الجزء [6] من قصة أيام فـرحي .. و حـزني .. و معاناتي
*~*~*~ الجزء السادس ~*~*~*
%% الخميس 1:30 الظهر %%
" حياك الله بو عسكور ... اجوفك هناك عيل ... فمان الله " ... و سكر الخط ...
ام منصور: و الغدا؟؟
منصور و هو مجابل المنظره يتسفر: بتغدا ويا سعيد ربيعي ... من متى يحن عليه و انا استسمح منه عاد الحين حلف عليه الا اتغدى وياه ...
ام منصور: انزين اقولك ...
منصور: آمري ...
ام منصور: ليلوه شو سالفتها ويا بوك؟؟
منصور: الصراحه مادري ... ما خبروني شو صاير بينهم ... بس اللي اعرفه انه من فتره ظهر من البيت ولا رد ولا اتصل فيهم ...
ام منصور بحقد: تستاهل ما ياها ... ركضت وراه الين خذته مني و الحين بيراويها الويل ... احسن عشان تتعلم ما تصرق الرياييل مره ثانيه ...
منصور: انزين انا مب فاضي لهالسوالف ... مع السلامه ...
ام منصور: حافظنك الرب ...
ظهر منصور من حجرته و لحقته ام منصور سارت حجرتها ...
ام منصور بخاطرها: هذي حوباتي يا ليلوه ... اللي حصلتيه شويه ... عبدالله و انا اعرفه عدل هذا ويهي اذا ما كان معرس عليج ...
*~*~*~~*~*~*
%% عقب نص ساعه في المطعم %%
سعيد: وينك يا ريال ما تنجاف؟؟
منصور: تدري مشغول ويا الاهل و في الشركه ... و انتو شو اخباركم؟؟ مافي عرس جريب؟؟
سعيد باستنكار: لالالالا فال الله ولا فالك ... هالموضوع خلاص شلته من راسي ...
منصور بخبث: هههههههه ... و شو هالشي اللي مكرهنك في العرس هالكثر؟؟
سعيد و هو يطالع شاشة الموبايل اللي يرن: هالاشكال منو غيرهن؟؟
منصور: هههههههههه ... رد عليها ليش طنشتها؟؟
سعيد: هاي وحده ما تستاهل ... اقولك ما خلت واحد ما رمسته ... و المشكله اغلبهم ربعي و زاخنها كمن مره و بعد تحلف و تقول ماعرف حد غيرك ...
منصور: ياخي ودرها و فك عمرك من الصدعه ...
سعيد بخبث: لالالالا ما يصير ... خلنا نستفيد منها شوي و بعدين يصير خير ...
منصور و عينه ع الحرمه و الريال اللي دشو المطعم: هههههه ... هذا انته ما تتغير تستنزفهن الين يفلسن و عقب تقبضّهن الباب ...
سعيد و هو يتلفت حواليه الين لمح الريال و الحرمه: شو نسوي بعد ... انزين بس كلت الحرمه بثيابها ما تجوف ريلها وياها ...
منصور و هو ينش من مكانه: لحظه شوي ...
سعيد: تعال وين ساير؟؟
منصور: اتريا بييك ...
سار منصور صوب الريال و الحرمه و ابتسامة خبث مرسومه ع ويهه ...
منصور: ماشالله ماشالله ... مبروك منك المال و منها العيال ...
عبدالله بانفعال: الله لا يبارك فيك ... خير؟؟ شو تبا؟؟
منصور و عينه ع الحرمه: منو المدام؟؟
عبدالله: ما يخصك و لو سمحت فارج ...
منصور بخبث: توها ليلوه مسكره عني ... ارد اتصلبها و اخبرها باللي جفته؟؟
عبدالله: منصور خوز دام النفس عليك طيبه ...
منصور: ان شاء الله ... و اسمحولي ع الازعاج ... بس كنت ياي اباركلكم ...
عبدالله: ما يحتاي ...
منصور: مع السلامه يا مدام ... تشرفنا بشوفتج ...
عبدالله بصوت واطي عقب ما سار عنهم منصور: لا بارك الله فيك ولا في الساعه اللي ييت فيها ...
ميره بقلق: منو هذا؟؟
عبدالله: منصور ولدي ...
ميره تفاجأت: هذا منصور؟؟ يا ويلي عيل رحنا فيها ...
عبدالله: شو رحنا فيها انتي بعد؟؟
ميره: يقولك بيخبر مرتك و تباني استانس؟؟
عبدالله: ما عليج منه ... كلام بس اصلاً ما يقدر يسويها ...
ميره: الصراحه مب مطمنه ...
عبدالله: تبينا نغير المطعم؟؟
ميره: يكون احسن ... مب مرتاحه لوجوده هني ...
عبدالله: يالله نشي عيل ...
