منتدى بريدة - موقف موتر منيره

..وفي هذه القصيدة ثلاثة مواقف :
موقف : حدث عام 1437هـ في أحد الطرق السريعة !!
وموقفي أنا !
وموقف موتر منيرة !
ـــــــــــــــــــــــــــــــ :

على جلسةْ قديمة تحت ظلّ بنـاية عمارةْ
..... دخلت بطوع هذا الوقت في غيبوبة الحيرةْ:

وانا جالس واحاسبني تعدّى صوت سيّارةْ
..... وريحة عطر/ مدري عطر/ مرّ بريحة منيرةْ !

قرصني صوت : يا مجنون علّم عمدة الحارةْ
..... قلوب النّاس لا ماتت تموت النّاس و"الغيرةْ" !

ابو راشد قبل عامين كان مجوّد الطـارةْ
..... وبنتـه فـ آخر الموتر بحشمتها وتقديره

عفيفة ، من بنات اوّل : صدف في وسط محّاره
..... عليها من حجاب الطهـر ما يخفي محاذيره !

وفي هذا الزمن قالت : تبي تعميرنـا سـاره
..... أنا ادري : تقصد "التعمير" بمعسّل وتعميره!

مشاكلنا القديمةْ : بسّ ابو عنتر وغـوّاره
..... وفي هذا الزمان الحرّ زادوا بوش وبليـره !

طب افرض بنشرت فالخـطّ ، والأيّام دوّاره
..... فتحت القوس هيّا اكتب : وهذا الحلم تفسيره :

( ألو : ماما ، بسرعةْ أرسلي "واحد" بطيّاره
..... أنا بـنشرت ، والدوّار ما تفـتح مسـاميره !

وفيه هناك ، مدري هناك : شارب ينفض غباره
..... هلا ، يا مرحبا واهلين ، ممكن خدمةْ صغيره

تمنّي – يا بعد عمري – أنا لعينيك نظارةْ
وشيليني كفر / لستك ، وخلّـي سيـرتي سيرةْ

أنا من يوم شفتك ، يا قمر عشرين ، محتارةْ
.....عرفت انّ الكفر بنشـر وجيت آشوف جنزيره) !.
.
كفايةْ أغلق اقواسـك / تهــزّ المـسرح ادواره
..... وتذبل في فم الرجّال " لو ينطق " معاذيره !

دخيلك قفّل المسرح عليهم واسدل ستاره
..... مـسارحنا كثيرة ، والمصـوّر زاد تصويره

أعيش بديرتي أحسن : معي مزود ومطّاره
..... وتسوى ريحة العطـر الفرنسي ريحة الديرةْ

ابـ قرا سيرة الماضي من التاريخ واخباره
.... من اوّل ما خديجة ضمّت المختـار فالسيـرةْ

وبـ اكتب في جدار البيت : هذا البيت وجـداره
..... برقم الصكّ والتـاريخ : مـوقف موتر منيرةْ !!

===============
شعر / سعود الصاعدي