قصيدة تطوير الذات بدون دورات :
يامطورين الذات بحثاً عن الذات
أنا بعد طورت ذاتي بذاتي
لأنني غيرت روتين الأوقات
ولها السبب قدرت اغير حياتي
ماعاد أفكر بالسنين القديمات
ولاشيل هم سنيني المقبلاتي
اللي مضى ماهوب راجع بعد فات
والجاي يمكن قبله الموت ياتي
يعني أعيش اليوم واليوم ساعات
واللي يبي الراحة يسوي سواتي
العمر رحلة والليالي محطات
والموت رمحه مثل رمح الزناتي
أثري من أول عايش في متاهات
ومقزر عمري على ذكرياتي
لكن بلا تعقيد وأحزان وآهات
قررت ألملم مابقى من شتاتي
وعملت في نفسي شوية اصلاحات
واصلاحي لنفسي على نحو آتي:
بنيت في صدري مساجد وروضات
وقمت أتهجد يوم غيري يباتي
وحفظت من فضل الولي عدة آيات
وجلت غبار الحزن والاغنياتي
وسويت فلتر للهواجيس بالذات
والحزن داخل سلة المهملاتي
ورتبت بالترتيب بعض الملفات
وحطيت بالرف القريب أمنياتي
وركزت في وقتي على الأولويات
والأول الأهم عندي صلاتي
واثنين بالأثنين بر ومرضات
بأبوي وأمي سلوتي مع غناتي
والثالث الاحسان مع المساوات
لعيالي الغالين ويا بناتي
والرابع أمشي ماحسبت المسافات
لأن السفر ألقابه أجمل صفاتي
وخمسة حرمت الذات بعض الملذات
والاتزان أصبح سمة من سماتي
والحمدلله عايش في سهالات
متريح بالي ولاعاد أحاتي
يعني كذا ماني بحاجة لدورات
في عقلي الباطن أو ايحاء ذاتي
انا فقط محتاج رب السموات
يغفر لي ذنوبي بساعة وفاتي
قصيده رائعه 👍