في الطرف الثاني من المطعم ...
سعيد: منو هاذيل؟؟
منصور: ابويه و مرته اليديده ... سواها و عرس عليها ... اسميها ليلوه بتتخبل اذا درت ...
سعيد باستغراب: منو ليلوه بعد؟؟
منصور: مرته الاوليه ...
سعيد: ماشالله ابوك كم مره في السنه يعرس؟؟
منصور: علمي علمك ... عاد مادري شو محصل من العرس ...
سعيد: الله يعينه الصراحه ...
خمس دقايق و يابو الاكل و تغدو و سولفو و ظهرو ...
*~*~*~~*~*~*
%% الساعه 5:30 العصر %%
" وين كنتي حضرتج؟؟ "
نوره ببرود: كنت اتمشى ...
شيخه بانفعال: بروحج؟؟
نوره: هيه بروحي ... شو يعني؟؟
شيخه: لا والله؟؟ و تقولينها بكل برود؟؟
نوره: يالسين في الغرفه طفرانين شو نسوي يعني؟؟ و تعرفيني ماحب الحكره ...
شيخه: ما فيج تتريين نص ساعه الين نرد البيت؟؟
سعود: شو بلاكم؟؟ اصواتكم واصله لين آخر الفندق ...
شيخه: بنتك ظاهره من الغرفه روحها و سايره تتمشى ...
سعود: نوره نحن شو قلنا؟؟
نوره: انزين خلاص آخر مره ...
سعود: مره ثانيه اذا بغيت تظهرين استإذني ...
نوره: ان شاء الله ...
سعود: يالله زهبو اغراضكم خلهم ينزلونهن ... الحين بنسير البيت ...
نوره: افففففف اخيراً ...
*~*~*~~*~*~*
%% الساعه 6:15 العصر %%
" ما صارت حاله هذي؟؟ الين متى بنتم محبوسين في البيت؟؟ "
ليلى: يوم بيرد ابوج تفاهمي وياه ... و بعدين هذي اختج يالسه في البيت ما قالت شي اشمعنى انتي اللي دوم ملانه؟؟
امل: شو اسوي اذا بنتج عديمة احساس ...
ليلى بهدوء: امل سمعيني ... الظهرات الوايده مب زينه ... شو تبين الناس يقولون عنج؟؟
امل: و الناس شو يخصهم فيني؟؟ جنهم ما يظهرون بالمره ...
ليلى: يظهرون ... بس مب هالكثر ...
امل: جوفي عاد ... لا تيلسين تسوين روحج مهتمه ... اونج يوم شردتي ابويه من البيت قلتي بتصطلبين ... هالحركات مب عليه و بظهر يعني بظهر ...
ليلى بانفعال: امول؟؟ عيب عليج انا امج مب ربيعتج جي ترمسيني ...
امل: حتى ربيعتي احترمها اكثر منج ... انتي ولا شي بالنسبه لي ...
ليلى انصدمت من اللي قالته امل و انربط لسانها ما قدرت ترد عليها ... على عكس امل اللي ولا جنها ما قالت شي سارت حجرتها بالها مرتاح و اتصلت بميثا عشان تمر عليها ...
|| في حجرة امل ||
عفرا: شو هالرمسه اللي قلتيها لامايه؟؟ مب عيب عليج؟؟
امل: صخي انتي الثانيه مب فاضيه لسخافاتج ...
عفرا: امول متى بتفهمين انه امايه تغيرت؟؟ صدقيني هي تحترق يوم تجوفكم تسوون فيها جي ... كفايه ابويه اللي الين الحين ما رد بعد انتو تيون تزيدونها؟؟
امل: عقب شو عاد قامت تحس؟؟ يوم كنا نحتاجها ما حست فينا ... الحين حست؟؟
عفرا: بعده ما فات الاوان بس انتي توهمين نفسج بهالشي ...
امل بانفعال: انا ما اوهم نفسي بشي و اذا قلبج يعورج عليها سيري يلسي وياها و فكينا من صدعتج ...
عفرا: بسيرلها بس ماقول الا الله يسامحج ...
امل: و يسامحها ع اللي سوته بعمرها و فينا ...
ظهرت عفرا من عند امل بدون ما ترد عليها و هي قلبها يعورها على امها اللي مب محصله حد يفهمها ...
*~*~*~~*~*~*
%% الساعه 11:45 فليل %%
" ههههههههه ... اسميك ياهل ... تخاف من حمود عاد؟؟ والله ما عندك سالفه "
خالد بانفعال: و بعدين انا ما خفت منه ... بس ما فيه على صدعته ...
عمر: عادي خله يحتشر من اليوم الين باجر ... انا لو منك بقوله كل شي ولا بهتم للي بيقوله ...
