فيني اكسبي اجر ياجعل امك الجنه
وقولي رضيت وقسم ماني بزعلانه
ياللي من اسبابك العقال منجنه
يا الغاوي اللي عليك عيون فتانه
زينك يجري نفوس الناس للفتنه
وكبرك مخلي عقول الغيد مرضانه
يا الجادل .. النافل ..الرعبوبه ..القطنه
بنت الاكابر .. عزيزة نفس .. (بطرانه)
ترى العتب منك حط بخاطري انه
حاشاك تسمع كلام افلان وفلانه
تدري بحبك وتدري انه وانه
روحي عليله ونفسي فيك شفقانه
يفداك منهو ليا دق .. يدق لي رنه
ويفداك منهي تدق .. تقول ( غلطانه )
ولبيه يا عيونك اللي ترث الونه
يا محرك (ن) في بحور الشعر شطئانه
ولبى حكاك المثير ورقة اللكنه
اللي تهيض عروق القلب واشجانه
لا مرني طيفك وسراني الدفنه
آمر بيتك واوقف عند بيبانه
حزين مدري خفوقي وش بلا حزنه
كني اناظره واشكي فيك جدرانه
يا سامعين الحكي لي صاحب (ن) كنه
خاطي غزال .. تعدى زين غزلانه
من لامني لا عشقته ما علي منه
مهوب انا من يغيضهه قول عدوانه
اهواه ولا كمل اهل الشرق هاونه
اموت به يا حلال الموت لعيانه
رجل (ن) وعندي من علوم الشكل (خزنه )
محد يثاقل بوزن الشعر ميزانه
شاعر مغاير ولو ثقله وله وزنه
يكتب بشعره على تخطيط شيطانه
وسبحانه اللي له الفضل وله المنه
يرد كيد العذول وكيد اعوانه
والحين تسمع ولا بي اسمع الحنه
وماهو عشاني ولكنه على شانه
قلب عشقها لحد الموت .. وآظنه
يستاهل انها ترد انصاف عرفانه
اما بترضى .. ويا جعل امها الجنه
ولا فتزعل جعلها دوم .. زعلانه