاد هاي سالفتها سالفه ويا حبيب القلب ...
اسما: يزوي عاد فكينا كفايه اللي فيني لا تزيديني ...
نوره: شو السالفه؟؟ شو مهبب خلود هالمره؟؟
امل: ما عطاها ويه يوم كنا ف بيتهم امس ... و الحلوه محتره ...
نوره: هههههههههههه يحليلج يا اسوم ... والله ابتليتي بخلود ...
اسما: فديته لا ابتليت فيه ولا شي ... الا الحظ ما بييني الا من وراه ...
امل: الحظ التعيس اللي شراته ...
اسما: انتي ما اتوبين من سوالفج؟؟
نوره: حووووه وين تبن؟؟ قومن تكافخن مره وحده ...
اليازيه: ويييه ما جفتيهن امس كيف يتناقرن ... جنهن عدايل ...
نوره: يلعن ابو الحب جانه يسوي فيكن جذه ...
ما مداها نوره كملت رمستها شهقت اسما بطريقه خلتهن يتفاجأن و من جافن اللي دش عرفن سبب هالشهقه المفاجأه ...
امل: حسبي الله على بليسج زيغتينا ... ما صار خلود هذا اللي خلاج تشهقين جي ...
اسما: فديت روحه ولهانه عليه ... ما صدقت يوم جفته ... السبال بعد ما اييي يسلم ... جنه مب تارسين عينه ...
اليازيه بخاطرها: ما تدرين شو قال عنج هاك جان ما قلتي هالرمسه ...
اسما: حوووه ... ارمس منو انا؟؟
اليازيه تفاجأت: شو؟؟
اسما: ماشي سلامتج رقدي رقدي ...
كالعاده خالد كان راقد هالحزه ما كان متفيج ايي بس غصباً عنه بس عشان يسكت امه ... من اول ما دش تعمد يطنش بنات خالته و يلس ويا ناصر و سالم عقب ما سلم ع الموجودين و سوى روحه مندمج بالسوالف ويا ناصر و سالم بس عشان ما يحتك بأسما هالشي اللي مخلنها تنقهر و تشك ف تصرفاته ...
اسما بخاطرها: ما عليه يا خلود وين بتسير مني ... انا الا اعرف سالفتك اليوم ...