ناصر: صدقه محمد ... نحن لازم نودر هالسوالف الين متى بنتم جي؟؟
انصدمو خالد و عمر من رمسة ناصر و بانت ملامح الصدمه على ويوههم ...
عمر و هو يتهيس يبهت ناصر: نصور شو بلاك؟؟ مصخن؟؟
ناصر: لا مصخن ولا شي ...
خالد: لالالالالا الظاهر انته مب طبيعي اليوم ... يمكن عندك نقص في هاك الشي ...
عمر: ههههههه ... ما عليه ولا تزعل ... باجر ان شاء الله بتحصل كل شي زاهب ... تعرف آخر الشهر فقر ... باجر من ينزل المعاش بييبلك و على حسابي بعد ...
ناصر: تطنزون حضراتكم؟؟
خالد: نصور شو فيك؟؟
ناصر: ما فيه شي ...
خالد: اكيد؟؟ ترى شكلك مول مب عايبني ...
ناصر: مب لازم يعيبك ... عن اذنكم ...
عمر: تعال وين ساير؟؟ بعدها السهره ما بدت ...
ناصر و هو متجه صوب الباب: سهرو رواحكم ... مع السلامه ...
خالد: كيفك انته الخسران ...
عمر: شو بلاه ولد خالتك؟؟
خالد: ما عليك منه ... اليلسه بليا هاك الشي مب شي ... زهق من ويهك و ظهر ...
عمر: هههههههههه ... شكله جي ... باجر بيعتدل المود و بيرد شرات قبل و احسن ...
*~*~*~~*~*~*
%% السبت 9:30 الصبح %%
" صباح الخير "
شمسه باستغراب: صباح النور ...
مريم: غريبه اليوم ناش من وقت؟؟ و بعد كاشخ وين ساير ماشالله؟؟
خالد: ساير الشركه ... عندج مانع؟؟
شمسه بوناسه: زين زين اخيراً قررت تودر عنك الهيازه ...
خالد: بس بجوف الوضع كيف هناك و برد ... و اذا حبيت المكان بيلس ...
شمسه: وايد عليك ... الا شركة ابوك هاي كيف يعيبك الوضع ولا ما يعيبك؟؟
خالد: بعد ... تعرفين منو هناك ما يحتاي اقولج ...
شمسه: يعني بتخليلهم الشركه يلعبون فيها ع راحتهم و انته ميلس في البيت؟؟
خالد بخبث: اكيد لاء ... بس لاحقين ع الكراف ...
شمسه: تريقت؟؟
خالد: الحين بسير اتريق و بظهر ...
شمسه: برايك ...
سار خالد يتريا قبل ما يظهر و عقب ما خلص من الريوق توجه على للشركه ...
*~*~*~~*~*~*
%% الساعه 10:30 الصبح %%
" مشكور و ما قصرت ... ماشالله عليك شغلك تمام و ما عليه كلام ... "
مايد: لا شكر على واجب ... هذا شغلي و اللي لازم اسويه ما زدت بشي عن باقي الموظفين ...
سالم: بالعكس انت انشط واحد فيهم هذا اللي لاحظته فيك ...
مايد: مشكور و ما قصرت ...
سالم: خلاص تقدر تتفضل الحين ...
مايد ان شاء الله ... عن اذنك ...
ظهر مايد من مكتب سالم و هو مرتاح لارتياح سالم من شغله و هالشي اللي خلاه يستانس ...
" الصراحه ما عرف كيف اردلك جميلك يا راشد يوم دبرتلي هالشغله ... ما كنت حاط ببالي اني ممكن اكون مرتاح لهالدرجه ... بس بعد بيتم شي دوم مكدر مزاجي و مخوفني على طول ........... "
في طريجه للمكتب تفاجأ بواحد اصطدم فيه فجأه بدون قصد و خلا افكاره تتلاشى ...
خالد بضيج: عمى ... شو ما تجوف جدامك انته؟؟
مايد باترباك: اسمحلي ما جفتك ... كنت .......
خالد قاطعه: يا بابا صحصح ... انته في مكان شغل مب في البيت عشان تسرح ... ولا ماخذ شي قبل لا تيي؟؟
مايد انصدم من رمسة خالد بس رد استسمح منه و هو مرتبك: السموحه ... و ان شاء الله آخر مره ...
خالد بضيج: سير جوف شغلك احسلك ...
سار مايد عن خالد و هو منحرج من تصرف خالد وياه الشي اللي خلاه يمشي و هو مب قادر يرفع راسه من الحرج ...
سالم من سمعهم محتشرين برع المكتب عرف خالد من صوته و ظهر يجوف شو السالفه ...
سالم: شو بلاكم؟؟
خالد: تعال وياي مكتبك شويه ...
سالم: شو عندك؟؟
خالد: انته تعال و بس ...
سالم: اتفضل ...
في مكتب سالم ...
سالم: شو سبب الزياره المفاجأه؟؟
خالد: شركة ابويه كيفي ايي متى ما ابا ... حرام؟؟
سالم: لا مب حرام ... بس مستغرب نشتك من الصبح ...
خالد: لا تستغرب من هالشي ... كلها كمن يوم و بباشر الشغل ان شاء الله ...
سالم: ههههههه ... مبروك ما بغيت ياخي ...
خالد: شو نسوي؟؟ من الملل ... الا هذا شو يسوي هني؟؟
سالم: منو؟؟
خالد: هذا راعي المخدرات المحترم ...
سالم باستغراب: راعي المخدرات؟؟ منو تقصد؟؟
خالد: ميود منو غيره ...
سالم: مايد اخو راشد؟؟
خالد: منو غيره ...
سالم: من صدقك انته؟؟ الريال مافيه شي و ماشالله عليه نشيط و ملتزم بشغله ولا جفنا عليه غلط ... و الا انته لك راي ثاني؟؟
خالد ابتسم باستهزاء: جنه المسرحيه مشت عليكم انته و ابويه ... اجوف الكل قام يلعب عليكم ... اول ......
سالم قاطعه: خالد لو سمحت لا تدخل في شي ما يخصك فيه ... لا حد لعب علينا ولا يقدرون اصلاً ... و انت تدري انه اللي تقصدهم لولاهم ما كانت الشركه بتقوم ...
خالد: الظاهر انته مخك مغسول عدل شرات ابويه ...
سالم: محد مغسول مخه غيرك انته ...
خالد بخبث: شو قصدك؟؟
سالم: ولا شي ...
خالد: انته الظاهر الكلام وياك ضايع ... اسير لبويه احسن من مجابلة ويهك ...
سالم: لا اتعب روحك ابويه محد ...
ظهر خالد من مكتب سالم و حصل ابوه ف ويهه ياي من برع و وياه و بو سيف ...
عقب السلام ...
بو سالم: ما بغيت تينا يابوك ... من متى و نحن نترياك؟؟
خالد: مادريت انكم ما تصبرون عني لهالدرجه جان ييتكم من زمان ...
بو سيف: حياك الله في أي وقت يا ولدي ... الحلال حلالك ...
خالد بخبث: ادري ...
بو سالم عرف اللي يدور ببال خالد و خزه بنظره عشان يسكت ...
خالد: عيل سيف وينه؟؟ بسلم عليه ...
بو سالم: بتحصله هناك في مكتبه ... <<<<< و أشرله ع مكان مكتب سيف ...
%% في مكتب سيف %%
سيف في هالوقت كان مندمج ويا الاوراق اللي جدامه و ما انتبه للي دش عليه و سلم و انصدم يوم جاف خالد جدامه و هد شغله ...
خالد من طرف خشمه: شحالك سيف شو الشغل وياك؟؟
سيف: الحمدلله تمام ... و انته شحالك؟؟
خالد: الحمدلله ...
سيف: ماشالله اليوم زايرنا؟؟
خالد: نطمن ع الحلال ... و لا تنسى تراني جريب بشتغل هني ... تدري ما يصير اعرس و انا بليا شغل لازم نكد ع الحرمه ...
سيف حس بدقات قلبه تتسارع: تستاهل ... الله يهنيك ...
خالد باستهزاء: بس؟؟ هذا اللي طلع منك؟؟ ما دريت انك بتحقد عليه لهالدرجه ...
سيف: لا حقدت عليك ولا الله قاله ...
خالد بخبث: يعني افهم من كلامك انك خلاص استسلمت؟؟
سيف: نحن مب في حرب عشان استسلم ولا انتصر ...
خالد: هههههههههههه ... دمك خفيف يا حظها أسامي لو كانت من نصيبك ... بس طبعاً هالشي مستحيل دامني حي ...
سيف بدون نفس: نحن في مكان شغل ماعتقد انه مكان مناسب لهالمواظيع ... فإذا انت فاضي انا مب فاضي عندي شغل و لازم اخلصه ...
خالد بانفعال: اجوف طالت و شمخت ... انته نسيت انا منوه و انته منوه ولا تباني اذكرك؟؟
خليل(واحد من الموظفين) عقب ما سمع صوت خالد: خير عمي سيف حصل شي؟؟
سيف: لاء مافي شي ... سير جوف شغلك ...
خليل: لا مؤاخزه ...
خالد عقب ما ظهر خليل: ماشالله صرت عمهم ... عيل باجر شو بتصير؟؟
سيف: بتم سيف ...
خالد بانفعال: اونك تتحداني ... بس ما عليه دواك عندي ... و بنجوف يا انا يا انت في هالشركه ساعتها بتعرف منو خالد ...
ظهر خالد من مكتب سيف مفول ... تعامل سيف وياه ببرود خلاه ينقهر و على طول ركب سيارته و توجه للبيت ...
و في الطرف الثاني ... سيف على الرغم من خوفه من اللي ممكن يسويه خالد ... الا انه كان مرتاح لانه قدر يرد على خالد و وقاحته و في نفس الوقت قلبه يتقطع على طاري أسما اللي خالد ما خلا مناسبه الا و طراها جدامه بس عشان يقهره ...
*~*~*~~*~*~*
%% الساعه 5:00 العصر %%
" السلام عليكم "
ليلى: و عليكم السلام ... تعال اباك شوي ...
ناصر بدون نفس: تعبان و ابا اسير ارقد ... اجلي رمستج لبعدين ...
ليلى: متى بعدين اذا انت يلسه في البيت ما تيلس؟؟
ناصر تنهد بضيج و يا يلس شوي بعيد عنها: يلسنا ... قولي اللي في خاطرج ...
ليلى: لين متى بتم على هالحال؟؟
ناصر بضيج: ردينا ع هالسالفه بعد؟؟
ليلى: يا ناصر الكلام اللي اقولك اياه عشان مصلحتك ... ادري اني قصرت وياكم وايد و اعترف بهالشي ... بس لو شو يصير انا امكم و لازم اوجهكم للصح ...
ناصر: و شو المطلوب مني الحين؟؟
ليلى: انك تستوي ريال البيت في غياب ابوك ... و تودر عنك هالسوالف البطاليه ...
ناصر باستهزاء: بس وايد عليج ...
ليلى بحزم: ناصر؟؟
ناصر: اسمحيلي اقولج انج تأخرتي وايد و ندمج ما بييب فايده ... تمي على حالج احسلج ولا جي بتتعبين ... انا غسلي ايدج مني و اذا رمتي ع بناتج زين ...
ليلى: ناصر انا ارمس من صدجي ... اذا انته العود ما تسمع كلامي شو اقول عن الصغار؟؟
ناصر: مشكلتج انتي و بناتج ...
نش ناصر من مكانه متنرفز على دشت عبدالله ... دش عبدالله و سلم و ليلى بس اللي ردت عليه السلام ...
ناصر: هاذوه ريلج يا ... فكينا من الحشره الحين ...
عبدالله: ناصر؟؟ شو هالرمسه الماصخه؟؟ جي ترمس امك و ابوك؟؟ وين المذهب وين الاحترام؟؟
ناصر بانفعال: انتو اللي يبتو هالشي لعماركم ... لو محترمين انفسكم جان احترمناكم ...
ما وحاله ناصر خلص كلمته ياه كف قوي من ابوه لدرجة انه امل و عفرا اللي كانن في الصاله الفوقانيه سمعن الصوت و ليلى من هول الصدمه تيبست ف مكانها و ما نطقت بحرف ... اما ناصر من قوة الكف حس انه خده يحترق من الكف ...
ناصر: بس هذا اللي فالحين فيه ... ما عرفتو تربون و ييتو على آخر عماركم تصفعون ...
عبدالله بتهديد: نصور ... تراني الين الحين ساكت عنك لا تخليني ازيدك ...
ناصر: و كل هذا ما كفاك يعني؟؟
عبدالله بانفعال: انجلع من جدامي مابي اجوفك و من الحين اقولك ترى البيت يتعذرك ...
ناصر: البيت حلال عليك و هذا ويهي اذا جفتوني مره ثانيه؟؟
عبدالله: يكون احسن ...
ظهر ناصر من البيت و هو حاس انه الدنيا ضاقت فيه ركب سيارته و ظهر من البيت على طول محتار وين يسير و ما لقى غير شقة عمر ملجأه الوحيد ...
اما في البيت ...
ليلى: انته شو سويت؟؟ ما تخاف على ولدك؟؟ مب مكفنك انه ضايع من عقبك و بعد ترد تطرده من البيت؟؟
عبدالله باستهزاء: عدال يا الام الحنون ... توج تحسين انه ولدج ضايع؟؟
ليلى و الدموع على خدها شلالات: خاف الله في ولدك ... من له غيرك عشان تعامله بهالطريقه؟؟ انت أي نوع من البشر؟؟
عبدالله: دموعج هاي ما منها فايده ... لو انتي حرمة بيت جان مسكتي عيالج من قبل مب الحين يايه تقوليلي هالكلام؟؟
ليلى: ماقول غير الله يسامحك ...
عبدالله بانفعال: و يسامحج ع اللي سويتيه في عمرج و في عيالج ...
كل هذا يصير و امل و عفرا واقفات عند الدري يسمعن اللي ينقال و منصدمات من اللي يصير ... عفرا من عقب الكلام اللي دار بين عبدالله و ليلى ما رامت تسكت اكثر و سارت عندهم الصاله ...
عفرا: ابويه امايه تغيرت ليش مب راضي تفهم؟؟
عبدالله: اجوف ظهرلج لسان انتي الثانيه ... شكلج تبين تلحقين اخوج ...
عفرا و هي شويه و بتصيح: بتطردني انا بعد؟؟ ايي منك اكثر و اذا ناصر استوابه شي اقولك من الحين اني ما بسامحك لين آخر يوم في عمري ...
ركظت عفرا على حجرتها على طول و هي تصيح ... ليلى ما علقت ع الكلام اللي قالته عفرا و هي الثانيه سارت حجرتها ... اما عبدالله رد ظهر من البيت ...
*~*~*~~*~*~*
%% الاحد 2:15 الظهر %%
حزة الغدا في بيت بو سالم ...
بو سالم لخالد: اجوفك ما ييتنا اليوم ... وين اللي بيداوم؟؟
خالد: غيرت رايي ... مابا اشتغل الحين ...
بو سالم: ليش عاد يا بويه؟؟
خالد و هو يبلع اللقمه: بس ... ما عيبني الوضع هناك ...
شمسه: و لين متى ناوي اتم بطالي؟؟ خالتك سلامه كل يوم تسألني و ارد عليها جريب ... بس الله يعلم متى هالجريب ...
خالد: و على الشو مستعيلين انا اللي بشتغل ولا انتو؟؟
شمسه: شو بعد على الشو مستعيلين؟؟ نباك تعرس ...
خالد: هاذوه عندج سالم يوزيه ... الين متى بيتم جي؟؟ و اذا خالوه مستعيله على عرس بنتها تيوزها ولد عمها و تفتك ...
شمسه اتفاجأت من اللي قاله خالد: خالد؟؟ شو هالرمسه اليديده اللي اسمعها؟؟ مالك الا بنت خالتك تفهم؟؟
خالد: ههههههه ... ان شاء الله ولا تزعلين ...
شمسه: هيه ... جي اباك ...
*~*~*~~*~*~*
%% الساعه 5:30 العصر %%
في بيت سعود ...
ام سعود: الا خواتك شخبارهن؟؟ انته خبرتهن نحن ردينا؟؟
سعود بضيج: لا ما خبرت حد ...
ام سعود: افا ... ليش عاد؟؟
سعود: امايه مافينا ع الصدعه ... تونا واصلين نبا نريح شوي ... لاحقين ع المصايب و المشاكل ...
ام سعود باستغراب: ويديه ... شو مصايبه بعد؟؟ جي ترمس عن خواتك؟؟
سعود: انزين ما قلت ما بخبرهم ... بعدين بنخبرهم ...
ام سعود: متى بعدين؟؟
سعود: عقب يومين ثلاث ...
ام سعود: بنجوف ...
و شويه و ايون البنات من حجرهن و كل وحده ويهها منتفخ من كثر الرقاد ...
ام سعود: و انتن مره ما تشبعن من الرقاد؟؟ شو هالمذهب الطفس؟؟
شهد: شو نسوي يدوه من الملل ...
ام سعود: يلسن ويانا ابرك ... حشى مره ما نجوفكم ... اما راقدين ولا مجابلين هالكمبرورر ...
نوره: ههههههههههه ... يدوه يسمونه كمبيوتر مب كمبرورر ...
سعود بحزم: نوره ... يوزي عن يدتج ...
نوره: انزين خلاص سكتنا ...
شهد: انزين باباتي متى بنسير بيت قوم خالوه؟؟ ولهت على نوفي الدبه ...
نوره: هيه صح ... نحن من متى واصلين محد يانا ولا سرنا لحد ...
سعود تنهد: ان شاء الله الاربعا بنسيرلهم ...
شيخه و هي نازله من الدري: وين سايرين ان شاء الله؟؟
سعود: بنسير نسلم ع الاهل يوم الاربعا ان شاء الله ...
شيخه: عنبوه تونا واصلين ... لاحقين ع الهم و الغم ...
ام سعود لسعود: اخبركم ... شو بلاكم انته و حرمتك ع بناتي؟؟
سعود: ما بلانا شي ... و جان تبينا باجر نسيرلهم انا راضي بس لا تسوينها قضيه ...
ام سعود بعناد: خلاص عيل باجر نسير ... اشحقه نأجلها الين الاربعا ...
سعود: خلاص صار ... باجر ان شاء الله بنسير عليهم كلهم ...
نوره و شهد ما صدقن يوم درن انهم بيسيرون على خالاتهم باجر بعكس سعود و شيخه اللي كانو مضايجين من هالسالفه ...
*~*~*~~*~*~*
%% الاثنين 5:00 العصر %%
" اخيييييراً ... ما بغينا نخلص المنهج "
ليلى: عاد نباج تذاكرين ... مب تسقطين شرات كل مره ...
امل: لاحقين ع المذاكره ... باقي اسبوع ع الامتحانات ...
ليلى باستهزاء: و شو ناويه تسوين في هالاسبوع؟؟
امل: نبا نرتاح نفسياً عن الأرف ... حرام؟؟
ليلى: لا مب حرام ... جدامج اجازه ثلاث شهور بتشبعين و بتملين بعد ...
امل: لالالالالا الا الاجازه ما امل منها ...
عقب فترة صمت ...
ليلى: اخوج ما اتصل؟؟
امل: أي واحد فيهم؟؟
ليلى: ناصر طبعاً ... منو يعني؟؟
امل: لا ما اتصل ... ولا اظن بيتصل بعد ...
ليلى و هي تحس قلبها مقبوض: يا ربي وين سار هالولد؟؟
امل: سإلي نفسج انتي و ابويه ...
ليلى: امول؟؟ عن هالرمسه الماصخه ...
امل: بس هاللي فالحين فيه ... الواحد يوم يقول لكم الصدق تزعلون ولا جنكم السبب في ضياع ناصر ... و ما اعتقد يكون شي غريب اذا ضعنا نحن وياه ...
ليلى: شو يضيعكم بعد؟؟ انتي العوده اللي تعرفين الصح من الغلط تقولين هالرمسه ... شو خليتي حق الصغيره؟؟
امل: أي صح و غلط؟؟ انتو جد نصحتونا ولا بينتولنا الصح من الغلط؟؟ ماعتقد ... و اتذكري هالشي عدل ... لا انتي ولا ابويه تنفعون تكونونون ام و ابو ... عن اذنج ...
سارت امل عن امها ضايجه و خلتها في حيره ... حاولت قد ما تقدر انها ترد ثقة عيالها فيها بس الظاهر يت متأخره وايد ...
*~*~*~~*~*~*
%% الاثنين 5:15 العصر %%
" يا حيالله من يانا ... نورتو المكان بوجودكم "
ام راشد: الله يحييج و يبجيج ... و هذا واجبنا صارلنا فتره قاطعينكم ما يصير ...
ام حميد: تسلمون لي والله ... " و التفتت صوب راشد و مايد " و شحالهم الشباب تراني عتبانه عليكم انتو زودتوها وايد مره ولا حتى تخطفون صوبنا ...
راشد: اسمحيلنا خالوه بس تعرفين مشاكل الشغل ما تخلي الواحد يتفرغ لشي حتى اهله ...
ام حميد: يعطيكم العافيه يا ولدي ... و انت مايد شحالك الحين ان شاء الله احسن؟؟
مايد ابتسم ابتسامه خفيفه: الحمدلله على كل حال ...
عايشه بتردد: امممم راشد بغيت منك خدمه و ياريت ما تردني ...
راشد: افا عليج آمري ...
عايشه: الصراحه انا مب مرتاحه في الشغل ... و يا ريت ترمس الاستاذ سالم و تقوله اني بستقيل ...
راشد باستغراب: تستقيلين مره وحده؟؟ ليش شو اللي مب مريحنج؟؟
عايشه: تعرف زحمة المراجعين و الشغل هالايام زايد و انا ما قدر عليه ...
راشد: بس انتو محتاجين الكم بيزه اللي تحصلونهم من هالشغله ... و بعدين وين بتحصلين شغل عقب؟؟
بو راشد: يا ولدي يا راشد اذا البنت مب مرتاحه خلها تستقيل و جانك متهايز تدورلها شغله انا بنفسي بدبرلها ...
راشد: انزين بدال ما تستقيلين ليش ما تغيرين القسم اللي انتي فيه؟؟
عايشه: امممم الصراحه ما حطيت هالشي ببالي ...
بو راشد: كلام راشد صح ... احسلج تغيرين المكان اللي تشتغلين فيه احسن من انج تستقيلين ...
عايشه: خلاص عيل شوركم و هداية الله ...
ام راشد: عيل حميد و علي وين ... مول ما ينجافون هالايام؟؟
ام حميد تنهدت بحسره: هايتين كالعاده ... الله يهديهم بس ...
و شويه بدشة حميد عليهم سلم عليهم ع الطاير زقر عايشه و ظهر ...
حميد: عوووووش ... تعالي لي الحجره بغيتج شوي ...
عايشه و هي حاسه انه ما بيصير خير من عقب هالرمسه اللي قالها: ان شاء الله ...
حميد بضيج: يالله بسرعه ...
عايشه بعد بضيج: انزييييين ...
|| في حجرة حميد ||
حميد: ابا اعرف شو اللي ميلسنج وياهم هناك؟؟
عايشه باستغراب: لا والله؟؟ عمي و مرته و عياله زايرينا ... تبانا نطردهم يعني؟؟
حميد: و بكل بساطه تقولينها؟؟ " عمي و عياله " <<<< قالها باستهزاء و بنفس طريقتها ... لا يكون عياله خوانج الصغار ولا عيالج ماخذه راحتج وياهم؟؟
عايشه: انته ما تستحي؟؟ الا هم عيال عمي مب ناس غرب عشان تسويلنا كل هالحشره؟؟
حميد: لا والله؟؟ تعالي كفخيني بعد؟؟
عايشه: الضرب شويه عليك ... ولا قوم عمك ايونك الين البيت و تسلم عليهم من بعيد و تذلف؟؟ شو هالمذهب الخايس؟؟
ما مداها خلصت كلامها الا و كف قوي اييها ع خدها ...
حميد: طولي لسانج مره ثانيه و جوفي اللي بييج ... انجلعي من جدامي ...
عايشه و هي حاطه ايدها على خدها اللي تحس انه يحرقها من الكف: انزين ما عليه ... حسابك عند عمي ...
حميد لعايشه و هي متوجهه صوب الباب: خوفتيني بعمج ... مادري عاد منو عمج؟؟
عايشه بتهديد: انزين ما عليه بتجوف ...
عقب خمس دقايق في الصاله ...
حميد: اجوفج ما خبرتي عمج ...
عايشه بدون نفس: كيفي ... و احمد ربك اني هونت و ما خبرته ...
حميد ضحك باستهزاء: مادري عاد شو بيسوي عمج؟؟
ام حميد: حميد؟؟ شو هالرمسه؟؟ هذا عمك ...
حميد طنشهن و كمل طريجه صوب الباب ...
*~*~*~~*~*~*
%% الاربعا 7:30 فليل %%
" امايه لحقي ... فجي الباب بسرعه "
ليلى ظهرت من حجرتها بسرعه: شو؟؟ اخوج رد؟؟
عفرا بوناسه: لاء ... خالي سعود هني ...
ليلى باستغراب: خالج سعود؟؟ قوليلهم بيي الحين ...
|| في الصاله ||
دشت ليلى الصاله عقب ما بدلت اللبس اللي كان عليها و سلمت على امها و اخوها سعود و مرته و بناته ... و تمت ليلى وياهم و البنات سارو ييلسون ويا امل و عفرا ...
ليلى: الحمدلله ع السلامه ما بغيتو تردون ...
سعود: الحمدلله خلصت شغلي و رديت البلاد على طول يوم واحد ما ترييت ...
ام سعود: عيل ريلج و عيالج وينهم؟؟ ما جفت غير عفروه ...
ليلى: عبدالله و ناصر محد و امول اكيد مجابله النت ...
سعود: هالبنات مول ما يودرونه هالكمبيوتر ... حتى شهد اللي ما يخصها فيه اجوفها تعلقت به ...
ليلى: يلعبون في النت ... ماعندهم شغله ...
سعود: عاد وقت امتحانات شليه عنهم خليهم يذاكرون ...
ليلى: اكيد انا قايله اليوم بشله عنهم ...
سعود: و ناصر شخباره؟؟ سويتي اللي وصيتج عليه قبل ما اسافر؟؟
ليلى بارتباك: ناصر بخير ... و دوم يسأل عنك ...
سعود: متى ايي هو؟؟
ليلى: من يشبع من ربعه يرد البيت ...
و بعد فترة صمت ...
ليلى: شحالج شيخه؟؟ اجوفج ساكته ...
شيخه بدون نفس: الحمدلله بخير ... بس مالي بارض اسولف ...
ليلى بخاطرها: اشحقه يايه دام مالج بارض ...
سعود: خلاص عيل نترخص منكم الحين ...
ليلى: بعدكم يالسين ... تعشو و سيرو ... ولا مليتو من اليلسه ويانا ...
سعود: مره ثانيه ان شاء الله ...
و في هاللحظه تيهم عفرا ...
عفرا: امايه ريال يباج ع التلفون ...
ليلى باستغراب: منو هالريال؟؟
عفرا: مادري ... اول سأل عن ابويه و عقب سأل عنج يوم قلتله ابويه محد ...
ربعت ليلى صوب التلفون و شلته ...
ليلى بانفعال للمتصل: انته شو تقول؟؟ ناصر ولدي انا؟؟
اتيمعو كلهم على صوت صراخ ليلى اللي اغمى عليها عقب ما بندت التلفون و طاروبها صوب المستشفى ...
*~*~*~ نهاية الجزء السادس ~*~*~*